Read wanga ABAROMA 13 Bible Online

ABAROMA 13 - wanga bible

ABAROMA 13

¹Buli mundu okhuula ahelesinjia abaruchi oluyali, okhuba obunyali bwokhuruka abandu bularulanga khu Nyasaye. Nabo abarukanga bahebwa obunyali okhurula khu Nyasaye.

²Omundu yesi oukhaya okhuhulila oburuchi buliho, aba akhayanga okhuhulila Nyasaye, ne yesi oukhola ario yekhalachilanga omwene eshiina.

³Okhuba abaruchi shibarisinjia abakholanga amalayi ta, habula abakholanga amabi. Kho wenya okhubula oburi khumuruchi? Kho khola amalayi, naye alakhwitsoomia.

⁴Okhuba omuruchi nomukhalabani wa Nyasaye, oukhalabananga khulwa obulayibwo iwe omwene. Nebutswa nokhola amabi, okhuula omurie, shichila obunyalibwe bwokhuhaana eshinyasio buliho. Nomukhalabani wa Nyasaye oureranga eshinyasio shia Nyasaye khumundu oukholanga amabi.

⁵Niko akachila okhuula muhelesie abaruchi oluyali, mulabahelesia butswa oluyali khulwa liruma lia Nyasaye ta, habula shichila mbu nakakhoyile okhukholwa kario.

⁶Niko akachila khandi nimurunganga obushuru, okhuba abaruchi bakholelanga Nyasaye, olwa baba nibakhola emilimo chiabwe.

⁷Mubarunje boosi ebibakwanila, mbu obushuru khubakwanila obushuru, oluyali khubakwanila okhuhebwa oluyali.

⁸Mulaba nelikofi khu owashio yesi yesi ta, likofi lia muli ninalio lionyene nokhuheelana abeene khubeene, okhuba ouheela owashie aba ahesinjia amalako.

⁹Amalako kano mbu, “Shiolaheyanga ta, shioleranga omundu ta, shioleeba ta, shiolekoombanga eshindu shiowashio ta,” ako koosi nende akandi koosi akameetwakhwo kalimasibungwa mwilako elala lino mbu, “Oheelenje owashio shinga olwa wiheela omwene.”

¹⁰Noba niwaheela owashio, shionyala okhumukholela amabi ta, khulweshio, obuheeli, nokhuhulila amalako koosi.

¹¹Mukhoyile okhukhola ako shichila mumanyile mbu ebise biulile ebiokhubuukha okhurula mundoolo. Okhuba ebise biokhuhonibwa bili ahambi bulano okhushilakhwo shinga biali olwa khwasuubila olwambeli.

¹²Eshilo shihwetsanga, nashio eshiteere shili ahambi. Kho khuleshe okhukhola amakhuwa keshilima, ne khwifwale ebimanulwa biobulafu.

¹³Chende khwichendelesie mushiloonyo, shinga abandu abamenya mubulafu bweshiteere, mulelaasia noho okhumeela, noho okhuheya, noho okhukhola akeshifwabwi, noho okhusoolana noho okhutiilwa neshikhalikhali tawe.

¹⁴Habula mwifwale Omwami Yesu Kristo, ne mulahelesiakhwo omubili obwiyangu bwokhukhola obwikombi bwakwo obubi tawe.