Read wanga ABAROMA 15 Bible Online

ABAROMA 15 - wanga bible

ABAROMA 15

¹Ifwe abakhuli nobusuubili buhela, khukhoyile okhukhoonya abalemu mubusuubili khulwa okhwituukha emisiko chiabwe. Khulechamisia abeene tawe.

²Habula fwesi okhuula khuchamisie abashiefwe khulwa okhubakholela amalayi, mbu khubombashe mubusuubili.

³Okhuba Kristo shiyayechamisia omwene ta, habula Amahandiko kaboolanga kari, “Akabakhunyeka iwe koosi, kali khwisie.”

⁴Buli shindu eshiahandikwa mumahandiko amatakatifu shiahandikwa khulwa okhwechesia ifwe, mbu khube nobunaayi okhubirira mubwisimilisi nende obutinyilisi bwa Amahandiko kakhuboolelanga.

⁵Ne Nyasaye, ouli eshinoko shiobwisimilisi nende obutinyilisi, akhoya wamunyalila okhumenya mukhurecheresania abeene khubene nimuloonda aka Yesu Kristo,

⁶mbu mwesi, nomwoyo mulala, mwitsoomie Nyasaye, Samwana Omwami wefwe Yesu Kristo.

⁷Mwinjisaninjie abeene khubeene, shinga Kristo yamwinjisia khulwa oluyali lwa Nyasaye.

⁸Okhuba emuboolela mbu, Kristo yakhalabanila Abayahudi khulwa okhumanyisia obwatoto bwa Nyasaye, kho mbu obusuubisie bwa Nyasaye yasuubisia abakuuka buusibwe.

⁹Khandi mbu Abamahanga bahaane oluyali khu Nyasaye khulwa tsimbabasitsie. Shinga Amahandiko kaboolanga mbu; “Khulweshio ndalakhwitsoomia mubamahanga, ndalemba tsinyimbo ninditsoomia eliiralio.”

¹⁰Khandi kaboolanga mbu; “Mwikhoye inywe abamahanga, mutsaatsahale halala nabandube!”

¹¹Khandi kaboola kari, “Inywe amahanga koosi mwitsoomie Omwami, inywe abandu boosi mumwitsoomie!”

¹²Naye Isaya yaboola ari, “Owomulwibulo lwa Yese alilolekha, naye aliruka abamahanga, nabo abamahanga balinaayila muye.”

¹³Nyasaye, ouli eshinoko shiobunaayi, amwitsusia nobusangafu bwosi, nende omulembe okhubirira mubusuubili bwenywe muye, kho mbu khulwobunyali bwa Roho Omutakatifu obunaayi bwenywe bumeeteshe.

¹⁴Baana befwe, isie mwene emanyile obulayi mbu, muli nobukoosia. Khandi muli nobumanyilisi bwosi, khandi mbu munyala okhwechesania abeene khubeene.

¹⁵Nebutswa ehamundichiile ibarwa yino neitswoni khumakhuwa kandi okhumwitsusia. Endi neitswoni khulwa okhubela obukoosia bwa Nyasaye yambelesia,

¹⁶okhuba omukhalabani wa Kristo Yesu, okhukhalabanila abamahanga. Ekhalabananga shinga omwisaaliisi, neyaala Injiili ya Nyasaye mbu, abamahanga babe omusango okufuchililwa imbeli wa Nyasaye, okuhaanilwe khuye nende Roho Omutakatifu.

¹⁷Khulweshio, enyala okhwiyitsialila obukhalabani bwanje bwekholelanga Nyasaye mu Kristo Yesu.

¹⁸Emboola netswoni khu aka Kristo yakhola okhubirira mwisie khulwa okhukhola abamahanga okhuhulila Nyasaye. Yakholile kano okhubirira mumakhuwa nende mubikhole,

¹⁹khulwa obunyali bwa akamakana, akokhuhuchisia, nende khulwa obunyali bwa Roho Omutakatifu. Ne shinga ndachenda okhurula Yerusalemu okhuula Iluriko, ndayala mubwitsulu Injiili ya Kristo.

²⁰Aka ndikombanga buli lwosi nokhuyaala Injiili buli habundu aha eliira lia Kristo lishili okhurumbulwakhwo, kho mbu endeshe okhumbakha khumushinji kwomundu undi yombokha.

²¹Shinga olwa Amahandiko kaboolanga mbu, “Abo abalaboolelwakhwo amakhuwake ta, balamulola, abo abalahulilakhwo amakhuwake ta, balamanyilisia.”

²²Kho kano niko akachila nindikalilwa akhandi akhanji okhumucheniha.

²³Nebutswa bulano olwa emalile emilimo chianje mutsingongo tsino, khandi shichila ndekomba khulwa oluhono olurambi okhumucheniha,

²⁴bulano enzenya okhwitsa. Ndikomba okhumulola olwa nembe nendi khuluchendo lwanje lwokhutsia Sipania, mana mukhoonye okhutsiayo olwa nembe nemalile okhusangala khulwa okhumulolakhwo khulweshise shitiiti.

²⁵Nebutswa, bulano enzitsanga Yerusalemu khulwa okhukhalabanila abakristo bebweneyo.

²⁶Okhuba abakristo aba Makedonia nende Akayia bachamile okhuhaana ebihaanwa khulwa okhukhoonya abamanani bali mubakristo aba Yerusalemu.

²⁷Abene nibo abachamile okhukhola bario, nebutswa obwatoto buli mbu, bakhoyile okhukhoonya abamanani abo, shichila Abayahudi bakabana tsikhabi tsiabwe tsieshiroho nende Abamahanga. Kho Abamahanga bakhoyile okhwikhoonyela tsikhabi tsiabwe tsiemiandu okhukhoonya Abayahudi.

²⁸Olwa ndalaba nemalile omulimo kuno, nebahelesiye amapesa koosi akabasololelwa, ndalatsia Sipania mana emuchenihe nendi khuluchendo olwo.

²⁹Olwa nemucheniye, emanyile mbu, nandiitse netsikhabi tsia Kristo mubwitsulu.

³⁰Bulano emusaaya baana befwe khulwa Omwami wefwe Yesu Kristo, khandi khulwa obuheeli bwa Roho ahaananga mbu, musanjilane ninasi nimusaayila obutinyu khu Nyasaye.

³¹Saaye mbu, abandu bali Yudea abalasuubilanga mu Kristo ta, baleshe okhusaalisia, khandi mbu emilimo chianje Yerusalemu chifuchililwe nobusaangaali mubandu ba Nyasaye abali ebweneyo.

³²Kho nikhuba nikhuli okhwenya khwa Nyasaye, ndalamwitsila ninditsule obusangafu, mana okhumucheniha khwanje khulasangasia nende okhuukhola okhuhuluukha ninenywe.

³³Nyasaye, ouli eshinoko shiomulembe, abetsenje ninenywe mwesi. Amina.