Read wanga EBIKHOLE BIA ABARUME 26 Bible Online

EBIKHOLE BIA ABARUME 26 - wanga bible

EBIKHOLE BIA ABARUME 26

¹Mana Aguripa naboolela Paulo ari, “Osubulwe okhuboola, kho witerere omwene.” Paulo naye nachinguula omukhonokwe ikulu niyeterera omwene naboola ari,

²“Omuruchi Aguripa! Isie omwene ndibasia okhuba oweikhabi inyanga yino okhuba endi imbeliwo khulwokhuboola omwene ninditerera khumakhuwa koosi aka Abayahudi banzinjililangakhwo itookho.

³Shinga omwene omanyile obulayi ebiima ebia Abayahudi nende oburambani bwabwe, Kho ekhusaaya mbu wisimilisie okhuurecheresia.

⁴“Abayahudi boosi bamanya okhwichendelesia khwanje okhurula mububuukha bwanje. Bamanyile tsinjila tsiandamenyelamwo obulamu bwanje bwosi, olwambeli nendi mushialo shianje shiene, ne olunyuma nendi mu Yerusalemu.

⁵Bamanyile khulwa eshise eshiraambi, nibenya banyala okhuhaana obuloli mbu okhurula olwambeli lwene, isie ndamenya shinga omusanji weing'anda eyilindanga amalako akeidiini yefwe eya Abafarisayo obutinyu.

⁶Ne bulano esinjiile hano khulwokhuyaasibwa khulwa obunaayi obwa endi ninabwo mubusuubisie bwene obwa Nyasaye yahelesia abakuuka befwe.

⁷Obusuubisie bwatsana obwetsimbia ekhumi natsibili tsiabandu befwe banaayanga okhunyoola, olwa bamwinamilanga Nyasaye eshilo neshiteere. Kho owoluyali, Abayahudi bano banzinjililanga itookho imbeliwo khulwa okhubeela obunaayi buno.

⁸Nishiina eshiakhachila inywe abali hano mwakhaywa okhusuubila mbu Nyasaye alamusinjia abafu?”

⁹“Isie mwene ndapaara mbu, okhuula ekhole akenyala koosi okhufukula amechesio ka Yesu wa Nazareti.

¹⁰Akenako niko akandakhola mu Yerusalemu. Ndanyoolanga obunyali okhurula khubesaaliisi abakhulundu mana emboha abasuubili mumbohe, ne olwa bakhalachilungwa okhufwa, isie siesi ndafuchililanga mbu berwe.

¹¹Akhandi akhanji ndachilanga nibanyaasibwa mutsisinagogi, nindeema okhubahachia mbu, bekaane obusuubili bwabwe. Ndali noburuma obunji khubo, mbu kata ndatsia mubialo ebicheni okhubasandiayo.

¹²“Kano niko akachila ninzia Damasiko nobunyali nende amalako okhurula khubesaaliisi abakhulundu.

¹³Iwe owoluyali, ndali nindi khunjila mushiteere hakari, ne nindola obulafu obwakha okhushila obweliuba niburula mwikulu mana nibunzashila tsimbeka tsiosi nibumbotokhana halala nende abandali ninabo khuluchendo olwo.

¹⁴Fwesi pe khwakwa hasi, ne nimbulila omwoyo okhurula mwikulu nikumboolela muluheburania kuri, ‘Saulo, Saulo! Usandinjia mbushiina? Wisalisinjia omwene butswa shinga ing'ombe eyiratsa eshibambo.’

¹⁵Nasi nireeba endi, ‘Niwe wina, Omwami?’ Naye Omwami niyangalusia ari, ‘Nisie Yesu owa osandinjia.

¹⁶Nebutswa buukha osinjile. Ekhulolesheele kho mbu ekhwahule obe omukhalabani wanje. Ne okhurula bulano okhuula oboolele abandi aka oluutsi olwaleelo, nende aka nekhumanyie olunyuma.

¹⁷Ndalakhuhonokosia okhurula mumakhono kabandu ba Isiraeli nende okhurula khubamahanga aba nekhurumekhwo.

¹⁸Olabatimbula tsimoni tsiabwe, nobarusia mushiilima okhwitsa mubulafu nende okhurula mubunyali bwa Setani okhwitsa khu Nyasaye, kho mbu okhubirira mubusuubili bwabwe mwisie, baleshelwe obwonooni bwabwe, mana banyoole obwikhalo bwabwe halala nende abaahule ba Nyasaye.’

¹⁹“Khulweshio, omuruchi Aguripa, shindakhalobile lilolelo eliandanyoola okhurula mwikulu tawe.

²⁰Ndachachila Damasiko nende Yerusalemu mana okhuula mu Yudea mwosi nende mubamahanga, niyaalanga mbu okhuula bekalukhasie okhurula mubwonooni bwabwe, nibakalushila Nyasaye, mana bakhole ebikhole ebimanyia mbu bekalukhasiye.

²¹Nikhulweshifune shino eshiachila Abayahudi nibandila olwa ndali nindi muhekalu, nibenya okhunzira.

²²Nebutswa Nyasaye yaakhoonya okhuula khunyanga yino, ne kho esinjiile hano, okhuhaana obuloli bwanje khuboosi, abatiiti nende abakhongo. Emboolanga amakhuwa malala kabalakusi nende Musa baboola mbu kalikholekha;

²³mbu, okhuula Kristo anyasibwe mana abe owambeli okhulamukha okhurula mubafu, okhurumbula obulafu bwobuhonia khu Abayahudi nende khu abamahanga.”

²⁴Ne olwa Paulo yaboola niyeterera munjila yino, Fesito yamuyibila obutinyu ari, “Iwe Paulo, olalushe noho? Okhusomakhwo okhunji khukhukholile okhulalukha.”

²⁵Nebutswa Paulo yakalusia naboola ari, “Shiendi omulalu ta, owoluyali Fesito! Isie emboolanga amakhuwa akatoto, ne endi habwene.

²⁶Omuruchi Aguripa! Isie enyala okhuboola ninawe neyitswoni amakhuwa kano, shichila okamanyilisiye obulayi bwene, okhuba emanyile elala mbu, omanyile buli elala khuko, okhuba shikali amakhuwa akekholekha mabiswi tawe.

²⁷Omuruchi Aguripa, iwe osuubilanga mubalakusi noho ta? Emanyile mbu wabasuubila!”

²⁸Aguripa nakalusia Paulo ari, “Opaaranga mbu mushise shitiiti shino onyala okhuukhola okhukwa omukristo?”

²⁹Paulo namukalusia ari, “Shibe eshise eshitiiti noho eshiraambi, amasaayo kanje khu Nyasaye kali mbu, iwe nende inywe mwesi abaarecheresinjia inyanga yino munyale okhuba shinga olwa isie endi, halali shimusaayilanga mbu mube ababohe shinga isie endi tawe!”

³⁰Mana omuruchi, omukafuna, Berenike, nende abandu abali nibekhale nibasinjila,

³¹ne olwa bali nibarulangaho baboolelana abeene khubeene bari, “Omundu uno shiakholilekhwo eshindu eshichila akhalachilwe okhufwa noho okhubohwa tawe.”

³²Kho Aguripa naboolela Fesito ari, “Omundu uno alaba mbu shiyareeba okhuyilwa imbeli womuruchi wa Roma ta, yakhalekhuulilwe.”