Read wanga EBIKHOLE BIA ABARUME 23 Bible Online

EBIKHOLE BIA ABARUME 23 - wanga bible

EBIKHOLE BIA ABARUME 23

¹Paulo nahenga shilunji abeshiina abo mana nababoolela ari, “Abaisiraeli bashianje! Amapaaro kanje akomukari kali habwene okhulondana nende injila eya ndamenyelenjemwo imbeli wa Nyasaye okhuula khunyanga yino.”

²Omwisaaliisi Omukhongo Anania nalaka abali nibasinjiile ahambi nende Paulo mbu bamukhupe olukhofi khumunwa.

³Naye Paulo namuboolela ari, “Nyasaye alakhuupa iwe, oli lisiisi eliabakhwa olufuyo! Wakhekhala orie khushifumbi okhuyaasia isie okhulondana namalako, ne khandi ofunaka amalako katsana khulwa okhulaka mbu ekhupwe?”

⁴Abandu abali ahambi nende Paulo nibamureeba bari, “Iwe shioriakhwo okhunyeka Omwisaaliisi Omukhongo wa Nyasaye tawe?”

⁵Naye Paulo nabakalusia ari, “Abaisiraeli bashianje, shimbeele nimanyile mbu nomwisaaliisi Omukhongo ta, okhuba Amahandiko kaboolanga mbu, ‘Shiolaboola likhuwa libi khumuruchi wabandubo tawe.’ ”

⁶Ne olwa Paulo yalola mbu, abandi khubomung'anda eyo bali Abasadukayo ne abandi Abafarisayo, yalanjilisia nomwoyo omukhongo mushiina naboola ari, “Abaisiraeli bashianje! Isie endi Omufarisayo, khandi omwana womufarisayo. Endi hano okhuyaasibwa khulwa obunaayi obwa endi ninabwo mbu abafu balilamusibwa.”

⁷Ne olwa yaboola ario, obuyingani bwabuukha hakari wa Abafarisayo nende Abasadukayo, mana omukanda okwo nikwahukhana.

⁸(Okhuba Abasadukayo baboolanga mbu, obulamushi bubulaho, khandi mbu, abamalaika kata tsiroho bibulaho. Nebutswa Abafarisayo basuubililanga mumakhuwa kataru ako.)

⁹Mana obuyoka nibumeeta, kho balala khubechesia bamalako abali abomung'anda ya Abafarisayo nibasinjila nibayingana obutinyu nibaboola bari, “Ifwe shikhulolanga eshindu shiosi eshibi khumundu uno tawe! Haundi Roho noho omumalaika aboolile ninaye!”

¹⁰Obuyingani obwo nibumeeta muno, nikachila omusinjilili wamahe naria napaara mbu, haundi Paulo anyala okhutonywamwo ebitonye ebitonye. Kho nalaka abelihe mbu batsie mumukanda barusiemwo Paulo bamuyile mukambi yabwe.

¹¹Eshilo eshio, Omwami yasinjila aha Paulo yali mana namuboolela ari, “Shiolaria tawe! Okhuba shinga lworusiye obuloli khwisie Yerusalemu, nolwa khandi okhuula okhole orio Roma.”

¹²Olwa bwashia, Abayahudi bandi bakhung'ana mulwanyi, ne nibalia eshitsubo mbu, shibalaliakhwo noho okhunywakhwo eshindu shiosi shiosi nibashili okhwiira Paulo tawe.

¹³Ne abandu abarecheresania amakhuwa ako bali abandu abashila amakhumi kane.

¹⁴Mana nibatsia khubesaaliisi abakhulundu nende abakofu nibababoolela bari “Ifwe khumalile okhulia eshitsubo mbu, shikhulaliakhwo eshindu shiosi shiosi ta, okhuula olwa khuba nikhwirire Paulo.

¹⁵Khulweshio, inywe nende abeshiina rumasie amakhuwa khumusinjilili welihe wa Roma areere Paulo khwinywe, ne mwikaatie mbu mwenyanga okhukhalaka eshiinashie habwene. Nefu khulaba nikwirecheshe okhumwiira nashili kata okhuula hano tawe.”

¹⁶Nebutswa omwihwa wa Paulo omusiani, yahulila amakhuwa ako koosi, ne natsia mukambi yabelihe eyo naboolela Paulo amakhuwa ako.

¹⁷Mana Paulo nalanga mulala khubelihe abakhongo, namuboolela ari, “Bukula omuraaka uno omuyile khumusinjilili wamahe; shichila alikhwo nelikhuwa liokhumuboolela.”

¹⁸Kho omusikari oyo namubukula, namuyila khumusinjilili wamahe oyo, mana naboola ari, “Omubohe Paulo yananjile, ne niyaruma okhureera omuraaka uno khwiwe, shichila alikhwo nelikhuwa liokhukhuboolela.”

¹⁹Omusinjilili wamahe oyo natiila omukhono kwomuraaka oyo, namusitia halubeka yenyene, ne namureeba ari, “Nilikhuwa shiina eliawenya okhumboolela?”

²⁰Omuraaka oyo naboola ari, “Abayahudi bamalile okhulia eshitsubo mbu, mukamba balakhureeba mbu, orumasie, Paulo ayilwe mushiina, balekaatia mbu, abeshiina benyanga okhukhalaka eshiinashie habwene.

²¹Nebutswa iwe olarecheresia amakhuwa kabwe ta, okhuba baliho abandu bandi abashila amakhumi kane abetsa okhuba nibamukonesheele. Bamalile okhulia eshitsubo mbu, shibalaliakhwo kata okhunywakhwo eshindu shiosi shiosi ta, okhuula olwa balaba nibamwiriire. Ne bulano berecheeshe okhukhola bario, baliindanga butswa obukhalachibwo.”

²²Mana omusinjilili wamahe naboola ari, “Shiolaboolelakhwo omundu yesi mbu, omalile okhumboolela amakhuwa ako tawe.” Mana naseebula omuraaka oyo natsia.

²³Kho omusinjilili wamahe oyo nalanga babili khubelihe abakhongo mana nababoolela ari, “Ahambi khutsisaa tsitaru tsieshilo mubukule abelihe ebikhumi bibili nende abokhuchendela khutsifarasi amakhumi musafu, nende abamafumo ebikhumi bibili, mana mwirecheshe okhutsia Kaisaria.

²⁴Mureecheshe ifarasi ya Paulo aniinakhwo mana mumuyile okhuula khumukafana Feliki eshisiche mulembe.”

²⁵Mana omusinjilili oyo nahandika ibarwa naboola ari,

²⁶“Okhurula khu Kilaudio Lisia. Yule khu owoluyali Kafuna Feliki. Nyoola amashiesio kanje.

²⁷Abayahudi batiila omundu uno, ne bali nibali ahambi okhumwiira. Ndanyoola mbu, ye nomuroma omwibule, kho ndatsia nabelihe banje nimuhonokosia.

²⁸Ne olwa ndenya okhumanya eshiabali nibamwinjililangakhwo itookho, ndamuyila khubeshiina shiabwe.

²⁹Ne ninyoola mbu, shiyali nakholile eshindu eshibi eshinyala okhuchila yeerwe noho kata okhuyilwa mumbohe tawe. Aka bali nibamwinjililangakhwo kali butswa akamalako kabwe abeene.

³⁰Ne olwa ndaboolelwe mbu, berechekhanga okhumwiira, ne lwangu nindola mbu emurume yetse khwiwe, khandi endachilisiiye obamwinjililanga itookho abo betse baboole aka bamwinjililangakhwo imbeliwo.”

³¹Kho abelihe abo nibakhola akabalachilisibwa. Nibabukula Paulo eshilo eshio, nibamuyila okhuula Antipatiri.

³²Ne inyanga yalondakhwo abelihe abo bakalukha mukambi khubilenje, ne nibalekha abetsifarasi nibashitsiililila ninaye.

³³Bamuyila Kaisaria, nibahelesia omukafuna ibarwa eyo mana nibahaana Paulo mumakhonoke.

³⁴Omukafuna oyo nasooma ibarwa eyo, ne nareeba Paulo mbu amuboolele olukoongo lwarulangamwo. Ne olwa yanyoola mbu arulanga mulukongo lwa Kilikia,

³⁵yamuboolela ari, “Nerecheresie amakhuwako, abakhwinjililanga itookho abo, nibakhola hano.” Mana nahaana amalako mbu Paulo alindwe obulayi mukambi ikhongo yomukafuna Herode.