Read wanga EBIKHOLE BIA ABARUME 8 Bible Online

EBIKHOLE BIA ABARUME 8 - wanga bible

EBIKHOLE BIA ABARUME 8

¹Naye Saulo nafuchilisania nokhwiirwa khwa Sitefano. Okhuchachila khu inyanga eyo, ikanisa ya Yerusalemu niyichaka okhusandibwa obutinyu. Abasuubili boosi basalasibwa mumbali tsiosi tsia Abayahudi nende Abasamaria okhuyiniakhwo abarume bonyene nibo abalasalasibwa tawe.

²Abandu abesiikwa khu Nyasaye nibayabila Sitefano khandi nibamwikhuula obutinyu.

³Nebutswa Saulo yateema okhusandia ikanisa. Yenjila mubuli inzu, natiila abasuubili boosi, abasaatsa nende abakhasi nabayila mumbohe.

⁴Abasuubili abasalasibwa batsia buli habundu nibayaalanga likhuwa lia Nyasaye.

⁵Filipo natsia mwitookho likhongo lia Samaria, ne nayaalila abandu Injiili ya Kristo.

⁶Shinga abemikanda bahulila nende okhulola akamakana aka yali nakholanga, boosi barecheresia nomwoyo mulala khu aka yali naboolanga.

⁷Ebishieno biayula nibirula mubandu abanji aba biali nibienjilamwo, khandi abemibili chiafwokoya nende abalema bahonibwa.

⁸Kho okhwikhoya okhunji nikhubaho mwitookho omwo.

⁹Yaliho omundu undi oweliira mbu, Simoni. Khulwa tsinyanga tsinyinji yakholanga obufumu mwitookho elo, ne niyeyitsiala mbu nomundu omukhongo.

¹⁰Abandu boosi abomwitookho abatiiti nabakhoongo barecheresinjia amakhuwake mana baboola bari, “Omundu uno niye obunyali bwa Nyasaye obulangwa mbu, ‘Obunyali Obukhongo.’ ”

¹¹Kho bamuhulilisinjia shichila khulwa oluhoono olurambi yabahuchisinjia nobufumubwe obwo.

¹²Nebutswa olwa basuubila oburume bwa Filipo obwa Amakhuwa Amalayi kobwami bwa Nyasaye nende eliira lia Yesu Kristo, bamala boosi nibabatiisibwa abasaatsa nende abakhasi.

¹³Kata Simoni omwene yesi yamala nasuubila, ne namalile okhubatiisibwa, yatsiililila okhuba ahambi nende Filipo, ne nahuchisibwa olwa yalola akamakana nende akokhuhuchisia akali nikakholungwa.

¹⁴Bulano olwa abarume abali Yerusalemu bahulila mbu, abandu ba Samaria bafuchiliile likhuwa lia Nyasaye, babarumila Petero nende Yohana.

¹⁵Olwa boolayo basaayila abasuubili abo kho mbu, banyoole Roho Omutakatifu.

¹⁶Shichila Roho Omutakatifu yali nashili okhwishilakhwo omundu yesi yesi khubo; bali nibabatiisibwa butswa muliira elia Omwami Yesu.

¹⁷Kho Petero nende Yohana nibabarakhwo emikhono chiabwe, nabo nibanyoola Roho Omutakatifu.

¹⁸Bulano olwa Simoni yalola mbu, abarume bahaanile Roho Omutakatifu khulwa okhura emikhono chiabwe khubasuubili, yahelesia Petero nende Yohana amapesa

¹⁹naboola ari, “Mbelesiekhwo siesi obunyali buno, kho mbu omundu yesi yesi owa erakhwo emikhono chianje anyoole Roho Omutakatifu.”

²⁰Nebutswa Petero yamukalusia naboola ari, “Iwe halala namapesako musishe busikha, shichila opaaranga mbu, onyala okhwikhoonyela amapesa okhukula eshihaanwa shia Nyasaye!

²¹Obulakhwo eshindu kata omukabo mumilimo chiefwe ta, shichila omwoyokwo shikuli omukololofu imbeli wa Nyasaye tawe.

²²Khulweshio wikalukhasie okhurula mubumayanubwo buno, mana osaaye khu Omwami mbu, nikaba kanyalikha akhuleshele khulwa okhuba nelipaaro shinga elo mumwoyokwo.

²³Okhuba enduutsi mbu oli neshikhalikhali khandi oli omubohe wobwonooni.”

²⁴Simoni nakalusia Petero nende Yohana ari, “Chame musaayile khu Omwami, kho mbu kata elala khu aka muboolile kano lilanzikholekhakhwo tawe.”

²⁵Olwa Petero nende Yohana bali nibamalile okhurusia obuloli bwabwe nende okhuyaala oburume obwa Omwami, bakalukha Yerusalemu. Khunjila nibatsitsanga bayaala Injiili mumataala amanji aka Samaria.

²⁶Omumalaika wa Omwami naboolela Filipo ari, “Wirecheshe, otsie emulambo okhubirira khunjila yomushitsiimi eyirula Yerusalemu niyitsia Gaza.”

²⁷Mana Filipo narula natsia. Ne omulate wa Etsiopia, owali omusinjilili omukhongo welibishilo liomuruchi mukhasi wa Etsiopia, yali niyetsile Yerusalemu okhwinamila Nyasaye.

²⁸Yali nakalukhanga ingo, niyekhaale mwikaarilie lieshibia. Yali nasoomanga eshitabu shiomulakusi Isaya.

²⁹Roho Omutakatifu naboolela Filipo ari, “Tsia ahambi nende likaari elo, orondokhane ninalio.”

³⁰Kho Filipo natsia tsimbilo ewa omulate oyo yali, nahulila nasoomanga mushitabu shiomulakusi Isaya. Filipo namureeba ari, “Omanyilisinjia eshisina shiamakhuwa akosoomanga ako?”

³¹Omulate oyo namukalusia ari, “Ndakhamanyilisia endie omundu nalanzinoosiye?” Mana naboolela Filipo mbu yenjile mwikaari yekhale ninaye.

³²Ne olunyaali lwa yali nasoomanga mu Amahandiko lwali mbu, “Yali shinga likondi eliyilungwa okhusinzwa, yali shinga eshimeeme shielikondi eshilaana olwa shitetwa obukoya ta, shiyaboolakhwo likhuwa liosi tawe.

³³Yanyekwa, ne nalakhalachilwa eshiina habwene ta. Abulaho oulinyala okhurumbula khukolwibulolwe, shichila obulamubwe khushialo bumalile okhuula khushiakamo.”

³⁴Omulate oyo nareeba Filipo ari, “Mboolelakhwo, niwiina owomulakusi aboolangakhwo uno? Aboolanga khuye omwene noho khumundu undi?”

³⁵Mana Filipo nachaaka okhuboola, okhuchaachila khushiasia shia Amahandiko ako, namwinoosia Amakhuwa Amalayi ka Yesu.

³⁶Olwa bali nibashitsilililanga noluchendo, boola habundu aha amaatsi kali. Mana omulate oyo naboola ari, “Amaatsi ngakano hano. Nishiina eshiakhanzikalila okhubatiisibwa?” [

³⁷Filipo namuboolela ari, “Onyala okhubatiisibwa noba nosuubila nomwoyokwo kwosi.” Naye nakalusia ari, “Esuubile mbu, Yesu Kristo niye Omwana wa Nyasaye.”][2]

³⁸Omulate oyo nalachilisia mbu, likaarilie lisinjisibwe. Mana bosi Filipo nende omulate oyo, nibekha okhurula khwikaari nibatsia mumaatsi, ne Filipo namubatiisia.

³⁹Olwa barula mumaatsi, Roho owa Omwami yarusiaho Filipo. Omukhongo oyo nalamulolakhwo khandi ta, habula yatsilila khuluchendolwe nasangaalile muno.

⁴⁰Filipo yenyoola nali Azotusi; mana nabirira mumatookho koosi nayaalanga Injiili okhuula olwa yola Kaisaria.