Read wanga ABAROMA 16 Bible Online

ABAROMA 16 - wanga bible

ABAROMA 16

¹Enzenya okhumumanyia omukhaana wefwe Fibi, oukhalabanilanga ikanisa yili Kengerea.

²Mumwinjisie muliira elia Omwami shinga abakristo bakhoyile khandi mumuhelesie obukhoonyi bwosi bwosi obwa yenya okhurula khwinywe; shichila omwene yakhonyilenje abandu abanji kata siesi.

³Muushesilie Pirisila nende Akula, abakhalabani bashianje mumilimo chia Yesu Kristo.

⁴Bo bafuchilila kata okhufwa khulwa isie. Ebakhupilanga orio muno, ne shiendi isie sienyene ta, habula nende boosi abetsikanisa tsia abamahanga.

⁵Amashiesio kandi khubeikanisa abakhung'anilanga munzu yabwe khulwa okhusaaya. Amashiesio khumwitsa wanje omuheelwa Epaineto, owali omundu wambeli mumbeka tsia Asia okhusuubila mu Kristo.

⁶Amashesio khu Mariamu, owamukhalabanila inywe obutinyu muno.

⁷Amashesio khu Anderoniko nende Yunia, Abayahudi bashianje abali mumbohe halala ninasi. Abo bamanyikha khubarume khandi bekhola abakristo isie neshili.

⁸Amashesio kanje khu Ambiliato, omwitsa wanje omuheelwa mu Omwami.

⁹Amashesio khu Urubano, omukhalabani washefwe mubukhalabani bwa Kristo, nende khu Sitakisi, omwitsa wanje omuheelwa.

¹⁰Amashesio khu Apele, owa obusuubilibwe khu Kristo bwamanyikha obulayi. Amashesio khu abeinzu ya Aristobulo.

¹¹Amashesio khu Herodioni, omuyahudi washianje, nende abashiefwe mu Kristo abeinzu ya Narikisi.

¹²Amashesio kanje khu Turifena nende Turifosa abakhalabani mubukhalabani obwa Omwami. Muushesilie Perezisi, oukhalabananga muno mu Omwami.

¹³Eruma amashiesio khu Rufu, omukhalabani wamanyikha mubukhalabani obwa Omwami, nende khunyinamwana, owaninda obulayi shinga omwanawe.

¹⁴Amashesio kanje khu Asingirito, Fulegoni, Hereme, Pataroba, Herema nende abasuubili bashiefwe bandi boosi abasanganga ninabo.

¹⁵Amashesio khu Filologo nende Julia, khu Nerea nende omukhaana wabwe, khu Olimba nende khubasuubili boosi abasanganga ninabo.

¹⁶Mushiesianie abeene khubeene amashiesio kobusangaafu. Abeikanisa ya Kristo boosi bamushesiye.

¹⁷Baana befwe emusaaya, mubuule abo boosi abareeranga obukabukhani nende ebisichirasio, nibafukula amechesio aka mwechesibwa. Mwiyahule okhurula khubo.

¹⁸Okhuba abakholanga amakhuwa kario shibakhalabanilanga Kristo Omwami wefwe ta, habula bakhalabanilanga tsinda tsiabwe abeene. Bekhoonyelanga amakhuwa kabwe kokhukaatilisia nende akokhulaha khulwa okhukaatia amapaaro kabateshele.

¹⁹Okhuba buli mundu wamala okhuhulila shinga olwa muli abahulili khu Injiili, ne niko akachilanga nimwikhoyela muno. Enzenya mbu, mubetsenje abachesi khu akali amalayi, ne abasilu khu akali amabi.

²⁰Naye Nyasaye, ouli eshinoko shiomulembe, nasenachile Setani lwangu hasi wamakulu kenywe. Obukoosia obwa Omwami wefwe Yesu bube ninenywe.

²¹Timotseyo, omukhalabani washianje, amurumilanga amashiesioke, khandi Lukio, Yasoni nende Sisipatero Abayahudi bashianje boosi bamushesiiye.

²²Isie Teretio, owahandichila Paulo ibarwa yino, emurumile amashiesio ka Kristo.

²³Gayo, owanzinjisia khandi owa abeikanisa ya Kristo bakhukhaanilanga munzuye amurumila amashiesioke. Erasito, omubiishi welitookho, halala nende Kwarito omwana wefwe bamurumiila amashiesio. [

²⁴Obukoosia obwa Omwami wefwe Yesu Kristo bube ninenywe mwesi. Amina.]

²⁵Leshe khuhaane oluyali khu Nyasaye! Niye ounyala okhumuralisia mubusuubili bwenywe, okhulondana nende Amakhuwa Amalayi aka eyaalanga, khu Yesu Kristo, nende mubufimbuli bwelibiso eliabiswa khulwa ebisoni nebisoni.

²⁶Nebutswa, bulano obwatoto bubakaalwe habulafu okhubirira mumahandiko kabalakusi. Khandi okhubirira mwilako elia Nyasaye oweinziayo, bwamanyisibwe mumahanga koosi, mbu boosi babusuubile nende okhubuloonda.

²⁷Nyasaye yenyene ouli omwene omuchesi, aheebwe oluyali okhubirira mu Yesu Kristo obushia nobushia! Amina.