Read wanga ABAROMA 12 Bible Online

ABAROMA 12 - wanga bible

ABAROMA 12

¹Khulweshio, baana befwe, khulwa tsimbabasi tsikhongo tsia Nyasaye emusaaya mbu, mwihaane abeene khu Nyasaye shinga omusango omutakatifu, omulamu khandi kwokhuchamisia. Khuno nikhwo okhwinamila Nyasaye khwatoto okhwa mukhoyile okhukhola.

²Ne mulalonda ebiima biabandu beshialo tawe, habula muleshe Nyasaye amukalukhasie mumioyo khulwa okhukalukhasilia elala obuyililisi bwenywe mana mulamanya akokhwenya khwa Nyasaye, nende okhumanyilisia amalayi khandi akokhuchamisia khandi amalamba.

³Ne khulwa obukoosia bwa Nyasaye obwa ndahebwa emboolela buli mulala khwinywe mbu, olepaarakhwo mbu oli oweikulu okhushila owashio tawe. Habula obe omurecherefu mumapaaroko okhulondana nende eshichelo shiobusuubili eshia Nyasaye yakhuhelesia.

⁴Omubili kuli nebiungo ebinji, nebutswa buli shilala shili nomulimo kwashio okwahukhaane.

⁵Munjila ndala eyo, kata olwa khuli abanji, khuli omubili mulala halala nende Kristo, ne fwesi khwalimasibwa halala shinga ebiungo ebiaukhaane ebiomubili mulala.

⁶Kho khukhoyile okhwikhoonyela emikabo chiefwe echiahukhaane okhulondana nobukoosia bwa Nyasaye yakhuhelesia. Ne omukabo kwefwe nikuba nikuli okhuyaala likhuwa lia Nyasaye, okhuula khukhole khurio okhulondana nende obusuubili obwa khuli ninabwo.

⁷Ne nikuba nikuli okhukhalabana, okhuula khukhalabane, nikuba nikuli okhwechesia, okhuula khwechesie;

⁸nikuba nikuli okhutsuuba, okhuula khukhole khurio. Yesi ouhaananga ahaane nomukhono omusiro, omundu yesi ouli nobunyali okhuula abwikhoonyele obulayi, ne oulolosinjia tsimbabasi akholenje ario nobusangafu.

⁹Obuheeli bube obwatieli. Musile amabi; ne muhande khumalayi.

¹⁰Muheelanenje abeene khubeene nobusangafu shinga abakristo; mana mube nobuha okhuhelesaninjia oluyali abeene khubene.

¹¹Mukhalabane emilimo neitswoni ne mulaba abatofu tawe. Khalabanile Omwami nomwoyo kwosi.

¹²Obunaayi bwenywe butsiililile okhumusangasia, mwisimilisie mumanyakhano kenywe, ne musaaye buli eshise.

¹³Mukabanenje emiandu chienywe nende abasuubili bashienywe abatakha, nimwinjisia abacheni mutsingo tsienywe.

¹⁴Musabile abo abamusandia ikhabi, toto musabe Nyasaye okhubahelesia ikhabi, ne mulabarakhwo eshilaamo shiobubi tawe.

¹⁵Mwikhoye halala nende abo abekhoya, mwikhuule halala nende abo abekhuula.

¹⁶Mube nobuheeli obuhelana khubuli mundu. Mulechinjimisia ta, nebutswa mwitutuyie. Mulepaarakhwo okhuba abachesi abeene ta.

¹⁷Mularunga omundu yesi obubi khu obubi tawe. Teeme okhukhola akachamisia buli mundu.

¹⁸Khole akamunyala okhumenya nomulembe nabandu boosi.

¹⁹Abaheelwa banje, mulemalilanga abeene eshikwoli ta, nebutswa muleshe liruma lia Nyasaye limale eshikwoli. Okhuba OMWAMI Nyasaye aboola mumahandiko ari, “Ndalamala eshikwoli khandi omwene ndalarunga.”

²⁰Nebutswa mukhole shinga olwa Amahandiko kaboola mbu, “Omusukuwo naba nali inzala, omuhelesie eshiokhulia, naba nali nobuloho, omuhelesie amaatsi, okhuba khulwa okhukhola orio, olamufwimbia omurwe.”

²¹Shiolafuchililwa okhuhulwa nobubi tawe, nebutswa ohule obubi khulwa okhukhola amalayi.