Read wanga ABAROMA 2 Bible Online

ABAROMA 2 - wanga bible

ABAROMA 2

¹Bulano owashianje, okhalachilanga abashio eshiina noho? Shiolikhwo neshibehelesi shiosi shiosi ta, kata lwoba noli wina. Shichila nokhalachila abandi eshiina, ne nokhola akabakholanga ako, kho wikhalachilanga eshiina omwene.

²Khumanyile mbu, Nyasaye ali habwene olwa akhalachilanga abandu abakholanga amakhuwa shinga ako eshiina.

³Nebutswa iwe owashianje oukholanga malala katsana akokhalachilanga abandi, opaaranga mbu olehonokokha eshinyasio shia Nyasaye?

⁴Noho haundi olechelesinjia tsimbabasi tsia Nyasaye tsikhongo, nende obwisimilisibwe nende obwifwilibwe? Shimumanyile mbu, Nyasaye akhwisimilisilinjia mbu kho khwikalukhasie tawe?

⁵Nebutswa inywe muli abatinyu khandi abemioyo emiumu, khulweshio abeene mumeetanga eshinyasio shienywe okhuba eshikhongo okhushila eshiokhunyanga eyoburuma nende eyokhukhalachilwa eshiina shiahabwene shia Nyasaye yilifwimbulwa.

⁶Okhuba Nyasaye alirunga buli shiamulala okhulondana nende akayakhola.

⁷Abandu bandi batsiilililanga okhukhola amalayi nende okhukhaaba oluyali, neifuma, nende obulamu bweinziayo, khubeene abo Nyasaye alihaana obulamu bweinziayo.

⁸Ne abandi nabo nabokhwiyenyela khandi baloba akali amalayi nibakhola amabi, khubeene abo Nyasaye alabamanyia liruma nende okhusinyikhakhwe.

⁹Obunyakhani nende obutsunwi bilibaho khubandu boosi abakholanga amabi okhuchachila khu Abayahudi okhuloosiakhwo abamahanga boosi.

¹⁰Nebutswa Nyasaye alihaana oluyali, ifuma indayi nende omulembe khuboosi abakholanga amalayi okhuchachila khu Abayahudi mana okhuloosiakhwo Amahanga boosi khandi.

¹¹Okhuba Nyasaye shiakholanga ebiela olwa akhalachila abandu eshiina ta.

¹²Boosi abonoona nibalamanyile amalako ka Musa ta, shibalikhalachilwa eshiina okhulondana namalako ako tawe. Nebutswa abonoona nibamanyile amalako ako balikhalachilwa eshiina okhulondana namalako kenako.

¹³Okhuba shikhuli khulwa okhuhulila amalako okhuchila abandu nibaba abalunjishi imbeli wa Nyasaye ta, nebutswa khulwa okhukhola akamalako kalakanga.

¹⁴Abamahanga shibali nende amalako ka Musa ta; nebutswa muburulanda bwabwe nibakhola akamalako kalakanga, bali amalako khubeene, kata olwa balali namalako aka Musa tawe.

¹⁵Ebiima biabwe bimanyiinjia mbu, aka Amalako ka Musa kalakanga kahandikwa mumioyo chiabwe. Obumanyilisi bwomukari bwomumioyo chiabwe bwosi bumanyinjia khandi mbu, kano nakatoto, shichila amapaaro kabwe ebise bindi kabenjililanga abeene, ne ebise bindi kabatereranga.

¹⁶Kho mana okhulondana nende Injiili eya eyaalanga, nolwa kaliba khunyanga eyo eya Nyasaye aliyaala amapaaro komukari kabandu okhubirira mu Yesu Kristo.

¹⁷Nawe iwe! Wilanganga omuyahudi; wileetanga khumalako ka Musa, ne niwiyitsialila okhuba owa Nyasaye;

¹⁸omanyile aka Nyasaye yenyanga okhole, ne weka okhurula khumalako okhwela akali amalayi;

¹⁹osuubilanga toto mbu, oli omwimilisi wababofu, obulafu khwabo abali mushiilima;

²⁰omwibaali wabasilu, khandi omwechesia owabalamanyile ta? Oli nende obulamba mbu mumalako oli nobuchesi bwitsule nende obwatoto.

²¹Wechesinjia abandi, mbushiina oleeyichesinjia omwene? Oyaalanga mbu, “Oleeba ta,” mbushiina iwe mwene wibanga?

²²Oboolanga mbu, “Shiolaheyanga ta,” mbushiina iwe omwene oheyanga? Wasila ebifwanani; mbushiina iwe mwene onuulanga tsihekalu?

²³Witsialilanga okhuba namalako ka Nyasaye, ne shiofwolanga Nyasaye lwolahulilanga amalakoke ta?

²⁴Amahandiko kaboolanga mbu, “Abamahanga banyekanga Nyasaye khulwa okhubela inywe Abayahudi.”

²⁵Okhushebwa khwenywe nokhweinganga nimulonda amalako, nebutswa nimulalonda amalako ta, bwakhabeele obulayi nimwakhaleshile okhushebwa.

²⁶Nikaba omumahanga, oulashebwa ta, alonda amalako, opaara mbu, Nyasaye shiyakhamulola shinga owashebwa ta?

²⁷Khulweshio, inywe Abayahudi mulikhalachilwa eshiina nabamahanga, shichila shimuhulilanga amalako ta, kata olwa muba nimuli namalako kahandikwa, ne khandi nimwashebwa. Nebutswa bo balondanga amalako kata nibaalashebwa likhoba liomubili tawe.

²⁸Mukhumalilisia ouli omuyahudi mwene owashebwa toto niwiina? Omundu shabetsanga omuyahudi khulwa okhulolekhakhwe khwebulafu, noho okhushebwakhwe, okhuli eshindu shilolekha habulafu tawe.

²⁹Habula omuyahudi watoto, nomundu ouli omuyahudi owashebwa mukari, niye owomwoyokwe kwashebwa. Ne kuno nomulimo kwa Roho wa Nyasaye, shikuli okwa amalako kahandikwa tawe. Omundu shinga oyo shianyoolanga oluyali okhurula khumundu ta, habula okhurula khu Nyasaye.