Read wanga EBIKHOLE BIA ABARUME 3 Bible Online

EBIKHOLE BIA ABARUME 3 - wanga bible

EBIKHOLE BIA ABARUME 3

¹Inyanga yindi Petero nende Yohana batsia muhekalu tsisaa shienda tsieshiteere ebise biamasaayo.

²Hashilibwa shiehekalu eshilangwa mbu, “Eshilibwa Eshilayi,” yaliho omundu owali omulema okhurula olwa yebulwa. Buli nyanga bamuchinganga nibamureera hashilibwa yaho okhusaba saba amapesa okhurula khwabo abenjilanga muhekalu.

³Ne olwa yalola Petero nende Yohana nibenjilanga muhekalu, yabasaba mbu bamuhelesiekhwo eshindu shiosi shiosi.

⁴Boosi nibamurangala, mana Petero namuboolela ari, “Khuhenjekhwo!”

⁵Mana nashiukhana nabahengakhwo, napaara mbu, balamuhelesiakhwo eshindu.

⁶Petero namuboolela ari, “Shiendikhwo namapesa koosi koosi ta, nebutswa ndalakhuhelesia eshiendi ninashio. Muliira lia Yesu Kristo owa Nazareti, ekhulaka mbu, sinjila ochende!”

⁷Mana Petero namutiila omukhonokwe musaatsa namukhonyelela okhusinjila. Habwene nahabwene ebilenje biomundu oyo nende tsikhong'ositsie nibinyoola amaani.

⁸Nasila ikulu, nasinjila, mana nachaaka okhuchenda. Mana niyenjila muhekalu ninabo, nachendanga nende okhuruma niyetsoomia Nyasaye.

⁹Mana abandu abalimwo nibamulola nachendanga niyetsoomia Nyasaye.

¹⁰Olwa bamanyilisia mbu niye omusabi sabi wikhalanga “Hashilibwa eshilangwa mbu Eshilayi,” boosi bahuka khandi nibachenya khu akali nikamwikholeshekhwo ako.

¹¹Ne lwomundu tsana oyo yali nashihandile khu Petero nende Yohana, abandu boosi nibashing'ang'alile bario, bakhung'ana halala mushikoro eshilangwa mbu, “Eshisika shia Solomoni.”

¹²Ne olwa Petero yalola abandu abo, yababoolela ari, “Abaisiraeli bashianje, eshichilanga namuhuchusibwa khukano nishiina? Eshichilanga nimukhurangala murio nishiina? Mupaaranga mbu, omundu uno achendile khuwa obunyali bwefwe noho eshilongoole shiefwe noho?

¹³Nyasaye wa Aburahamu, Isaka nende Yakobo, ouli Nyasaye owabakuuka befwe, niye ouchingulile oluyali lwomukhalabaniwe Yesu. Nebutswa inywe mwamuhaana khubaruchi, nimumwikana imbeli wa Pilato, kata olwa Pilato yali niyenyanga okhumulekhuula.

¹⁴Yali omutakatifu khandi omulunjishi, nebutswa inywe mwamuloba, mushilenjeshie nimureeba Pilato okhumulekhulila omwiri.

¹⁵Mana nimwiira oyo ouli eshisina shiobulamu bwatoto, nebutswa Nyasaye yamulamusia okhurula mukhufwa. Ne ifwe khuli abaloli khumakhuwa ako.

¹⁶Eliira lia Yesu nende okhusuubilila mulio, nibio ebihelesiye omulema uno amaani, owamulolanga khandi owamwamanya uno. Obusuubili muliira lia Kristo nibwo obumuhoniye khandi nibumukhola okhuba omulamba shinga olwa mulolanga nali ario.

¹⁷“Ne bulano, baana befwe, emanyile mbu, aka inywe nende abemilisi benywe mwakholela Yesu, mwakhola mukhukorwa.

¹⁸Nyasaye yaranjilila okhuboola khale okhubirira mubalakusibe boosi mbu, okhuula Kristowe anyasibwe, mana nakakhola okhuusibwa munjila eyo.

¹⁹Khulweshio, bulano mwikalukhasie nimukalukha khu Nyasaye kho mbu, amuleshele obwonooni bwenywe. Nimwakhakhola murio,

²⁰ebise bitsanga ebia mulanyoola amaani aka Roho omutakatifu okhurula khu Omwami, naye alaruma Yesu ouli Kristo, owa yamala okhumwahulila inywe khale.

²¹Alamenya mwikulu okhuula olwa eshise shiliula eshia ebindu biosi bilikholwa ebiyia, shinga olwa Nyasaye yaranjilila okhuboola khale okhubirira mubalakusibe abatakatifu abaliho.

²²Okhuba Musa yaboola ari, ‘OMWAMI Nyasaye wenywe, yakhamurumile omulakusi okhurula mubandu benywe beene shinga olwa yaaruma isie. Mulimuhulila shinga olwa mumbulilanga isie.

²³Omundu yesi yesi oulikhaya okhuhulila amakhuwa akomulakusi oyo, alirusibwa mubandu ba Nyasaye, ne nasasibwa.’

²⁴Ne abalakusi boosi abali noburume, okhuchaachila khu Samweli nende abo abetsa olunyuma, boosi barumbula khuketsinyanga etsio.

²⁵Aka Nyasaye yasuubisia okhubirira mubalakusi kali khwinywe, nenywe musanganga mundakano eya Nyasaye yakaasia nende abakuuka benywe. Shinga olwa yaboolela Aburahamu ari, ‘Okhubirira mubolwibulolwo, ndalalaamila abandu bokhushialo boosi tsikhabi.’

²⁶Kho Nyasaye yalobola omukhalabaniwe, ne naranjilila okhumuruma khwinywe mbu, amulaamile inywe tsikhabi khulwa okhukhola buli mulala khwinywe okhwikalukhasia okhurula mubwonooni.”