Read wanga EBIKHOLE BIA ABARUME 5 Bible Online

EBIKHOLE BIA ABARUME 5 - wanga bible

EBIKHOLE BIA ABARUME 5

¹Nebutswa omusaatsa undi yaliho oulangwa mbu Anania, ne omukhasiwe yalangwa mbu Safira. Bakusia emiandu chiabwe,

²mana Anania nafuchilisania nomukhasiwe mbu, abiishekhwo amapesa kandi, ne akandi ayilile abarume.

³Kho Petero namureeba ari, “Anania, mbushiina nofuchilila Setani okhukhwimilila nachila nobeeya Roho Omutakatifu khulwa okhubiikha amapesa kandi akokusiye mumukundakwo?

⁴Olwa obeele noshili okhukusia omukunda okwo, kubeele okukwo, ne kata lwobeele niwakhakukusia, amapesa kabeele akoko. Kho eshichilile nokhola likhuwa shinga elo nishiina? Shiobeeyile abandu ta, habula obeeyile Nyasaye!”

⁵Mana olwa Anania yahulila amakhuwa ako, yakwa hasi ne nafwa. Mana abandu boosi abahulilakhwo amakhuwa ako, batiilwa noburi.

⁶Mana abasiani abaraaka nibetsa, nibamukanyila musanda, nibamuchinga nibatsia nibamuyabila.

⁷Olunyuma lwatsisaa hambi tsitaru, omukhasiwe yesi niyenjilamwo nalamanyile akali nikekholeeshe tawe.

⁸Mana Petero namureeba ari, “Mboolelakhwo, kano niko amapesa koosi aka iwe nende omusaatsawo munyoolile khulwa okhukusia omukunda kwenywe?” Naye nakalusia naboola ari, “Toto mwene kabeele kario.”

⁹Naye Petero namureeba ari, “Eshichilile iwe nende omusaatsawo nimufuchilisania okhuteema Roho owa Omwami nishiina? Lola, abaraaka abakhayabila omusaatsawo bulano, nibo abali hamuliango abo, nawe wesi balakhuchinga nibakhuyila elwanyi!”

¹⁰Habwene nahabwene nakwa mubilenje bia Petero ne nafwa. Abaraaka abo nibetsamwo nibalola mbu afwile, kho nibamuchinga nibamurusia elwanyi, mana nibamuyabila halubeka nomusaatsawe.

¹¹Abelikanisa boosi, nende abandi boosi abahulilakhwo amakhuwa ako batiilwa neindenga ikhongo.

¹²Abarume bakhola akamakana nende akokhuhuchisia amanji mubandu. Abasuubilibi boosi bakhung'anilanga mushikoro shia Solomoni.

¹³Ne abandu bandi boosi shibatsalikha okhwitsoka mubo tawe, kata kario abandu abanji babetsoomia.

¹⁴Nebutswa abandu abanji bameetekha khung'anda yabasuubili, omukanda okwa abasaatsa nende abakhasi abali nibasuubile mu Omwami.

¹⁵Okhulondana nende ebikhole ebia bali nibakholanga, abalwale bachingwa nibayilwa khunjila nibalisibwa khubitali nende khumayambo kho mbu, olwa Petero aba nabiranga aha bali, eshiinikha shibirekhwo butswa khubalala khubo.

¹⁶Mana emikanda chiabandu chietsa nichirula mumataala akarondokhane nende Yerusalemu nibareeranga abalwale babwe nende abo abebishieno biali mubo, mana boosi nibahonibwa.

¹⁷Nebutswa Omwisaaliisi Omukhulundu halala nende boosi aba yali ninabo, nibo abasanji bomukanda okwa Abasadukayo, nibatilila abarume imbalikha.

¹⁸Kho nibatiila abarume, nibabayila mumbohe yabandu boosi.

¹⁹Nebutswa mushilo eshio omumalaika owa Omwami yekula emiliango mumboye eyo, mana nabarusiamwo nababoolela ari,

²⁰“Tsie musinjile muhekalu, muboolele abandu amakhuwa koosi akobulamu obuyia buno.”

²¹Abarume nabo bahulila nibalonda akababoolelwa, mana nibenjila muhekalu obukwe nibushebanga, ne nibachaaka okhwechesia. Omwisaaliisi Omukhulundu nende aba yali ninabo betsa nibakhung'asia abakofu abeshiina eshia Abayahudi boosi; kho nibarumasia amakhuwa mumbohe mbu, abarume barelwe imbeli wabwe.

²²Nebutswa olwa abakhongo abo batsia mumbohe eyo shibanyoolamwo abarume tawe, kho nibakalukha khubeshiina nibababoolela bari,

²³“Olwa khuulile mumbohe, khunyoolile niyikalwe habwene obutinyu, nabo abalindi bayo boosi nibasinjiile hamiliango nibali meeso; nebutswa olwa khwikuule emiliango echio, shikhunyoolilemwo omundu kata mulala tawe!”

²⁴Olwa abesaaliisi abakhulundu nende omukhongo wabalindi aba Ihekalu bahulilakhwo kano, bahuchisibwa khu akali nikekholeshe khubarume abo.

²⁵Mana omusaatsa undi niyetsamwo nababoolela ari, “Rechelesie! Abandu bamwareele mumbohe bali muhekalu bechesinjia abandu!”

²⁶Kho omukhongo wabalindi oyo natsia nabalindi mana nibareera abarume imbeli weshiina. Yabareera ahalali amahababa koosi ta, shichila baria mbu haundi abandu bakhabalasa namachina.

²⁷Benjisia abarume mukari, mana nibabasinjisia imbeli weshiina, kho Omwisaaliisi Omukhongo nabareeba ari,

²⁸“Ifwe khwamulachilisia obutinyu mbu, mulechesiakhwo muliira eliomundu uno khandi ta, nebutswa lolekhwo aka mukholile! Mutswaniye amechesio kenywe kano mu Yerusalemu mwosi, mana khandi mwenyanga okhukhurakhwo eshikha shiokhufwakhwe!”

²⁹Nebutswa Petero nende abarume bashie babakalusia bari, “Khukhoyile okhuhulila aka Nyasaye okhushila akabandu.

³⁰Nyasaye owa abakuuka befwe, yalamusia Yesu okhurula mukhufwa, olunyuma lwa inywe okhumubamba khumusalaba.

³¹Nyasaye yamuchinguula namura khumukhonokwe omusaatsa okhuba omwimilisi khandi omuhonia, okhuhelesia abandu aba Abaisiraeli obwiyangu obwokhwikalukhasia baleshelwe obwonooni bwabwe.

³²Ne ifwe nende Roho Omutakatifu ouli eshihaanwa shia Nyasaye khwabo aba muhulilanga khuli abaloli abamakhuwa kano.”

³³Ne olwa abeshiina bahulila bario, basinyikha po, ne nibakhalaka mbu abarume abo berwe.

³⁴Nebutswa mulala khubeshiina Omufarisayo owalangwa mbu Gamalieli, owali omwechesia wamalako, khandi niyahebwa oluyali nabandu boosi, yasinjila mushina. Yalachilisia mbu abarume abo barusibwe elwanyi.

³⁵Mana naboolela abeshiina ari, “Abaisiraeli bashianje, henjelesie obulayi akamwenyanga okhukholela abandu bano.

³⁶Mwitsulila mbu munyanga etsiabirilekhwo omundu mbu Tseuda yabukha niyeyitsialanga mbu nomundu omukhongo, mana abandu abanji abahela ahambi ebikhumi bine (400), nibamuloondakhwo. Nebutswa yamala yeerwe, nabo abalondibe boosi nibasalasibwa, mana omukandakwe nikukhamulukha.

³⁷Olunyuma lwomwene uno Yuda Omugalilaya yabukha munyanga tsiabandu okhubasibwa nakhung'asia omukanda omukhongo nikumuloondakhwo, nebutswa yesi khandi yamala yeerwa, nabo abalondibe boosi nibasalasibwa.

³⁸Khulweshio khumakhuwa kabandu bano emuboolela mbu, mulabakhalachilekhwo likhuwa liosi tawe; baleshe butswa babe bario. Ne nikaba mbu akabakasiye nende akabakholanga nakabandu nabandu kalakhamuukha kario,

³⁹nebutswa nikaba mbu, karulanga khu Nyasaye shimwakhanyala okhukasasia tawe. Mwakhanyoolekha nimulwananga nende Nyasaye!” Abeshiina bamala nibalonda amebaalo aka Gamalieli.

⁴⁰Bamala nibalanga abarume abo mukari nibabanywekha nende okhubakania obutinyu mbu, balaboolakhwo likhuwa liosi muliira lia Yesu khandi tawe, mana nibabalekhuula.

⁴¹Mana abarume abo nibarula mushina nibekhoyanga po, shichila Nyasaye yali nababasiye mbu nabakhoyeele okhufwolwa khulwa eliira lia Yesu.

⁴²Kho buli inyanga batsiililila okhwechesia muhekalu nende mutsingo tsiabandu Amakhuwa Amalayi aka Yesu mbu, niye Kristo.