Read wanga EBIKHOLE BIA ABARUME 6 Bible Online

EBIKHOLE BIA ABARUME 6 - wanga bible

EBIKHOLE BIA ABARUME 6

¹Tsinyanga nitsihwelekhwo, abeechi batsiililila okhumeetekha, ne obusoolo nibubaho hakari wa Abayahudi abalomalomanga olugiriki nende Abayahudi abalomalomanga Oluheburania. Abayahudi abalomalomanga olugiriki beyiniakana mbu, abakhasi abalekhwa abelubeka lwabwe shibahebungwa omukabo kwobukhonyi kwa buli inyanga tawe.

²Kho abarume ekhumi nababili abo nibakhung'asia omukanda kwabasuubili halala nibababoolela bari, “Shibuli obulayi ifwe okhulekha okhuyaala likhuwa lia Nyasaye kho mbu khukabe abandu omukabo kwobukhonyi tawe.

³Khulweshio abaana befwe mwahule abandu musafu mwinywe, abamanyikha obulayi mbu betsulwamwo Roho Omutakatifu, nabachesi khandi nabeifuma indayi. Nefu khulabalaraho okhukhola omulimo kuno.

⁴Kho nefu khwikhoonyele obwiyangu bwefwe khulwa okhusaaya nende okhuyaala Injiili.”

⁵Omukanda kwosi kwasangalila kabarume baboola, kho nibaahula Sitefano, omundu owali nobusuubili obunji, khandi niyetsulamwo Roho Omutakatifu, nende Filipo, Porokoro, Nikanori, Timoni Paramena nende Nikolau owokhurula Antiokia, owali niyakalukhana naloondanga idiini ya Abayahudi.

⁶Omukanda okwo nikubahaana abandu abo khubarume, nabo nibabasaayila nibabarakhwo amakhono.

⁷Kho likhuwa lia Nyasaye nilimeeta okhutswana. Ne abeechi nibameetekha mu Yerusalemu. Abesaaliisi abanji nibafuchilila obusuubili obwo.

⁸Mana Sitefano niyetsulwemwo obukoosia bwa Nyasaye nende obunyali, yakhola akamakana amanji nende akokhuhuchisia mubandu.

⁹Nebutswa abandu bandi abomukanda okwa “Isinagogi ya Abalekhuule,” bayingana nende Sitefano. Bali Abayahudi okhurula Kurene nende Alekisanderia, abandi barula Kilikia nende Asia.

¹⁰Nebutswa Roho yahelesia Sitefano obuchesi kho mbu, olwa yaboolanga ninabo, shibanyalilungwa okhumufukula tawe.

¹¹Kho bahombelesia abandu bandi mumasilisi okhuboola bari, “Khumuhuliile omwene naboola amanyeko khu Musa nende khu Nyasaye!”

¹²Munjila yino bayakulula abandu, abakofu nende abechesia bamalako. Mana nibatiila Sitefano nibamuyila imbeli wabakofu beshiina.

¹³Mana nibareera abandu okhuboola akobubeeyi bari, “Omundu uno buli lwosi afukulanga Ihekalu yefwe indakatifu nende amalako ka Musa.

¹⁴Khumuhuliile naboola mbu, Yesu wa Nazareti oyo alilikulula Ihekalu yino khandi alikalukhasia emilukha chiosi echia khwahebwa okhurula khu Musa.”

¹⁵Abandu boosi abali nibekhale mushiina barangaala tsimoni tsiabwe khu Sitefano, ne nibalola obwenibwe nibufwana shinga obweni bwomumalaika.