Read wanga EBIKHOLE BIA ABARUME 9 Bible Online

EBIKHOLE BIA ABARUME 9 - wanga bible

EBIKHOLE BIA ABARUME 9

¹Munyanga etsio Saulo yali nashisiomanga obululu okhwiira abalondi aba Omwami Yesu. Yatsia khumwisaaliisi omukhongo,

²mana nasaba mbu, ahebwe tsibarwa tsiokhumanyia abomutsisinagogi Damasiko, kho naba nanyanyoolayo abalondi aba Omwami, abasaatsa noho abakhasi abe ounyala okhubatiila nende okhubareera Yerusalemu.

³Olwa Saulo yali khunjila nali ahambi okhuula khwitookho lia Damasiko, mubwangu obulafu okhurula mwikulu bwamwashila tsimbeka tsiosi.

⁴Yakwa hasi, ne nahulila omwoyo nikuboola kuri, “Saulo, Saulo! Eshichilanga niusandia nishiina?”

⁵Naye Saulo nareeba ari, “Niwe wina Omwami?” Omwoyo okwo nikukalusia kuri, “Nisie Yesu, owa iwe osandinjia.

⁶Nebutswa buukha otsie mwitookho, ewa olaboolelwa aka okwanile okhukhola.” .

⁷Abandu aba yali nachendanga ninabo basinjila nibang'ang'alile, shichila bahulila omwoyo, ne shibalolakhwo omundu yesi yesi tawe.

⁸Saulo yabuukhaho, ne olwa yatimbula tsimonitsie shiyanyalilwa okhulola eshindu shiosi shiosi tawe. Kho nibamutiila omukhono okhumwimilila okhuula Damasiko.

⁹Ne khulwa tsinyanga tsitaru shiyanyalilwa okhulola ta, kata shiyaliakhwo noho okhunywakhwo eshindu shiosi shiosi tawe.

¹⁰Bulano yaliho omulondi undi wa Kristo Damasiko, owalangwa mbu, Anania. Omwami yamulanga mwilolelo ari, “Anania!” Naye nakalusia ari, “Endiho Omwami.”

¹¹Kho Omwami namuboolela ari, “Buukha otsie khunjila eyilangwa mbu, Inunji. Mana olwa huula munzu mwa Yuda, oreebe bakhumabyie omundu urulile Tariso, oulangwa mbu Saulo. Saulo mwene oyo bulano asaayanga.

¹²Ne mumalolelo aluutsi omundu oulangwa mbu Anania niyenjila munzu namurakhwo amakhono kho mbu anyalilwe okhulola khandi.”

¹³Nebutswa Anania yakalusia naboola ari, “Omwami, ndaahulile amakhuwa komundu oyo okhurula khubandu abanji, shinga yakholeele abandubo amakhuwa amabi Yerusalemu.

¹⁴Ne yetsile Damasiko nobunyali okhurula khubesaaliisi abakhulundu okhutiila boosi abasaayanga muliiralio.”

¹⁵Nebutswa Omwami yamuboolela ari, “Tsia, shichila ndamwahule okhukhalabanila isie, khulwa okhukhola eliira lianje okhumanyishila abamahanga nende abandu ba Isiraeli.

¹⁶Ne nasi omwene ndalamumanyia amanyakhano koosi kakhoyeele okhunyakhana khulwa eliira lianje.”

¹⁷Mana Anania natsia niyenjila munzu eya Saulo yalimwo, ne namurakhwo amakhono namuboolela ari, “Saulo mwana wefwe, Omwami Yesu omwene owakhuloleshele khunjila olwa wabele niwitsanga niye ourumile. Yarumile mbu onyalilwe okhulola khandi mana witsulemwo Roho Omutakatifu.”

¹⁸Habwene nahabwene ebindu shinga amakhambaya[3] ake inyeeni nibikwa okhurula khumoni tsia Saulo, ne nanyalilwa okhulola khandi. Mana nasinjila, ne nabatiisibwa.

¹⁹Ne olwa yamala okhulia eshiokhulia, omubilikwe kwanyoola amaani. Saulo yamenya Damasiko halala nabasuubili khulwa tsinyanga tsindiiti.

²⁰Mana nachaaka okhuchenda mutsisinagogi nayaala mbu, Yesu nomwana wa Nyasaye.

²¹Abandu boosi abamuhulila bahuka, nibareebana abeene khubene bari, “Shiali niye owa yerirenje abo abasaayanga muliira lia Yesu, mwitookho lia Yerusalemu? Ne shiyayetsile hano khulwa lichoomo liene elo, eliokhutiila abandu abo nende okhubayila imbeli wabesaaliisi abakhulundu?”

²²Ne Saulo nameeta okhuyaala, nikachila okhwechesiakhwe mbu, Yesu yali Kristo nikhutswana mubandu. Kata Abayahudi abamenya Damasiko nibakhaywa eliabakhamukalusia.

²³Ne olunyuma lwetsinyanga tsinyinji, Abayahudi basanjilana halala nibakaasia shinga olwa bakhanyala okhwiira Saulo.

²⁴Nebutswa Saulo yaboolelwa aka bali nibakasinjia. Eshilo neshiteere bamukoneshelanga mubiliibwa bielitookho mbu, bamwiire.

²⁵Nebutswa abeechibe bamubukula eshilo nibamura mushimwelo mana nibamwishilia mwitirisha khwisiisi.

²⁶Saulo yatsia Yerusalemu nateema okhwiyunga halala nabeechi. Nebutswa shibasuubila mbu nomwechi washiabwe ta, kho boosi nibamuria.

²⁷Habula Baranaba yamubukula namuyila khubarume. Mana Baranaba nabenoosia shinga olwa Saulo yali naluutsi Omwami khunjila, ne naboola ninaye. Khandi nabenoosia shinga olwa Saulo yayaala Damasiko muliira lia Yesu obularia tawe.

²⁸Saulo namenya ninabo nayaala muliira lia Yesu mu Yerusalemu obularia likhuwa liosi liosi tawe.

²⁹Yaboola nayingana nende Abayahudi abeshigiriki, nabo nibakhaaba okhumwiira.

³⁰Olwa abasuubili bamanya kano, babukula Saulo nibamuyila Kaisaria, nibamuruma okhutsia Tariso.

³¹Kho mana abasanji beikanisa boosi mu Yudea, Galilaya nende Samaria nibaba nomulembe. Mubukhoonyi bwa Roho Omutakatifu nibeyumbakha, nibameetekha mubunji ne nibamenya mukhuria Omwami.

³²Petero yachenda mumbali tsiosi, ne inyanga yindi natsia okhucheniha abasuubili abali nibamenya Lida.

³³Ebweneyo yabukaana nende omundu oulangwa mbu Aineya, owali nalanyala okhubuukha okhurula khushitali ta, shichila yali niyafwokoya khulwemiyika munane.

³⁴Petero namuboolela ari, “Aineya, Yesu Kristo alakhuhonia. Sinjila ofumbe eshitalishio.” Habwene nahabwene Aineya nasinjila.

³⁵Abandu boosi abamenya Lida nende Sharoni bamulola mana nibasuubila mu Omwami.

³⁶Nayo Yopa, yaliho omukhasi omusuubili oulangwa mbu, Tabitsa (Eliiralie mulugiriki ni Dorika, eshisina mbu, “Eshitsusu.”) Yekhoonyela ebisebie biosi okhukhola amalayi nende okhukhoonya abatakha.

³⁷Munyanga etsio, yalwala ne nafwa. Abandu basinga omubilikwe nibakwalisia mushikoro shiahekulu.

³⁸Litookholie shiliali ehale okhurula Lida tawe. Kho olwa abeechi abali Yopa bahulila mbu, Petero ali Lida, baruma abandu babili khuye nibaboola bari, “Chama witsekhwo bwangu ewefwe.”

³⁹Kho Petero natsia ninabo. Olwa yolayo yayilwa mushikoro shiehekulu, ewa abakhasi abalekhwa boosi bamubotokhana, nibekhuulanga nibamumanyia amashati nende amakoti aka Dorika yanaba nashili omulamu.

⁴⁰Petero yabarusia boosi elwanyi weshikoro, nasikama hasi nasaaya. Mana nashiukhana nahenga omufu naboola ari, “Tabitsa, buukha!” Naye natimbula tsimonitsie. Ne olwa yalola Petero yabuukha, niyekhala.

⁴¹Petero natiila omukhonokwe namukhoonya okhusinjila. Mana nalanga abandu ba Nyasaye boosi, halala nabakhasi abalekhwa abo, namuhaana mumakhono kabwe nali omulamu.

⁴²Amakhuwa ako nikatswana habundu hosi Yopa, ne abandu abanji nibasuubila mu Omwami.

⁴³Petero yamenya Yopa tsinyanga tsinyinji nende omunyushi wamaselo owalangwa mbu, Simoni.