Read wanga EBIKHOLE BIA ABARUME 25 Bible Online

EBIKHOLE BIA ABARUME 25 - wanga bible

EBIKHOLE BIA ABARUME 25

¹Olunyuma olwa tsinyanga tsitaru, Fesito namalile okhuula mulukongo olwo, yarula Kaisaria natsia Yerusalemu,

²ewa abesaaliisi abakhulundu nende abemilisi ba Abayahudi bamuboolela koosi aka bali nibenjilila Paulo itookho. Nibamusaaya

³mbu, nachama abafuchilile bayile Paulo Yerusalemu; shichila bali niberecheeshe okhwiirira Paulo khunjila.

⁴Fesito nabakalusia ari, “Paulo nomubohe Kaisaria, nasi omwene endi ahambi okhukalukhayo.

⁵Kho leshe abemilisi benywe betse khutsie ninabo Kaisaria, mana bayaasie omundu uno naba niyakhola amabi.”

⁶Fesito yamala ahambi tsinyanga munane noho ekhumi, mana natsia Kaisaria. Khunyanga yaloondakhwo yatsia mushiina mana nalaka mbu Paulo arerwe imbeliwe.

⁷Ne olwa Paulo yetsa, Abayahudi abali nibarulile Yerusalemu basinjila nibamubotokhana, ne nibachaaka okhuboola amakhuwa amanji amabi khu Paulo, kabeene balanyala okhulolesia mbu nakatieli tawe.

⁸Nebutswa Paulo omwene yeterera naboola ari; “Isie eshili okhukholakhwo likhuwa libi liosi liosi eliokhufukula amalako aka Abayahudi noho Ihekalu noho kata omuruchi wa Roma tawe.”

⁹Nebutswa Fesito niyenyanga okhuchamisia Abayahudi yareeba Paulo ari, “Onyala okhufuchilila okhutsia Yerusalemu mana oyaasilibweyo imbeli wanje?”

¹⁰Naye Paulo naboola ari “Esie esinjiile imbeli weshiina shiobukhalachi eshia Omuruchi wa Roma, aha ekhoyeele okhuyaasilibwa. Shinga olwa iwe omwene omanyile obulayi, isie shindakholakhwo likhuwa liosi libi khu Abayahudi tawe.

¹¹Nikaba mbu ndafunaka amalako, ne khandi nikhola eshindu eshiakhachila ndakhalachilwa okhufwa, shiesabanga mbu endekhwe butswa tawe. Nebutswa nikaba mbu, obwatoto bubula mukabanzinjililangakhwo itookho, shialiho ounyala okhuhaana mumakhono kabwe tawe. Esaaya mbu eyaasibwe nomuruchi wa Roma.”

¹²Mana Fesito, niyakhaboolelana nabeshiinashie nakalusia ari, “Oreebile mbu, oyaasibwe nomuruchi wa Roma, kho khulakhuyila imbeli ewa omuruchi wa Roma.”

¹³Olunyuma lwetsinyanga tsindiiti omuruchi Aguripa nende Berenike betsa Kaisaria khulwa obucheni bwokhwinjisia Fesito.

¹⁴Olwa bali nibakhabayo tsinyanga tsinyinji, Fesito yenoosia omuruchi amakhuwa ka Paulo ari, “Omundu ali hano owa Feliki yelekha mumbohe.

¹⁵Ne olwa ndatsia Yerusalemu, abesaaliisi abakhulundu nende abakofu abeshiyahudi bamwinjilila mana nibaareeba mbu emukhalachile eshiina.

¹⁶Nebutswa isie ndababoolela mbu, ifwe Abaroma shikhuli nobunyali obwokhuhaana khubandu omundu yesi owinjililwe khulwa okhukhola likhuwa libi tawe. Okhuula aranjilile aheebwe obwiyangu bwokhwakaana nende abamwinjililanga itookho abo habulafu, mana yeterere omwene khukabamwinjililangakhwo ako.

¹⁷Kho olwa betsa hano shindashinda ta, habula inyanga yalondakhwo ndekhasia eshiina, ne nindaka mbu omundu uno areerwe.

¹⁸Abamwinjililanga abo nibasinjila, nebutswa shibamwinjililakhwo khwikhuwa liosi libi shinga ndapaaranga mbu balamwinjilila tawe.

¹⁹Akabali ninako kali butswa amayingane khumakhuwa akeidiini yabwe, akomundu undi owalangwa mbu Yesu, owafwa, nebutswa Paulo aboolanga mbu nomulamu.

²⁰Isie ndakhaywa shinga olwa ndakhanyoola akahabwene khumakhuwa kano, kho nireeba Paulo naba niyakhafuchilila okhutsia Yerusalemu mana ayaasilibwe ebweneyo khumakhuwa ako.

²¹Nebutswa Paulo yareeba mbu, alindwe obulayi okhuula lwomuruchi wa Roma amuyaasia. Kho ndalaka mbu alindwe obulayi okhuula olwa emuruma khumuruchi wa Roma.”

²²Aguripa naboolela Fesito ari, “Ndakhekoomba isie omwene erecheresiekhwo amakhuwa akomundu uno.” Fesito namukalusia ari; “Olamurecheresia mukamba.”

²³Kho inyanga yalondakhwo Aguripa nende Berenike betsa muluyali olukhongo nende omwikhoyo nibenjila munzu ikhongo yemikhung'ano. Bali nende abakhongo babelihe belihe belitookho. Mana Fesito nalaka mbu Paulo areerwe mukari.

²⁴Kho Fesito naboola ari, “Omuruchi Aguripa nende boosi abali hano ninefwe; mulolanga omundu uno, owa Abayahudi boosi abali hano nende abali Yerusalemu bamwinjililanga itookho khwisie. Bakhupanga obuyoka mbu shiakhoyile okhutsiililila okhubaho omulamu tawe.

²⁵Nebutswa isie shinyoolilekhwo muye likhuwa elia yakhola eliakhachila akhalachilwe okhufwa tawe. Ne shichila ye omwene yareebile okhutsia okhuyaasibwa imbeli womuruchi wa Roma, emalile okhumuruma atsie khuye.

²⁶Nebutswa isie shindikhwo nende likhuwa lichoomeshe khuye eliandakhahandichila omuruchi wa Roma tawe. Kho emurerile hano imbeli wenywe, ne okhushila muno imbeliwo, iwe omuruchi Aguripa! Kho mbu nikhwakhanoonelesia amakhuwake, enyala okhuba nende eliandakhahandika.

²⁷Okhuba kandoleshelanga nikali akobusilu okhuyila omubohe imbeli womuruchi wa Roma, ne nelamanyia habulafu aka bamwinjililangakhwo ta.”