Read wanga ABAROMA 11 Bible Online

ABAROMA 11 - wanga bible

ABAROMA 11

¹Kho ereeba mbu: Nyasaye yaloba abandube beene noho? Tawe, shikali kario ta! Isie omwene endi omuisiraeli, omwitsukhulu wa Aburahamu, owomuluyia lwa Benjamini.

²Nyasaye ashili okhuloba abandube, abayalobola okhurula khale tawe. Mumanyile eshia Amahandiko kaboolanga mushiasia eshia Eliya yahabila Nyasaye nafukula Abaisiraeli naboola ari,

³“Omwami, beerire abalakusibo khandi balikulule ebimalilo biemisangobio. Nisie sienyene ousikaale, ne bakhabaanga okhunzira.”

⁴Ne Nyasaye yamukalusia arie? Nyasaye yamuboolela ari, “Ndayebishila omwene abandu ebikhumila musafu (7,000) abashili okhwinamilakhwo omunyasaye Baali tawe.”

⁵Kali butswa kario khandi bulano buno; kuliho omukanda omututu okwa Nyasaye yaahula khulwa obukoosia.

⁶Okhwahulakhwe khwileetanga khubukoosiabwe, shikhwiletanga khumilimo chiabakholile tawe. Shichila okhulobola khwa Nyasaye nikhuba nikhwiletanga khumilimo chiabandu bakhola, kho obukosiabwe shibwakhaba obwatoto ta.

⁷Kho karie? Abaisiraeli shibanyoola akabali nibakhaabanga tawe. Kwali omukanda omututu butswa okwa Nyasaye yalobola okwanyoola eshiakwakhabanga; nabandi boosi bekala amarwi khumulango kwa Nyasaye.

⁸Shinga Amahandiko kaboolanga mbu; “Nyasaye yakhola emioyo nende amapaaro kabwe okhubula obumanyilisi, okhuula khunyanga yolwaleelo yino shibanyala okhulola kata okhuhulila tawe.”

⁹Naye Daudi aboolanga ari, “Lekha batiilwe nibahambwa mumasabo kabwe, mana bakwe, nibanyoola eshinyasio!

¹⁰Lekha tsimoni tsiabwe tsilime kho baleshe okhulola; lekha behuunamile mumanyakhano kabwe buli lwosi.”

¹¹Kho ereeba mbu, Olwa Abayahudi besichirala, bakwila elala noho? Tawe, shikali kario ta! Shichila bonoona, obuhonia bwetsela Abamahanga okhukhola Abayahudi batiilwe imbalikha khubo.

¹²Obwonooni obwa Abayahudi bwareera tsikhabi tsinyinji khushialo shiosi, ne obutakha bwomumioyo chiabwe nibureera tsikhabi tsinyinji khubamahanga. Kho bulano tsikhabi tsiabwe tsiakhabe tsinyinji tsihela tsirie, olwa Abayahudi boosi balibalilwamwo elala!

¹³Emboolanga bulano khwinywe Abamahanga mbu, olwa isie eshili butswa omurume khu Abamahanga ndaleyitsialila emilimo chianje.

¹⁴Haundi enyala ndakhola abandu aboluyia lwanje okhutiilwa neimbalikha, mana kachile balala khubo bahonibwe.

¹⁵Okhuba olwa balobwa, abandu boosi abali abasuku ba Nyasaye bakholwa abetsabe. Kho kaliba karie, olwa balifuchiililwa? Abafu balilamusibwa!

¹⁶Eshironje shiobusuma shiambeli nishiba nishihaana khu Nyasaye, kho obusuma obwo bwosi buba buhaanilwe, ne emisi chiomusaala nichiba nichihaanwa khu Nyasaye kho amasaka komusaala okwo koosi khandi kaba kahaanilwe khu Nyasaye.

¹⁷Inywe Abamahanga muli shinga amasaka akomuseituni kwomubulimo okulimasibwa khumuseituni okwaraakwa. Mwabukula obukono bwamasaka kandi akaremwa okhurula khukwo. Khulweshio, munyoolanga tsikhabi shichila muli eshitonye shiomuseituni kwaraakwa.

¹⁸Kho bulano shimukhoyile okhuchaaya abo abaremwa shinga amasaka tawe. Kho eshichila mwiyitsiale nishiina? Muli butswa amasaka, shimuchilanga emisi ta, habula emisi nichio echimuchinganga inywe.

¹⁹Nebutswa mulaboola muri, “mbula amasaka karemwa nikarusibwakhwo kho mbu khunyoole obwiyangu.”

²⁰Ako kali habwene. Karemwa nikarusibwakhwo khulwa okhubula obusuubili, nenywe mwatong'a mubwiyangu obwo shichila musubilanga. Nebutswa mulekhoya ta habula mube meso.

²¹Okhuba nikali mbu, Nyasaye shiyalekha Abayahudi abali amasaka kene akokhumusaala okhutong'akhwo ta; mupaara mbu, nenywe yakhamulekha mwatong'akhwo?

²²Kho lole shinga olwa Nyasaye ali omulayi khandi shinga olwa ali omululu. Nomululu khubonooni, nebutswa nomulayi khwinywe nimuba nimutsiililila mubulayibwe; ne nimulakhola murio ta, mwesi mularemwa nimurusibwakhwo.

²³Nabo Abayahudi, nibaba nibalekha obulasuubila bwabwe, balakalusibwa khandi mubwikhalo bwabalinjimwo, okhuba Nyasaye ali nobunyali bwokhukhola ario.

²⁴Inywe Abamahanga muli shinga lisaka liomuseituni omunabulimo eliaremwa, mana niliungasibwa khumuseituni okwarakwa munjila eyilali yeimelo yene ta. Nabo Abayahudi bali shinga omuseituni okwarakwa kuno. Ne bulaba obwangu muno khu Nyasaye okhungasia amasaka karemwa ako nakakalusia khumusaala kwako kwene.

²⁵Baana befwe, buliho obwatoto bwebisa obwenzenya mumanye. Okhuba bulamukhola muleshe okhwilola mbu muli abachesi. Obwatoto tsana mbwobuno mbu, obukhayi obwa Abaisiraeli shibulatsiililila okhuula inziayo tawe, habula bulabaho okhuula olwa abamahanga abanji balaba nibetsile khu Nyasaye.

²⁶Ne Abaisiraeli boosi balihonibwa munjila yino, shinga Amahandiko kaboolanga kari, “Omuhonia alirula Zayuni, ne yakharusieho obumayanu okhurula khubolwibulo lwa Yakobo.

²⁷Ndakhakhole ninabo indakano yino, olwa ndiliba nirusiyeho obwonooni bwabwe.”

²⁸Abayahudi bekhola abasuku ba Nyasaye khulwa inywe Abamahanga, shichila baloba Injiili ya Kristo. Ne khulwa okhubela mbu Nyasaye yamala okhubaahula bekhola abetsabe khulwakhubeela abakuuka babwe.

²⁹Kali kario, shichila Nyasaye shiakalukhasinjia amapaaroke khu oyo owayaahula namulaamila tsikhabi tawe.

³⁰Ne munyanga tsiabira, inywe Abayahudi mwakhaya okhuhulila Nyasaye, ne bulano mwahelesibwe tsimbabasi tsia Nyasaye shichila Abayahudi baloba okhuba abahulili.

³¹Munjila ndala eyo, khulwa okhubela tsimbabasi tsiamwanyoola, bulano Abayahudi nabo bakhayile okhuhulila Nyasaye, mbu nabo boosi banyoole tsimbabasi tsia Nyasaye.

³²Nyasaye yekalila abandu boosi mubukhayi bwabwe, kho mbu, abatiililwe tsimbabasi boosi.

³³Obukoosia bwa Nyasaye nobunji muno! Obuchesibwe nende obumanyilisibwe nobukhongo muno! Niwiina ounyala okhwinoosia obukhalachibwe? Niwiina ounyala okhumanyilisia tsinjilatsie?

³⁴Shinga Amahandiko kaboolanga kari, “Niwiina oumanyile amapaaro aka Omwami? Niwiina ounyala okhumuchelela?

³⁵Niwiina owamuhosiakhwo eshindu shiosi shiosi, kho mbu amukalusilie eshiatsana?”

³⁶Okhuba niye owalonga ebindu biosi, ne ebindu biosi bimenyanga okhubirira muye, khandi khululwe. Oluyali lube khu Nyasaye obushia nobushia! Amina.