Read wanga EBIKHOLE BIA ABARUME 27 Bible Online

EBIKHOLE BIA ABARUME 27 - wanga bible

EBIKHOLE BIA ABARUME 27

¹Ne olwa kabisibwa mbu khukhoyile okhutsiila mumeeli okhuula Italia, bahaana Paulo nende ababohe bandi khumusinjilili welihe Juliasi oweing'anda eya eshiroma eyilangwa mbu, “Ing'anda eyilindanga Omuruchi.”

²Khwanina mumeeli eyali niyirula Aduramitio niyirechekhwe okkhutsia khumataala akali khulukuku lwa Asia. Mana nikhuchaaka oluchendo. Arisitariko, omumakedonia okhurula Tsesalonika yali ninefwe.

³Inyanga yalondakhwo nikhuula Sidoni. Juliasi oyo yakholela Paulo aketsimbabasi namuhelesia obwiyangu okhutsia okhulola abetsabe, kho mbu bamuhelesia ebia yali natakhanga.

⁴Khwarula habwene yaho nikhutsiililila, ne khulwa okhuba omuyeka kwali nikuhutsanga okhurula imbeli wefwe, khwabirira elubeka lweshikhalachinga shia Kupuro.

⁵Khwakhalasia inyanza nikhubirira Kilikia nende Pamufilia nikhuula Miira, litaala elili Likia.

⁶Habwenaho omusinjilili welihe oyo yanyoola imeeli eya Alekisanderia eyali niyitsitsanga Italia, mana nakhuramwo.

⁷Khwatsia kalaha khulwetsinyanga tsinyinji nikhunyakhana muno, mana nikhuula mwitaala lia Nido. Omuyeka shikwakhufuchilila okhutsilila okhutsia imbeli ewa khwali nikhuhenjile tawe, kho khwamala nikhulondoola khushikhalachinga shia Kirete, nikhubirira aha hengane nende Salumone.

⁸Khwaloonda olukuku ne nikhuula habundu ahalangwa mbu, “Inyambukho Indayi,” ahambi nende litaala lia Laseya.

⁹Khwamalaho tsinyanga tsinyinji okhuula olwa kalolekha mbu, bulaba obutinyu okhutsiililila noluchendo, shichila inyanga eyokhuhoonga inzala yali niyimalile okhubira. Kho Paulo nabachetsiyia,

¹⁰naboola ari, “Abashianje, endolanga oluchendo lwefwe olwa khurula hano nikhutsiililila niluli lwamaraba amanji; imeeli niyonooneshe kata nende emisiko chiayo kata fwesi nakhukosie obulamu bwefwe.”

¹¹Nebutswa omusinjilili welihe yarecheresia aka mwene imeeli nende owokhuchiyila baboola, ne nalalonda aka Paulo yaboola tawe.

¹²Inyambukho eyo shiyali indayi eyokhwikhalamwo munyanga tsiomunyiri omunji tawe; kho abandu abanji benya mbu nikaba nikanyalikha khusumushe okhurulaho mana khutsie okhuula Foinike, kho kachile khwikhaleyo tsinyanga tsiomunyiri. Foinike neinyambukho eya Kirete eyokhutsia emulambo nende mumbo nende khandi emasaba nende ebukwe.

¹³Omuyeka omututu kwahutsa okhurula emulambo, ne abandu nibapaara mbu banyala okhutsiililila nende aka bali nibaloosiye okhukhola, kho bamala nibakhwesa ebiralisio bieimeeli mana nibaloonda ahambi nende olukuku lwa Kirete.

¹⁴Nebutswa lwangu olwo imbumbuyeka ikhongo eyilangwa mbu, “Eyemasaba okhutsia ebukwe,” yahutsa okhurula khushikhalachinga eshio.

¹⁵Yahutsa khumeeli eyo obutinyu, kho bwali obutinyu okhutsia oweyimbumbuyeka yali niyirulanga, khwakhaywa okhuchoomiayo imeeli nikhulekha omuyeka okhuyila imeeli ewakwali nikuhenjile.

¹⁶Eshikhalachinga shindi eshilangwa mbu, Kauda shiakhushinjililakhwo hatutu okhurula khumbumbuyeka eyo. Olwa khwabirira mumbafu mwashio khwalikhwo nomulembe kata nikhwanyakhana nebutswa khwanyalilwa okhuhonokosia imeeli.

¹⁷Nibachikhweesa nibachiboha obutinyu nemikoye. Bali noburi mbu haundi bakhetsukhana nibetuya mumuyeshe kwokhulukuku lwa Libia, kho nibeeshia hasi tsinanga mana imeeli neyilwa butswa yirio nomuyeka.

¹⁸Imbumbuyeka eyo yatsiililila, kho khunyanga eyaloondakhwo bachaaka okhufuuba emisiko chindi echieimeeli mumaatsi.

¹⁹Ne khunyanga yalondakhwo nibafuuba ebimanulwa bindi ebiomumeli mumaatsi.

²⁰Khulwetsinyanga tsinyinji shikhwalolakhwo eliuba noho tsing'ining'ini tawe. Nebutswa imbumbuyeka eyo yatsiililila butswa okhuhutsa obutinyu. Mana nikhufwa omwoyo, shikhwalikhwo nobunaayi bwokhuhonokokha tawe.

²¹Ne olunyuma lwabandu okhumenya inzala tsinyanga tsinyinji, Paulo yasinjila imbeli wabwe mana naboola ari, “Abashianje, muba nimwarecheresia khane shimwakharulile Kirete tawe, khane shikhwakhanyoolile amatinyu kano nende okhukosia ebindu bino tawe.

²²Nebutswa bulano emusaaya mbu, mume ikholo! Shialiho kata mulala khwinywe oulakosia obulamubwe ta, habula imeeli yonyene niyo eyilatiba.

²³Okhuba mushilo shibele, omumalaika wa Nyasaye wanje khandi owa ndinamilanga, yanzitsilekhwo,

²⁴mana niyamboolela ari, ‘Paulo olaria tawe! Okhuula osinjile imbeli womuruchi wa Roma. Ne khulwa obulayi bwa Nyasaye khwiwe ahoniye obulamu bwa abandu bano boosi abali ninawe khuluchendo.’

²⁵Kho mume ikholo! Shichila esuubila mu Nyasaye mbu kalekholekha butswa kario shinga olwa embooliilwe.

²⁶Ne butswa imbumbuyeka yino yilakhuyila okhuula khushikhalachinga shindi.”

²⁷Ne shiali eshilo eshiekhumi nakhane imbumbuyeka niyikhuchesinjia eyi nende eyi munyanza ya Adiria. Ahambi mushilo hakari abakholi bomumeeli bapaara mbu khuli ahambi okhuula khulukongo lweinyanza.

²⁸Kho nibeshia mumaatsi omukoye okubohelwekhwo eshindu eshisiro, nibanyoola mbu, netsimita amakhumi kane okhutsia hasi. Olunyumakhwo nibakhola bario khandi nibanyoola mbu netsimita amakhumi kataru okhutsia hasi.

²⁹Nibaria mbu haundi imeeli yakhetuya khutsinyanda, kho nibamala nibeshia hasi ebiralisio bine inyuma weimeeli, mana nibasaaya mbu bushie bwangu.

³⁰Mana abakholi bomumeeli nibateema okhwilukha okhurula mumeeli nibeshia eliaro mumaatsi nibekaatia mbu batsitsanga okhwishia ebiralisio bindi mumaatsi imbeli weimeeli.

³¹Nebutswa Paulo yaboolela omusinjilili welihe nende abelihe ari, “Abakholi bomumeeli nibalalimwo ta, mulasuubila mbu, mulahonokokha tawe.”

³²Kho abelihe nibakhalaka emikoye echiali nichitiilile eliaro nibalilekha nilitsia.

³³Kho olwa bwali nibuli ahambi okhushia, Paulo yabasaaya okhulia eshiokhulia, naboola ari, “Khulwa tsinyanga ekhumi natsine, mushili okhuliakhwo eshindu shiosi shiosi ta.

³⁴Kho nimuchama muliekhwo eshiokhulia; nobulayi muliekhwo kho mube abalamu, shichila kata liswi eliokhumirwe chienywe shililakorakhwo tawe.”

³⁵Olwa Paulo yamala okhuboola ario, ye omwene yabukula omukaate nakhupila Nyasaye orio, imbeli wabwe boosi, nakusonyola, ne nachaaka okhulia.

³⁶Nibooma ikholo, mana buli shiamulala khubo nalia eshiokhulia.

³⁷Fwesi halala abakhwali mumeeli eyo, khwali abandu ebikhumi bibili amakhumi musafu nende basasaba (276).[11]

³⁸Olwa boosi bamala okhulia nibekura, nibanguyia imeeli khulwa okhufuuba ingano yosi munyanza.

³⁹Ne olwa bwashia abakholi bomumeeli shibalola olukuku tawe, balola omukhono kweinyanza nende olukuku lwomuyeshe mana nibapaara mbu, nikaba nikanyalikha benjisie imeeli mubwenomwo.

⁴⁰Kho nibakhalaka ebiralisio nibabilekhuula mumaatsi nibiyinikha hasi, khandi nibateendeyia emikoye echiebilunjisio. Nibabaambuula tsinanga tsieimbeli weimeeli kho mbu omuyeka kubachoomie khulukuku olwo.

⁴¹Nebutswa imeeli yetuya khumuyeshe okwokhulukuku, ne niyiritsilamwo, mana imbeli weimeeli niyihaanda hasi, niyilanyalilwa okhusita tawe, ne inyuma weimeeli nayo niyirabulwa namarunda akali namani muno.

⁴²Abelihe nibakaasia shinga olwa bakheera ababohe boosi, kho mbu baleshe okhwelema nibatsia khulukuku mana beluushe.

⁴³Nebutswa omusinjilili welihe yenya okhuhonia Paulo, kho nabakaya mbu, balakhola bario tawe. Mushilenje shiako yalaka abandu boosi abamanya okhwelema baranjilile okhukwa mumaatsi, beeleme okhuula khulukuku.

⁴⁴Mana abandi boosi baloondekhwo, nibatiilile khutsimbao tsieimeli etsiali nitsifunishe. Kho nolwa fwesi khwahonokokha nikhuula khulukuku mumulembe.