Read wanga EBIKHOLE BIA ABARUME 2 Bible Online

EBIKHOLE BIA ABARUME 2 - wanga bible

EBIKHOLE BIA ABARUME 2

¹Ne olwa inyanga ya Pendekote yola, abasuubili boosi bakhung'ana habundu halala.

²Mubwangu bahulila oluyoka okhurula mwikulu olwahulilikha shinga okhuhoola khwomuyeka omukhongo, nilwitsula munzu omwa bali nibekhale mwosi.

³Mana nibalola eshiafwana shinga tsinimi tsiomulilo nitsiyeela khubuli shiamulala habwenaho.

⁴Mana boosi nibetsulwamwo nende Roho Omutakatifu, ne nibachaaka okhuboola mutsinimi tsindi shinga olwa Roho Omutakatifu yabanyalila okhuboola. .

⁵Baliho Abayahudi bandi abahelesinjia Nyasaye oluyali, abali nibarula mumahanga koosi keshialo, ne nibamenya Yerusalemu munyanga etsio.

⁶Olwa bahulila oluyoka olwo, omukanda omukhongo kwabandu kwakhung'anaho. Boosi besundukha muno, shichila buli shiamulala khubo yahulila abasuubili abo nibaboola mululimilwe.

⁷Mana nibang'ang'ala nende okhwisundukha, ne nibareebana bari, “Abandu baboolanga bano shibali Abagalilaya?

⁸Ne kali karie mbu, buli omundu khwifwe abahulilanga nibaboola mutsinimi tsifwe?

⁹Ifwe khurulanga Paritsi, Media, Elamu, abandi khurulanga Mesopotamia, Yudea, Kapadokia, Ponto nende Asia,

¹⁰abandi khurulanga Firigia, Pamufilia, Misiri, abandi khurulanga mungongo tsia Libia ahambi nende Ekirene. Ne abandi khurula Roma,

¹¹boosi Abayahudi abebule nende abo abekalukhasia okhuba Abayahudi, okhurula Kirete nende Arabia, fwesi pe khuhulilanga nibaboola mutsinimi tsiefwe, khumakhuwa kebikhole ebikhongo ebia Nyasaye yakhola!”

¹²Boosi bang'ang'aala nibahuka mana nibareebana abeene khubeene bari, “Eshisina shia amakhuwa kano nishiina?”

¹³Nebutswa abandi babatseshelela nibaboola bari, “Abandu bano bameelile amalwa!”

¹⁴Mana Petero nasinjiile halala nabarume bashie ekhumi namulala abo, nachinguula omwoyo naboolela omukanda ari, “Inywe Abayahudi bashianje nende mwesi abamenyile Yerusalemu, recheresie emuboolele eshisina shiamakhuwa kano.

¹⁵Abandu bano shibameelile amalwa shinga olwa inywe mupaaranga tawe, bulano netsisaa tsitaru tsiomumabwibwi.

¹⁶Habula kano niko akomulakusi Yoeli yaboola ari:

¹⁷Nyasaye aboola ari, ‘Kano niko akandakhakhole munyanga tsiobumalilishi: Ndakhasuundulile abandu boosi Roho wanje. Ne abaana benywe abasiani nende abakhaana bakharumbule amakhuwa kanje, abaraaka benywe bakhalole amalolelo nabo abakofu benywe nibaloora amalooro.

¹⁸Toto, kata khubakhalabani banje abasaatsa nende abakhasi ndakhabasuundulile Roho wanje munyanga etsio, nabo nibarumbula amakhuwa kanje.

¹⁹Ndakhakhole akamakana ikulu mwikulu nende akokhuchenyia hasi khushialo mbu, amatsayi, omulilo, nende omwosi omukhongo.

²⁰Eliuba liakhakalukhasibwa nilikwa eshiilima, nakwo omwesi kwakhakalukhane nikwakhanya shinga amatsayi, inyanga eya Omwami ikhongo khandi eyoluyali niyishili okhuula.

²¹Mana yesi yesi oulihabila eliira elia Omwami alihonibwa.’

²²“Inywe Abaisiraeli bashianje recheresie amakhuwa kano! Yesu wa Nazareti, omundu owa obunyalibwe bweshinyasaye bwalolesibwa khwinywe habulafu okhubirira mubikhole biamakana nende ebiokhuhuchisia biosi ebia Nyasaye yakhola okhubirira muye. Inywe abeene mumanyile kano, shichila kekholekha hano mwinywe.

²³Nyasaye mubuloosiebwe omwene, yali niyarechekha mbu, Yesu yakhahaanwe mumakhono kenywe. Nenyu mwamwira khulwa okhulekha abandu abonooni okhumubamba khumusalaba.

²⁴Nebutswa Nyasaye yamulamusia okhurula mukhufwa, namukhola omulekhuule okhurula mubunyali bwokhufwa, shichila shikali akanyalikha mbu, okhufwa khumubohe emakombe tawe.

²⁵Okhuba Daudi yaboola khuye ari, ‘Ndalola Omwami imbeli wanje buli lwosi; ali khumukhono kwanje omusaatsa, kho shindalahendakhwo tawe.

²⁶Khulweshio, esangaala muno, khandi ndikhoya muno. Ndalamenya nendi nobunaayi,

²⁷okhuba shiolindekha emakombe ta, khandi shiolifuchilila isie omukhalabaniwo omusuubilwa okhubolela mung'ani tawe.

²⁸Waakholile isie okhumanya tsinjila tsitsia mubulamu, ne okhubahokhwo khulikhola isie okhuba nomwikhoyo omukhongo.’

²⁹“Abaana befwe, okhuula emboole ninenywe habulafu khumakhuwa aka kuuka wefwe, omuruchi Daudi. Yafwa ne nayabilwa, ne ing'aniye yishiliho ninefwe okhuula olwa leelo.

³⁰Daudi yali omulakusi, ne yamanya aka Nyasaye yali niyamusuubisia; okhuba Nyasaye yetsuba nasuubisia mbu, alikhola mulala khubolwibulo lwa Daudi okhuba omuruchi shinga Daudi.

³¹Kho Daudi yaranjilila khale okhulola aka Nyasaye yali natsia okhukhola mana naboola khukokhulamukha khwa Kristo ari, ‘Shiyalekhwa emakombe ta, khandi omubilikwe shikwabolakhwo tawe.’

³²Nyasaye yalamusia Yesu watsana uno okhurula mukhufwa, nefwe fwesi khuli abaloli khukobwatoto buno.

³³Yamulamusia, ne namwikhasia khumukhonokwe omusaatsa. Ne Papawe yamuhelesia Roho Omutakatifu shinga olwa yali niyasuubisia. Akamulolanga nende okhuhulila bulano kano, neshihaanwa eshia Yesu akhuhelesiye.

³⁴Okhuba shiyali Daudi owatikulukha natsia mwikulu ta; habula omwene yaboola ari, ‘OMWAMI Nyasaye yaboolela Omwami wanje mbu, yikhala hano khumukhono kwanje omusaatsa

³⁵okhuula olwa ndakhare abasukubo boosi hasi webilenjebio.’

³⁶“Kho abandu ba Isiraeli boosi, mumanye toto mbu, Yesu owa mwabamba uno, niye owa Nyasaye akholile okhuba Omwami khandi Kristo!”

³⁷Ne olwa abandu bahulila amakhuwa ako, banyakhana mumioyo chiabwe mana nibareeba Petero nende abarume bashie bari, “Kho abaana befwe, khukhole shiina bulano?”

³⁸Petero nababoolela ari, “Buli shiamulala khwinywe okhuula yekalukhasie okhurula mubwonoonibwe, abatiisibwe muliira lia Yesu Kristo, kho mbu obwonooni bwenywe buleshelwa, mana mulanyoola Roho Omutakatifu ouli eshihaanwa shia Nyasaye.

³⁹Okhuba obusuubisie bwa Nyasaye buno bwasuubisibwa inywe nende abaana benywe nende kata abandu abali ehale, boosi aba OMWAMI Nyasaye wefwe alanga mbu betse khuye.”

⁴⁰Petero yekhoonyela amakhuwa kandi amanji nabachetsiyia nende okhubatsuuba nababoolela ari, “Mwihonie abeene okhurula khushinyasio eshitsanga khulwibulo olushiamu luno!”

⁴¹Kho abo abahulila amakhuwa ka Petero mana nibakasuubila babatiisibwa. Abameetekha khumukanda kwabasuubili khunyanga eyo bali ahambi abandu ebikhumila bitaru (3,000).

⁴²Abandu abo batsiililila okhweka okhurula khubarume, nibamenya halala mubusanjilani khandi nibasanjilana mukhusonyola omukaate nende mumasaayo.

⁴³Akamakana amanji nende akokhuhuchisia kakholwa nende abarume abo mana buli mundu natiilwa noburi.

⁴⁴Abasuubili boosi batsiililila okhuba halala nibali nobusanjilani bwahalala. Khandi bakabananga emiandu chiabwe mulala nowashie.

⁴⁵Bakusia emiandu chiabwe nende ebindu biabwe, ne nibakabana amapesa okhulondana nende shinga obuha obwa buli shiamulala yali ninabwo.

⁴⁶Buli nyanga bakhung'anilanga muhekalu, nibalia ebiokhulia biabwe halala mungo tsiabwe. Balitsanga ebiokhulia biabwe ebio mubusangaafu nende mukhwikhoya mumioyo.

⁴⁷Betsoominjia Nyasaye, nabo abandu boosi nibabetsoomia. Ne buli nyanga, Omwami yameetanga khung'anda yabwe abo abahonibungwa.