Read wanga EBIKHOLE BIA ABARUME 22 Bible Online

EBIKHOLE BIA ABARUME 22 - wanga bible

EBIKHOLE BIA ABARUME 22

¹“Abaisiraeli bashianje, recheresie amakhuwa kanje kokhwiteetsa imbeli wenywe!”

²Ne olwa bahulila naboolanga ninabo muluheburania baholeela tsi. Kho Paulo natsiililila okhuboola ari,

³“Isie endi omuyahudi omwibule wa Tariso mu Kilikia, nebutswa ndakhulila Yerusalemu hano, nindi omwechi wa Gamalieli. Ndechesibwa amalako akabakuuka befwe obutinyu, ne ndali nindehaana khu Nyasaye shinga butswa inywe mwesi.

⁴Ndasandia nende okhutiila abandu abaloonda injila eya Omwami yino. Ndatiilanga abasaatsa nende abakhasi nebayila mumbohe.

⁵Omwisaaliisi omukhongo nende abeshiina boosi bangalushilanga mushiina mbu, emboolanga akatoto. Ndahebungwa tsibarwa okhurula khubo nitsihandichiilwe Abayahudi bashianje, abali nibali Damasiko. Kho ndatsitsangayo okhutiila abandu abo mana ebareela Yerusalemu nibaboyilwe khuminyololo kho mbu, banyoole eshinyasio.

⁶“Kho olundi, olwa ndali ninzitsanga nindi ahambi okhuula Damasiko, ahambi mushiteere hakari, oluhenu okhurula mwikulu lwaamwesushila nilumbotokhana.

⁷Ndakwa hasi ne nimbulila omwoyo nikuboola kuri, ‘Saulo! Saulo! Eshichilanga niusandia nishiina?’

⁸Nasi nireeba endi, ‘Niwe wina, Omwami?’ Omwoyo okwo nikumboolela kuri, ‘Nisie Yesu owa Nazareti, owosaandinjia.’

⁹Abandu aba ndali ninabo balola oluhenu olwo, nebutswa shibahulila omwoyo okwa oyo owali naboolanga ninasi tawe.

¹⁰Mana nireeba endi, ‘Omwami, ekhole shiina?’ Naye Omwami niyamboolela ari, ‘Buukha, winjile mwitookho lia Damasiko, ne ebweneyo olaboolelwa amakhuwa koosi aka Nyasaye yamala okhukhwahulila mbu okhole.’

¹¹Oluhenu olwo lwambofusia tsimoni, ne aba ndali ninabo abo nibandiila omukhono nibanzimilila okhuula Damasiko.

¹²“Mwitookho omwo yalimwo omundu oulangwa mbu Anania, owahelesinjia Nyasaye oluyali, khandi owalondanga amalako kefwe, ne Abayahudi abali nibamenyayo bamuhelesinjia muno.

¹³Yanzitsakhwo, nasinjila ahambi ninasi, mana naboola ari ‘Saulo mwana wefwe, lola khandi!’ Mushise shiene eshio, ndanyalilwa okhulola khandi, ne nimulola omwene.

¹⁴Niyamboolela khandi ari, ‘Nyasaye owabakuuka befwe amalile okhukhwahula iwe mbu, omanye akokhwenyakhwe, mbu olole omukhalabaniwe omulunjishi, mana omuhulile naboolanga nomwoyokwe omwene.

¹⁵Okhuba olaba omuloliwe okhuboolela buli shiamundu aka olutsi nende okhuhulila.

¹⁶Ne bulano eshichila oshinde khandi nishina? Buukha obatiisibwe, ne obwonoonibwo bulaleshelwa khulwa okhusaaya muliiralie.’

¹⁷“Ndakalukha Yerusalemu, ne olwa ndali nisaayanga muhekalu ndalola lilolelo.

¹⁸Ndalola Omwami niyamboolela ari, ‘Khola lwangu orule mu Yerusalemu, shichila abandu bano shibalafuchilila obulolibwo khwisie tawe.’

¹⁹Nasi ningalusia endi, ‘Omwami, boosi pe bamanyile obulayi bwene mbu ndatsilenje mutsisinagogi nibatiila nende okhubakhupa abo abasuubila mwiwe.

²⁰Ne kata olwa Sitefano omuloliwo yeerwa, isie omwene ndaliho, nindola netsimoni tsianje okhwiirwakhwe, ne neninda ebifwalo ebia abo abamwiira.’

²¹Omwami niyamboolela ari, ‘Tsia shichila ndalakhuruma ehale mubamahanga.’ ”

²²Abandu barecheresia Paulo naboola ako, nebutswa bamala nibachaaka okhukhola obuyoka nibalanjilisia obutinyu bari, “Rusieho omundu! Mwire! Shiakhoyile okhubaho omulamu tawe!”

²³Bali nibakhupanga tsimbungu, nibasakusula tsingubo tsiabwe, nibatuumula olufu mwikulu.

²⁴Omusinjilili omuroma nalaka abelihebe okhwinjisia Paulo mukambi yabwe, ne nababoolela mbu bamunyweshe, bamanye eshichilanga Abayahudi nibakhupa obuyoka, nibalamwenya ta.

²⁵Ne olwa bali nibakhamuboha mbu anywekhwe, Paulo yareeba omusikari owali nasinjiileho ari, “Kali habwene mumalako kenywe okhunywekha omwibule wa Roma oushili kata okhuyaalwa khulwa likhuwa liosi liosi libi?”

²⁶Ne lwomusikari oyo yahulila ario, yatsia khumusinjilili namureeba ari, “Wenyanga okhukhola shiina shino? Omundu oyo nomwibule wa Roma.”

²⁷Kho omusinjilili oyo natsia nareeba Paulo ari, “Mboolelakhwo, iwe toto oli omwibule wa Roma?” Naye Paulo nakalusia naboola ari, “Kali kario.”

²⁸Omusinjilili oyo naboola ari, “Isie ndekhola Omuroma khulwa okhurunga amapesa amanji muno.” Naye Paulo nakalusia ari, “Isie endi omwibule mwene wa Roma.”

²⁹Ne lwangu abandu bali nibenyanga okhunonelesia Paulo nibamurulakhwo. Ne omusinjilili oyo olwa yanyoola mbu Paulo nomwibule wa Roma, ne uboyilwe neminyololo, yatiilwa noburi muno.

³⁰Omusinjilili wabelihe oyo yenya okhumanya eshichila Abayahudi nibenjililanga Paulo itookho. Kho inyanga yalondakhwo yabolola eminyololo echia bali nibaboyile Paulo mana nalaka abesaaliisi abakhongo nende abeshiina boosi okhwakaana. Mana nayila Paulo namusinjisia imbeli wabwe.