Read wanga ABAROMA 5 Bible Online

ABAROMA 5 - wanga bible

ABAROMA 5

¹Bulano, olwa khumalile okhukholwa abalunjishi imbeli wa Nyasaye okhubirira mubusuubili, khuli nomulembe nende Nyasaye okhubirira mu Omwami wefwe Yesu Kristo.

²Khulwa obusuubili bwefwe, Yesu Kristo yakhurelire mubukoosia bwa Nyasaye obwa khumenyangamwo bulano. Khwiyitsialanga khulwa obunaayi obwakhuli ninabwo khulwa okhusanjilana muluyali lwa Nyasaye!

³Khandi khwiyitsialilanga amatinyu kefwe, okhuba khumanyile mbu, amatinyu kebulanga obwisimilisi,

⁴nabwo obwisimilisi bwibulanga akokhwenya khwa Nyasaye, nako akokhwenyakhwe kareeranga obunaayi.

⁵Obunaayi buno nobweinganga khwifwe, shichila Nyasaye yatsukha butsukha obuheelibwe mumioyo chiefwe okhubirira mu Roho Omutakatifu, ouli eshihaanwa shia Nyasaye khwifwe.

⁶Okhuba olwa khwali nikhushili abalenyalila ta, Kristo yafwila abonooni olwa ebise ebia Nyasaye yenya kekholeshe biola.

⁷Nebutswa nobutinyi omundu okhufwila omundu omulunjishi. Haundi yakhabaho oweikholo inyumu owakhafwila omundu omulayi.

⁸Nebutswa Nyasaye yakhumanyia shinga olwa yakhuheela, okhuba Kristo yakhufwila olwa khwali nikhushili abonooni!

⁹Khulwa okhufwakhwe khumusalaba ifwe bulano khwakholwa abalunjishi imbeli wa Nyasaye. Kho kali habwene mbu, khulahonibwa okhurula khwiruma lia Nyasaye.

¹⁰Khwali abasuku ba Nyasaye, nebutswa yakhukhola abetsabe okhubirira mukhufwa khwomwanawe. Ne bulano olwa khuli abetsa ba Nyasaye, nakatoto mbu khulahonibwa khulwa obulamu bwa Kristo.

¹¹Nebutswa shikali ako konyene ta; khwikhoyanga khulwa okhubela aka Nyasaye yakhukholelaokhubirira mu Yesu Kristo, owakhukholile bulano okhuba abetsa ba Nyasaye.

¹²Obwonooni bwetsa mushialo okhubirira mumundu mulala; ne obwonoonibwe bwareera lifwa. Khulweshio, lifwa liasalaana nilitswana khubandu boosi, shichila abandu boosi bamala okhwonoona.

¹³Obwonooni bwaliho amalako nikashili okhuhaanwa; nebutswa eha amalako kalali ta, obwonooni shibubalikhanga tawe.

¹⁴Nebutswa okhurula mutsinyanga tsia Adamu okhuula khu etsia Musa olufu lwaruka abandu boosi, kata khwabo abalayonoona ta, shinga olwa Adamu yonoona naloba okhulonda amalako aka Nyasaye. Adamu yali eshilolelo eshia oyo owali nali okhwitsa.

¹⁵Nebutswa babili bano shibafwanana ta, shichila eshihaanwa shia Nyasaye eshiobukoosia shishili shinga obwonooni bwa Adamu tawe. Kali toto mbu abandu abanji bafwa khulwa okhubela obwonooni obwomundu mulala oyo. Nebutswa obukoosia bwa Nyasaye nobunji okhushila, nolwa kali khu eshihaanwashie eshiobukoosia khubandu abanji okhubirira mubukoosia obwomundu mulala oyo ouli Yesu Kristo.

¹⁶Ne obwahukhani buliho hakari weshihaanwa shia Nyasaye nende obwonooni bwomundu mulala oyo. Olunyuma lwobwonooni tsana obwo, Nyasaye yakhalachila, “Abali neshikha.” Nebutswa olunyuma lwobwonooni obunji, Nyasaye yahaana eshihaanwa, eshia, “Ababula eshikha!”

¹⁷Kali habwene mbu, okhubirira mubwonooni bwomundu mulala, lifwa liachaaka okhuruka okhubirira mumundu mulala oyo. Nebutswa akomundu mulala ouli Yesu Kristo yakhola, namakhongo okhushila. Kho boosi abanyoola obukoosia bwa Nyasaye obukhongo khandi abakholwa okhuba abalunjishi baliruka mubulamu okhubirira mumundu mulala ouli Yesu Kristo.

¹⁸Khulweshio, shinga eshionoono shilala shiakhalachila abandu boosi eshiina, munjila ndala eyo eshikhole shilala eshiobulunjishi shikholanga abandu boosi okhuba abalekhuule mana shibahelesia obulamu.

¹⁹Khandi shinga abandu boosi bakholwa abonooni khulwa okhubela obukhayi obwomundu mulala, munjila ndala eyo Nyasaye alunjisinjia abandu boosi khulwa okhubela obuhulili obwomundu mulala ouli Yesu Kristo.

²⁰Amalako karerwaho kho mbu obwonooni bumeeteshe; nebutswa aha obwonooni bwameetekha, obukoosia bwa Nyasaye bwemeeta okhushilakhwo.

²¹Khulwa okhubela obwonooni bwaruka nobunyali bwokhwufwa, nolwa obukoosia bwa Nyasaye burukanga nobulunjishi nibukhwinjisia mubulamu obulahwaho ta, okhubirira mu Yesu Kristo, Omwami wefwe.