Read wanga EBIKHOLE BIA ABARUME 7 Bible Online

EBIKHOLE BIA ABARUME 7 - wanga bible

EBIKHOLE BIA ABARUME 7

¹Mana omwisaaliisi omukhongo nareeba Sitefano ari, “Aka abandu bano baboolanga khwiwe nakatoto noho?”

²Naye Sitefano nakalusia ari “Baana befwe nende Bapapa banje, recheresiekhwo. Nyasaye owoluyali yaloleshela kuuka wefwe Aburahamu olwa yali Mesopotamia nashiili okhutsia okhumenya Harani.

³Mana namuboolela ari, ‘Rula mubandu bolwibulolwo nende abomushialoshio otsie mushialo eshia ndalakhumanyia.’

⁴Kho Aburahamu narula mushialo shia Abakalidayo natsia okhumenya Harani. Olunyuma lwokhufwa khwa samwana Aburahamu, Nyasaye yamuhuyia namureera mushialo eshia inywe mumenyilemwo shino.

⁵Nyasaye shiyakabilakhwo Aburahamu eshitonye shiosi shiosi eshia eshialo eshio mbu, shibe eshishie omwene, kata likulu elala lionyene tawe. Nebutswa yamusuubisia mbu, alimuhelesia eshialo eshio, khandi mbu, shiliba eshishie nende eshiabandu abolwibulolwe abalitsa inyumawe. Olwa Nyasaye yahaana obusuubisie buno, Aburahamu shiyali nalikhwo nomwana yesi yesi tawe.

⁶Nyasaye yamuboolela ari, ‘Abolwibulolwo balimenya mushialo eshicheni, ewa balikholwa abasumba nibasandibwa khulwemiyika ebikhumi bine (400).

⁷Nebutswa ndilikhalachila abalibakhola abasumba abo eshiina, ne olunyumakhwo balirula mushialo eshio nibetsa okhunzinamila habundu hano.’

⁸Mana Nyasaye nakhola indakano nende Aburahamu, ne namuhelesia omulukha kweshishebo okhuba eshilolelo shieindakano eyo. Kho olwa Aburahamu yebula Isaka, yamusheba khunyanga yomunane, naye Isaka yasheba omwanawe Yakobo, naye Yakobo yasheba abasianibe ekhumi nababili, abali abakuuka abakhulundu aboluyia lwefwe.

⁹“Abakuuka abo batiilwa neimbalikha khu Yosefu omwana wabwe, ne nibamukusia Misiri okhuba omusumba. Nebutswa Nyasaye yali ninaye,

¹⁰namuhonokosia mukhusandibwakhwe khwosi. Ne olwa Yosefu yalolekha imbeli womuruchi wa Misiri, Nyasaye yamuhelesia obuchesi nende okhukoosibwa. Mana omuruchi nakhola Yosefu okhuba omukhongo Misiri nende khubeinzu yoburuchi.

¹¹Bulano inzala yamala niyibaho mushialo shia Misiri shiosi nende eshia Kanani, eya reera amanyakhano amanji. Abakuuka befwe nibalabakhwo neshiokhulia shiosi shiosi tawe.

¹²Ne olwa Yakobo yahulila mbu ebiokhulia bili Misiri, yarumayo abaanabe, abali abakuuka befwe khuluchendo lwambeli.

¹³Ne olwa bali khuluchendo lwakhabili, Yosefu yeebuula khubaana babwe nikachila omuruchi wa Misiri namanya oluyia lwa Yosefu.

¹⁴Kho Yosefu narumana mbu, Yakobo samwana nende abeinzuye boosi betse Misiri. Abandu boosi abetsa Misiri bali amakhumi musafu nabarano (75).

¹⁵Mana Yakobo natsia Misiri, ewa ye nende abakuuka befwe bafwila.

¹⁶Amakumba kabwe kachiingwa nikarerwa Shekemu, nikayabilwa mung'ani eya Aburahamu yali niyakula namapesa okhurula khuboluyia lwa Hamori.

¹⁷“Ne olwa indukho yobusuubisie bwa Nyasaye yetsubila Aburahamu yali niyili ahambi okhuula, abandu befwe abali Misiri bali nibameeteeshe muno.

¹⁸Olunyumakhwo, omuruchi undi oulaali niyamanya Yosefu ta, yetsa khuburuchi Misiri.

¹⁹Omwene oyo yakholela abakuuka befwe akobubatsa, nabakholela amabi nende okhubalunyia, nabahachia mbu basukune abaana babwe abatoro mbu bafwe.

²⁰Biali ebise bino ebia Musa yebulilwakhwo, yali omwana owelikondo lilayi. Yalelelwa munzu eya samwana emiesi chitaru,

²¹ne olwa yasukunwa, omukhaana womuruchi yamutoola, mana namulela shinga omwanawe!

²²Musa yechesibwa amakhuwa kobuchesi bwa Abamisiri bwosi, kho naba omundu owamaani mumakhuwa khandi mubikhole.

²³“Ne olwa Musa yali nali owemiyika amakhumi kane, lipaaro liamwitsila mumwoyokwe mbu, atsie akonyekhwo Abaisiraeli bashie, alole shinga olwa bali.

²⁴Yalola mulala khubo nanyasibungwa nomumisiri, mana natsia mbu amukhoonye. Ne khulwa okhumala eshikwoli niyeera omumisiri oyo.

²⁵(Yapaara mbu abandube beene balamanyilisia mbu, Nyasaye yali niyetsanga okhubahabina okhubirira muye kho mbu babe abalekhuule, nebutswa shibamanyilisia tawe).

²⁶Inyanga yalondakhwo yalola Abaisiraeli babili nibasoolananga, kho nateema okhubakabukhasia naboola ari, ‘Recheresie, inywe mwesi muli aboluyia lulala, eshichila nimusoolana nishiina?’

²⁷Nebutswa owali nasoolasinjia owashie oyo yasindikha Musa, namureeba ari ‘Niwiina owakhukhola iwe okhuba omuruchi khandi omukhalachi weshiina khwifwe?

²⁸Wenyanga okhunzira shinga olwa wayeerire omumisiri mukoloba noho?’

²⁹Ne olwa Musa yahulila amakhuwa ako, yelukha okhurula Misiri natsia okhumenya mushialo eshia Midiani, ebweneyo yebulilayo abaana babili abasiani.

³⁰“Emiyika amakhumi kane nichihwele, omumalaika wa Omwami yaloleshela Musa mumulilo okwakha mushitsakha mushitsiimi, ahambi neshikulu shia Sinai.

³¹Olwa Musa yalola kano yarangaala, nasita ahambi neshitsakha eshio kho mbu, ashilole obulayi. Nebutswa yahulila omwoyo okwa Omwami nikuboola kuri,

³²‘Isie nisie Nyasaye wabakuukabo, Nyasaye wa Aburahamu, Isaka nende Yakobo.’ Musa natechela khulwoburi mana nalenya okhushihengakhwo khandi ta.

³³Omwami namuboolela ari, ‘Fwalula ebilaaro ebili mubilenjebio, shichila habundu ahosinjiile hano nahabundu hatakatifu.

³⁴Enduutsi amanyakhano akabandu banje balimwo Misiri. Embuliile okhulila khwabwe, mana ndishile hasi okhubahabina. Kho bulano ekhuruma iwe Misiri.’

³⁵“Musa uno owa Abaisiraeli baloba nibamureeba mbu, ‘Owakhukhola iwe okhuba omuruchi khandi omukhalachi weshiina khwifwe niwiina?’ Niye owa Nyasaye yaruma okhuba omuruchi khandi omuhabini wabwe khulwa obunyali bwomumalaika owamuloleshela mushitsakha shiali nishiyitsanga.

³⁶Yemilila abandu abo okhurula Misiri, nakholanga akamakana nende akokhuhuchisia mu Misiri, khunyanza inzakhanyu, nende mushitsiimi khulwemiyika amakhumi kane.

³⁷Musa uno niye owaboolela abandu Abaisiraeli ari, ‘Nyasaye alimurumila omulakusi butswa shinga olwa yaruma isie, ne yakhabe mulala khubandu benywe.’

³⁸Niye owali nabandu Abaisiraeli nibakhung'anile mushitsiimi. Yaliyo nende bakuuka befwe nende omumalaika owaboola ninaye khushikulu shia Sinai, khandi nahebwa oburume bwa Nyasaye obwobulamu mbu akhuhelesie ifwe.

³⁹“Nebutswa abakuuka befwe baloba okhumuhulila, nibamufukula nibekomba okhukalukha Misiri.

⁴⁰Kho nibaboolela Haroni bari, ‘Khukasilie abanyasaye bakhwimilile shichila shikhumanyile eshikholeeshe khumundu mbu Musa, owakhureelile okhurula Misiri tawe,’

⁴¹Mutsinyanga etsio, balonga eshifwanani shieshimoosi nibashikholela emisango, mana nibahelesia oluyali eshia bali nibalonjile abeene.

⁴²Nebutswa yabalekha mana nabahaana okhwinamila tsing'ining'ini tsiomwikulu, shinga olwa kahandikwa mushitabu shiabalakusi mbu, ‘Inywe abandu ba Isiraeli! Toto nisie owamwasinzila nende okhukholela emisango khulwemiyika amakhumi kane mushitsiimi?

⁴³Inywe mwachinga liheema liomunyasaye Moloki, nende eshifwanani shieing'ining'ini yomunyasaye Refani. Bino biali ebifwanani biamwaloonga khulwa okhubinamila. Khulweshio ndalamuhuyia nemuyila mubuhambe mushialo eshili injelekha wa Babuloni.’

⁴⁴“Abakuuka befwe balinji mushitsiimi neliheema litakatifu, eliali niliakasibwa shinga Nyasaye yali niyaboolela Musa okhulikaasia, okhulondana shinga olwa yali namumanyiyie.

⁴⁵Olunyumakhwo, abakuuka befwe ababukula liheema elo okhurula khubasabwe, balichinga okhuula mutsinyanga tsia Yoshwa nibabukula eshialo eshia amahanga aka Nyasaye yalondanga nikarula imbeli wabwe. Ne liamenyayo okhuula mutsinyanga tsia omuruchi Daudi.

⁴⁶Daudi yachamisia Nyasaye, kho Daudi nareeba Nyasaye wa Isiraeli mbu, afuchilile ye amumbashile habundu hokhumenya.

⁴⁷Nebutswa Solomoni niye owamala namumbashila inzu eyo.

⁴⁸“Nebutswa Nyasaye Omukhongo Muno shiamenyanga munzu etsiombakhwa nabandu ta, shinga lwomulakusi yaboola mbu,

⁴⁹Omwami aboola ari, ‘mwikulu neshifumbi shianje shioburuchi, nashio eshialo nishifumbumbi shianje eshialambisinjiakhwo ebilenje bianje. Kho mwakhanyumbashila inzu eyambia shiina? Nihabundu shiina aha ndakhamenya?

⁵⁰Shindi nisie omwene owakaasia ebindu bino biosi?’

⁵¹“Inywe abemirwe emitinyu, aba emioyo chienywe chibulamwo obusuubili, khandi aba amarwi kenywe kalahulilanga oburume bwa Nyasaye ta! Muli butswa shinga abakuuka benywe, shichila mwesi khandi mwikalilanga Roho Omutakatifu buli lwosi!

⁵²Alikhwoho omulakusi owa abakuuka benywe balasandikha ta? Beera abarumwa ba Nyasaye abalakula khale akokhwitsa okhwa omurumwawe omulunjishi. Ne bulano inywe mwamukhoba nende okhumwiira.

⁵³Inywe ninywe abanyoola amalako Nyasaye, akahaanwa nabamalaika, ne shimwakahulila tawe!”

⁵⁴Olwa abeshiina bahulila amakhuwa aka Sitefano ako, basinyikha nibamulumasilia ameeno muburuma.

⁵⁵Nebutswa Sitefano niyetsulwemwo Roho Omutakatifu, yahenga mwikulu nalola oluyali lwa Nyasaye, naye Yesu nasinjiile khumukhono omusaatsa kwa Nyasaye.

⁵⁶Mana naboola ari, “Lole! Endolanga likulu nilikushe, ne Omwana womundu nasinjiile khumukhono omusaatsa kwa Nyasaye!”

⁵⁷Abeshina bayiiba nomwoyo omukhongo, nibasiba amarwi kabwe namakhono. Mana boosi nibasita bwangu nibamukwakhwo,

⁵⁸nibamurusia mwitookho, mana nibamulasa namachina. Abaloli balekha ebifwalo biabwe mubulindi bwomuraaka owalangwa mbu Saulo.

⁵⁹Batsiililila okhulasa Sitefano namachina, naye nasaaya nomwoyo omukhongo naboola ari, “Omwami Yesu, bukula omwoyo kwanje!”

⁶⁰Nasikama hasi mana nilila obutinyu naboola ari, “Omwami! Shiolababasiliakhwo obwonooni buno tawe!” Ne olwa yamala okhuboola ario, yakwisia omwoyo nafwa. .