Read wanga ABAROMA 1 Bible Online

ABAROMA 1 - wanga bible

ABAROMA 1

¹Eyirula khwisie Paulo omukhalabani wa Yesu Kristo, khandi omurume owaahulwa nalangwa nende Nyasaye khulwa okhuyaala Injiili ya Nyasaye.

²Nyasaye yalachilisia Injiili eyo khale muno okhubirira mubalakusibe shinga kahandikwa mu Amahandiko Amatakatifu.

³Injiili eyo neyomwanawe, ouli Omwami wefwe Yesu Kristo owa mumelo yomubili, yebulwa mulwibulo lwa Daudi.

⁴Ne khulwa imelo ya Roho yobutakatifu, yamanyisibwa nobunyali obukhongo mbu, nomwana wa Nyasaye khulwa okhulamusibwa okhurula mubafu.

⁵Okhubirira muye, Nyasaye yambelesia obukoosia bwokhuba omurume, khulwa Kristo, kho mbu ndimilile abandu betsimbia tsiosi okhusuubila nende okhuhulila.

⁶Kano koosi khandi kali khwinywe abali Roma aba Nyasaye yalanga okhuba aba Yesu Kristo.

⁷Kho bulano emuhandichila inywe mwesi abali Roma aba Nyasaye yaheela mana nalanga okhuba abebe omwene mbu, Nyasaye sefwe nende Omwami wefwe Yesu Kristo bamuhelesie inywe obukoosia nende omulembe.

⁸Eliambeli, ekhupila Nyasaye wanje orio muno mu Yesu Kristo khulwenywe mwesi, shichila abandu boosi bahulilanga mbu mwasuubila mu Kristo Yesu.

⁹Nyasaye owa ekhalabanilanga nomwoyo kwanje kwosi khulwa okhuyaala Amakhuwa Amalayi akomwanawe, niye omuloli wanje mbu, akemboolanga khwinywe nakatoto. Nyasaye amanyile mbu, emwitsulilanga nemusaayila buli

¹⁰olwa esaaya. Esaayanga mbu, Nyasaye mukhwenyakhwe yanyalile olunyuma isie okhumucheniya.

¹¹Okhuba ndikomba muno okhumulolakhwo inywe kho mbu, emukhole munyoole tsikhabi tsieshiroho okhubaralisia.

¹²Eliemboolanga lili mbu, inywe nende isie khulatinyisania munjila ndala eyo; inywe nobusuubili bwanje nasi nobwenywe.

¹³Enzenya mumanye baana befwe mbu, akhandi akhanji ndeenya okhumucheniya nebutswa shindanyalilwa okhwitsa tawe. Enzenya okhukalukhasia abandu mwinywe baloonde khu Yesu shinga olwa ndakhola mubamahanga bandi.

¹⁴Okhuba endi nelikofi khubandu boosi, abamanyile amalako ka Nyasaye nende abalakamanyile ta, khubasooma nende abalasooma ta.

¹⁵Kho endi nobuha muno okhumuyaalila inywe mwesi abali Roma Amakhuwa Amalayi.

¹⁶Endi nende obusuubili bwitsuule mu Injiili; niyo obunyali bwa Nyasaye obuhoninjia boosi abasuubila, okhuchaachila khu Abahudi mana okhuloosiakhwo Abamahanga.

¹⁷Okhuba Injiili yifwimbulanga shinga olwa Nyasaye alunjisinjia abandu; nokhubirira mubusuubili, okhurula okhuchaaka okhuula khuhelelesia. Shinga olwa Amahandiko amatakatifu kaboolanga kari, “Oyo oukholwa omulunjishi okhubirira mubusuubili alamenya.”

¹⁸Nyasaye yamala okhubisula shinga olwa alikhalachila abandu boosi eshiina khulwa tsimbi tsiabwe nende obwonooni bwabwe obwabakhola, tsimbi tsiabwe etsio tsikalilanga okhumanyikha khwobwatoto bwa Nyasaye.

¹⁹Nyasaye abahelesinjia eshinyasio, shichila aka banyala okhumanya khu Nyasaye kamala okhufunulwa, Nyasaye mwene yakafimbula.

²⁰Okhurula Nyasaye nalonga eshialo, imeloye eyilanyala okhulolekha netsimoni ta, nobunyalibwe obweinziayo nende obunyasayebwe, biamanyikha obulayi. Biamanyikha okhubirira mubindu bia omwene yalonga. Kho babula eshiokhwikatiliakhwo shiosi shiosi tawe.

²¹Baamanya Nyasaye nebutswa shibamuhelesinjia oluyalilwe ta, kata shibamukhupilanga orio tawe. Habula amapaaro kabwe namakhaya butswa, nachio emioyo chiabwe nemisilu khandi chietsulamwo eshilima.

²²Baboolanga mbu, nabachesi, nebutswa nabasilu.

²³Mushilenje shiokhwinamila Nyasaye oulafwitsanga ta, benamilanga ebifwanani ebiakasibwa mukhufwana khwelikoondo liomundu oufwitsanga, elitsisolo eliamanyonyi nende elietsisolo tsimoolanga khwiloba.

²⁴Khulweshio, Nyasaye yamala okhulekhula abandu abo okhukhola akeshifwabwi shiemioyo chiabwe chikoombanga, nende okhwifwola abeene.

²⁵Bakalukhasinjia obwatoto bwa Nyasaye okhuba obubeeyi, benamilanga nende okhukhalabanila ebia Nyasaye yalonga, mushilenje shiokhwinamila Omulonji mwene, oukhoyile okhwitsoomibwa inziayo! Amina.

²⁶Shichila mbu bakholanga ako, Nyasaye yabalekha mubwilasi bwabwe bwetsisoni. Kata abakhasi babwe balekha imelo yabwe eyoburulanda nibakhola akoluswa.

²⁷Munjila ndala eyo, abasaatsa balekha akoburulanda okhuba nabakhasi babwe, ne nibekomba abasaatsa bashiabwe. Abasaatsa bakholanga akeshifwimbwa murwe nabasaatsa bashiabwe. Khulwako bereerera abeene eshinyasio eshibakhoyeele khulwa obumayanu bwabakholanga.

²⁸Khulwa okhuba abandu abo baloba okhumanyilisia Nyasaye, Nyasaye yabalekha mumapaaro keshifwabwi ako, kho mbu bakhole akabalakhoyeele okhukhola tawe.

²⁹Betsulamwo obumayanu bwetsimbia tsiosi, obubi, obulang'u, nende obumayanu. Betsulamwo imbalikha, obwiiri, obulwani, obukaati nende obusuku. Bamoonyananga

³⁰nende okhuchikhana, nabasuku ba Nyasaye, abaraasi, abeisunga khandi abokhwiyitsiala. Bapaaranga butswa tsinjila tsinyinji tsiokhukhola amabi, nibaloba okhuhulila abebusi babwe.

³¹Shibali namayililisio okomumwoyo mukari ta; shibakholanga akabasuubisia okhukhola ta, khandi shibakholanga aketsimbabasi khubashiabwe tawe.

³²Bamanya mbu, Lilako lia Nyasaye liboolanga mbu, abandu bamenyanga munjila yino bakhoyile okhufwa. Nebutswa batsiililanga okhukhola ako nende kata okhufuchilisania nende abakakholanga.