Read wanga ABAROMA 10 Bible Online

ABAROMA 10 - wanga bible

ABAROMA 10

¹Baana befwe, ndikomba nomwoyo kwosi mbu, abandu banje beene bahonibwe, ebasaayilanga khu Nyasaye.

²Enyala okhukhola obuloli mbu, toto behaana khu Nyasaye nomwoyo kwosi. Nebutswa okhwihaana khwabwe khubula obumanyi bwatoto.

³Bashili okhumanya injila ya Nyasaye akholelangamwo abandu okhuba abalunjishi tawe. Nebutswa abeene bateema okhuraho injila yabwe abeene, kho shibayehaana abeene khunjila ya Nyasaye akholelangamwo abandu okhuba abalunjishi tawe.

⁴Kristo yamala okhureera amalako khushiakamo, kho mbu yesi ousuubila alunjisibwe imbeli wa Nyasaye.

⁵Musa yahandika okhulondana namakhuwa okokhukholwa omulunjishi imbeli wa Nyasaye khulwa okhulonda Amalako ari, “Omundu yesi oukhola akamalako kalachilisia alabaho omulamu.”

⁶Nebutswa aka Amahandiko kaboolanga khulwa okhukholwa omulunjishi imbeli wa Nyasaye okhubirira mubusuubili ngakano mbu, “Shiolereeba omwene mbu, ‘Niwiina oulatsia mwikulu?’ (mbu areere Kristo hasi) tawe.

⁷Khandi shiolareeba mbu, ‘Niwiina ouleekha emakombe?’ (mbu, abuusie Kristo okhurula mubafu) tawe.”

⁸Nebutswa eshiakaboolanga njieshino mbu, “Oburume bwa Nyasaye buli butswa ahambi ninawe, buli khumunwakwo nende mumwoyokwo,” (nibwo oburume bwobusuubili obwa khuyaalanga).

⁹Noba norumbula nomunwakwo habulafu, mbu, “Yesu niye Omwami,” mana nosuubila mumwoyokwo mbu, Nyasaye yamulamusia okhurula mubafu, olahonibwa.

¹⁰Okhuba khusuubilanga mumioyo chiefwe mana khulunjisibwa imbeli wa Nyasaye, ne khurumbulanga habulafu neminwa chiefwe mana khuhonibwa.

¹¹Amahandiko kaboolanga mbu, “Omundu yesi ousuubila muye shialifwimbwa omurwe tawe.”

¹²Kano kali khubandu boosi, shichila bubulaho obwahukhani hakari wa Abayahudi nende Abamahanga tawe. Nyasaye nimulala, Omwami wa boosi, mana abalaamilanga tsikhabi mubwitsulu boosi abamuhabilanga.

¹³Shinga Amahandiko kaboolanga mbu, “Buli shiamundu yesi oulanga eliira lia Omwami alahonibwa.”

¹⁴Nebutswa bakhaliliila barie Omwami okhubakhoonya nibashili okhusuubila? Kata bakhasuubila barie, nibashili okhuhulila oburume bwa tsana? Ne bakhahulila barie oburume nibushili okhuyaalwa?

¹⁵Ne oburume bwatsana bwakhayaalwa burie, nikaba abarume bashili okhurumwa? Shinga Amahandiko kaboolanga mbu, “Okhwitsa khwabarume abareera Amakhuwa Amalayi nokhulayi muno!”

¹⁶Nebutswa boosi shibafuchilila Amakhuwa Amalayi ako ta. Isaya omwene yaboola ari, “Omwami niwiina owasubila oburume bwefwe?”

¹⁷Kho obusuubili burulanga khukhuhulila oburume, nabwo oburume bwitsanga khulwa okhuyaala aka Kristo.

¹⁸Nebutswa ereeba mbu: Nitoto mbu shibahulila oburume obwo ta? Obwatoto buli mbu, bahulila, shichila shinga Amahandiko kaboolanga, “Amakhuwa kabwe kahulilikha khushialo shiosi; nako amakhuwa kabwe nikoola khundulo tsieshialo.”

¹⁹Khandi ereeba endi, Abaisiraeli abo shibamanyilisia ta noho? Musa mwene niye owambeli okhukalusia ari: “Ndalamukhola okhuna neimbalikha khubandu abalali lihanga ta, khandi ndalamukhola inywe okhutiilwa liruma khuluyia lwabandu abayingwa.”

²⁰Khandi Isaya yali neitswoni olwa yaboola ari; “Ndanyoolilwe nende abandu abalaali nibakhaabanga ta, ndaloleshela abandu abalaali nibareebanga okhundola ta.”

²¹Nebutswa okhulondana khu aka Abaisiraeli aboola ari, “Eshiteere tulu ndakalikha amakhono kanje khubandu abalaali abahulili ta, khandi abakhayi bamalako.”