Read wanga ABAROMA 3 Bible Online

ABAROMA 3 - wanga bible

ABAROMA 3

¹Kho mupaara mbu Abayahudi balikhwo obulayi okhushila Abamahanga noho? Noho mupaaranga inganga yilikhwo mukhushebwa noho?

²Toto nolwa kali kario munjila yosi! Olwambeli, Nyasaye yahelesia Abayahudi okhulinda oburumebwe.

³Nebutswa abandi khubo shibali abasuubilwa ta. Kho kano kakhamanyisia mbu, Nyasaye shiali omusuubilwa ta noho?

⁴Kata nahatuutu tawe! Nyasaye okhuula abe owobwatoto, kata olwa buli mundu aba nali omubeeyi. Shinga olwa Amahandiko kaboolanga kari, “Buli olwa oboola, okhuula aka oboola kabe akahabwene; ne okhuula ohule eshiinashio olwa oba noyasibwa.”

⁵Nebutswa nikaba mbu, amabi kakhukholanga kalolesia habulafu akobulunjishi bwa Nyasaye, kho khwakhaboola shiina? Khunyala okhuboola mbu, Nyasaye akholanga obubi olwa akhuhelesia ifwe eshinyasio? (Emboola shinga omundu namundu.)

⁶Shikali kario tawe! Nyasaye naba nalali owahabwene ta, yakhanyala arie okhukhalachila abandu boosi eshiina?

⁷Ne obubeeyi bwanje nibuba nibuchila obwatoto bwa Nyasaye nibulolesia oluyalilwe, kho mbushiina isie nishikhalachilungwa eshiina shinga omwonooni?

⁸Kho nikali kario, mbushiina nikhulaboola mbu, “Lekha khukhole amabi kho khunyoole amalayi?” Abandu bandi baanyeka isie, nibanjikha mbu, ndaboola amakhuwa tsana ako! Balikhalachilwa eshiina shinga bakhoyeele.

⁹Kho, khunyala okhuboola mbu, ifwe Abayahudi khulikhwo obulayi okhushila Abamahanga noho? Kata nahatutu tawe! Emalile okhumanyia mbu, Abayahudi nende Abamahanga boosi nabonooni.

¹⁰Shinga olwa Amahandiko kaboolanga mbu, “Abulaho kata mulala ouli omulunjishi.

¹¹Abulaho oumanyilisinjia, kata okhwinamila Nyasaye tawe.

¹²Boosi bashiukhana nibarula khu Nyasaye, boosi bakorire; abulaho kata mulala oukholanga akahabwene tawe.

¹³Eminwa chiabwe chili shinga ing'ani eyikusuhe; bekhoonyelanga tsinimi tsiabwe okhubeya. Amakhuwa kabwe kali nobufisi shinga obweinzokha.

¹⁴Eminwa chiabwe chietsulamwo ebilakamunwa ebilulu.

¹⁵Bali bwangu okhusaalisia nende okhuratsia eshitsayi,

¹⁶buli aha batsia balekhangaho amasila nende obusasishi.

¹⁷Shibamanyile injila yomulembe tawe.

¹⁸Shibayekakhwo okhuria Nyasaye tawe.”

¹⁹Bulano khumanyile mbu, kamalako kaboolanga koosi kachoomanga khwabo abali hasi wamalako kene ako, kho mbu eshibehelesi shiosi shibuleho khandi nende okhura eshialo shiosi hasi wobuyaasi bwa Nyasaye.

²⁰Abulaho omundu oukholungwa omulunjishi imbeli wa Nyasaye khulwa okhukhola akamalako kaboolanga; eshiamalako kakholanga nokhumanyia omundu mbu yonoonile.

²¹Nebutswa bulano injila ya Nyasaye okhukhola abandu okhuba abalunjishi imbeliwe yilolesibwe. Ne shiyili okhubirira mumalako ka Muasa tawe. Nebutswa Amalako ka Musa nende abalakusi baboola obuloli khunjila eyo.

²²Abandu bakholungwa okhuba abalunjishi imbeli wa Nyasaye okhubirira mubusuubili bwabwe mu Yesu Kristo. Nyasaye akholanga ako khuboosi abasuubila mu Kristo, okhuba obwahukhani shibuliho ta,

²³okhuba abandu boosi bamala okhwonoona, khandi baleema okhuula khuluyali lwa Nyasaye.

²⁴Nebutswa khulwa eshihaanwa shia Nyasaye eshieshikhaya shiobukoosiabwe, boosi bakholungwa abalunjishi okhubirira mu Yesu Kristo, oubakholanga abalekhuule.

²⁵Nyasaye yahaana Yesu mbu, khulwa okhufwakhwe abe eshitiso eshiokhwosia obwonooni bwabandu, okhubirira mubusuubili bwabwe muye. Nyasaye yakhola kano khulwokhumanyia obulunjishibwe. Khale yali omwisimilisi khandi shiyateeba obwonooni bwabandu tawe;

²⁶nebutswa munyanga tsino, ateebanga obwonooni bwabandu okhumanyisia obulunjishibwe. Munjila yino Nyasaye amanyisiinjia mbu, ye mwene nomulunjishi, khandi akholanga buli mundu ousuubila mu Yesu okhuba omulunjishi.

²⁷Kho, eshiakhunyala okhwiyitsialilakhwo nishiina? Shishilikhwoho tawe! Ne eshifune eshia kano nishiina? Nokhubeela mbu khuhulilanga amalako noho? Tawe, nebutswa mbu khusuubilanga.

²⁸Kho khumalilisia mbu, omundu akholungwa omulunjishi okhubirira mubusuubili, ne shikali khulwa okhukhola kamalako kaboolanga tawe.

²⁹Noho Nyasaye uno ni Nyasaye owa Abayahudi bonyene? Shiali khandi Nyasaye owa Abamahanga? Mbula kali kario.

³⁰Nyasaye nimulala, ne alakhola Abayahudi okhuba abalunjishi khulwobusuubili bwabwe, khandi alakhola Abamahanga okhuba abalunjishi khulwa obusuubili bwabwe.

³¹Kho kano kaboolanga mbu khurusieho amalako khulwobusuubili noho? Tawe, kata nahatuutu tawe! Habula mbu, khukatinyilisie.