Read wanga ABAROMA 14 Bible Online

ABAROMA 14 - wanga bible

ABAROMA 14

¹Mufuchilile omundu omuteshele mubusuubili, ne mulayingana ninaye khu akamapaaroke tawe.

²Obusuubili bwomundu undi bumufuchililanga okhulia ebindu bindi, nebutswa omundu omuteshele mubusuubili alitsanga eliani liamasafu lionyene.

³Omundu oulitsanga shiosi shiosi alachaaya oulashilitsanga ta, ne oulitsanga eliani lionyene alamukhalachila eshiina oyo oulitsanga shiosi shiosi ta, shichila Nyasaye yamufuchilila.

⁴Nawe niwe wina oukhalachilanga omukhalabani wowashio eshiina? Nakomwamiwe okhwahula naba nakholile habwene noho niyonoonile. Ne alanyalilwa, shichila Omwami ali nobunyali bwokhumukhola okhunyalilwa.

⁵Omundu undi apaaranga mbu, inyanga ndala yishila etsindi tsiosi, naye oundi apaara mbu, tsinyanga tsiosi tsili nashilala. Buli mundu amanye obulayi mumwoyokwe kahandakhwo shinga olwa kali.

⁶Oulindanga inyanga ndala, achilindanga khulwa okhuhelesia Omwami oluyali, naye oulitsanga shiosi alitsanga khulwa okhuhelesia Omwami oluyali, okhuba akhupilanga Nyasaye orio. Naye oulalitsanga ebindu bindi ta, akholanga ario khulwa okhuhelesia Omwami oluyali, khandi akhupilanga Nyasaye orio.

⁷Shialiho khwifwe oumenyanga khululwe omwne ta, khandi shialiho oufwitsanga khululwe omwene tawe.

⁸Nikhuba nikhuliho abalamu, khuli khurio khulwa Omwami; ne nikhuba nikhufwa, khufwitsanga khulwa Nyasaye. Kho kata nikhubaho abalamu, noho nikhufwa khuli aba Omwami.

⁹Okhuba Kristo yafwa, ne nalamukha kho mbu, abe Omwami wabafu nende abalamu boosi.

¹⁰Kho iwe oulitsanga eliani liamasafu lionyene, mbushiina nokhalachilanga omwana wenywe eshiina? Nawe oulitsanga eshindu shiosi shiosi, mbushiina ochaayanga omwana wenywe? Fwesi khulisinjila imbeli wa Nyasaye, okhuyaasibwa ninaye.

¹¹Okhuba Amahandiko kaboolanga shinga Omwami aboola ari, “Toto shinga endi Nyasaye ouliho mwoyo, buli mundu alisikama imbeli wanje, khandi buli mundu aliyama mbu, endi Nyasaye.”

¹²Buli mulala khwifwe alinoosia akeke imbeli wa Nyasaye. .

¹³Khulweshio, okhuula khuleshe okhukhalachilana eshiina. Habula khulole mbu shikhukhola shiosi shiosi eshiakhachila owashio okhwisichirala noho okhukhola obwonooni tawe.

¹⁴Emanyile obulayi, khulwa okhuba endi omulondi owa Omwami Yesu, esuubilanga toto mbu, shibulaho eshiokhulia eshili eshiomusilo eshiene tawe, habula oyo ousuubila mbu, eshiokhulia neshiomusilo, kho shilaba eshiomusilo khuye.

¹⁵Noba nosinyisia owashio khulwa ebiokhulia biolitsanga, kho shioba nokholanga mubuheeli tawe. Shiolafuchilila ebiokhulia biolitsanga okhusasia obusuubili bwomundu owa Kristo yafwila tawe.

¹⁶Shiolafuchilila akali amalayi khwiwe kaloleshe okhuba amabi tawe.

¹⁷Okhuba obwami bwa Nyasaye shibuli khukokhulia nende okhunywa ta, habula nobwobulunjishi, omulembe, nende okhwikhoya, ebia Roho Omutakatifu ahaananga.

¹⁸Ne oukhalabanila Kristo munjila yino, achamisinjia Nyasaye, khandi afuchililwa nabandu.

¹⁹Khulweshio khukhoyile buli lwosi okhuchoomanga khu akenako akareeranga omulembe nende akokhumbakhana.

²⁰Kho mulasasie aka Nyasaye yakhola, shichila mbu, ebiokhulia tawe. Ebiokhulia biosi nebisiyikhu, nebutswa nobubi okhulia eshiokhulia eshinyala okhuchila owashio akwe mubwonooni.

²¹Nobulayi okhulekha okhulia inyama, kata okhunywa idivai, kata okhukhola elindi liosi eliakhachila omukristo washio akwe mubwonooni.

²²Olinde obusuubili bwoli ninabwo mumakhuwa kano hakariwo nende Nyasaye. Noweikhabi oyo ouleyaasia omwene mumapaaro, khulwa aka yahula okhukhola ta.

²³Nebutswa oyo oukanakania mumwoyokwe khu eshialitsanga, Nyasaye amukhalachila eshiina olwa aba nalia eshiatsana eshio, shichila akakhola shikeleetanga khubusuubili tawe. Ne eshindu shiosi shiosi eshileleeta khubusuubili ta, nobwonooni.