Read wanga ABAROMA 6 Bible Online

ABAROMA 6 - wanga bible

ABAROMA 6

¹Kho bulano khuboole shiina? Khutsililile okhukhola obwonooni kho mbu obukoosia bwa Nyasaye bumeeteshe noho?

²Kata nahatuutu tawe! Okhulondokhana nobwonoonin ifwe khwamala okhufwa, kho khwakhatsiililila khurie okhukhola obwonooni tsana khandi?

³Toto mwene mumanyile mbu, olwa khwabatisiibwa nikhulimasibwa nende Kristo Yesu, khwalimasibwa khandi mukhufwakhwe.

⁴Khulwa okhubatiisibwa khwefwe, khwayabilwa nende Kristo mana nikhusanjilana mukhufwakhwe, kho mbu shinga olwa Kristo yalamusibwa okhurula mubafu khulwa eshikhole shioluyali shia samwana, nolwa fwesi khandi khukhoyile okhumenya obulamu obuyia khurio.

⁵Okhuba khwalimasibwa ninaye mukhufwakhwe, kho khumanyile toto mbu khulimasibwa ninaye mukhulamukhakhwe.

⁶Khandi khumanyile mbu; imelo yefwe yakhale yabambwa halala nende Kristo khumusalaba, kho mbu omubili kwefwe kwobwonooni kusasibwe, kho khuleshe okhuba khandi ababohe mubunyali bwobwonooni tawe.

⁷Okhuba lwomundu afwitsanga akholungwa okhuba omulekhuule okhurula mubunyali bwobwonooni.

⁸Kho olwa khwamala okhufwa nende Kristo, khusuubilanga mbu khwakhamenye ninaye khandi.

⁹Khumanyile mbu Kristo yalamusibwa okhurula mukhufwa, ne shialifwa khandi tawe. Kho okhufwa nakhwo shikhulikhwo nobunyali khandi khuye tawe.

¹⁰Khulweshio khulwa okhuba yafwa, obwonooni shibulikhwo nobunyali khuye tawe; ne bulano amenyanga obulamubwe mubusanjilani nende Nyasaye.

¹¹Munjila ndala eyo, okhuula mwesi mwipaarekhwo abeene shinga abafu okhulondana nobwonooni, nebutswa Kristo yamuhelesiye obulamu, ne mumenyanga khulwa Nyasaye.

¹²Kho mulafuchilila okhurukwa nobwonooni mana buchile mulonde obwikombi bwenywe tawe.

¹³Kata mulahaanekhwo eshiungo shienywe shiosi shiosi khubwonooni, kho mbu shikhoonyelwe khulwa obumayanu tawe. Habula mwihaane abeene khu Nyasaye, shinga abandu abalamusibwe okhurula mukhufwa nimureerwa mubulamu, mana mwihaanile elala khu Nyasaye, khulwa okhwikhonyelwa munjila eyobulunjishi.

¹⁴Obwonooni bulamuruka khandi tawe; shichila shimuli hasi wamalako ka Musa ta, habula muli hasi wobukoosia bwa Nyasaye.

¹⁵Kho bulano khukhole shina? Khukhole obwonooni shichila shikhuli hasi wa amalako ka Musa ta, habula hasi wobukoosia bwa Nyasaye? Kata nahatuutu tawe!

¹⁶Toto mumanyile obulayi mbu, nimwihaana abeene okhuba abahulili khumundu nalebe, kho muli abasumba bomundu tsana oyo. Kho muli abasumba bobwonooni obureeranga olufu, noho muli abahulili, obukhukholanga okhuba abalunjishi.

¹⁷Nebutswa khupile Nyasaye orio! Okhuba kata nimwali abasumba abobwonooni khushise shindi, mwahulile nimulonda nomwoyo kwosi obwatoto buli mumechesio aka mwahebwa.

¹⁸Mwakholwa abalekhuule okhurula mubwonooni, ne nimwikhola abasumba bobulunjishi.

¹⁹(Emboola mululimi lwomundu namundu khulwa okhubeela obuteshele bwenywe bwoburulanda.) Eshise shindi inywe mwehaana abeene okhuba abasumba beshifwabwi nende obumayanu, khulwa okhukhola obumayanu. Munjila ndala eyo, bulano okhuula mwihaanile elala abeene shinga abasumba bobulunjishi, khulwa okhukhola amakhuwa amatakatifu.

²⁰Olwa mwali abasumba bobwonooni, shimwali abakhalunjisiibwe okhukhola akachamisia Nyasaye tawe.

²¹Neinganga shiina eya mwanyoola khulwa okhukhola amakhuwa akamufwimbinjia emirwe bulano? Amakhuwa shinga ako kareeranga olufu.

²²Nebutswa bulano mwamala okhulekhuulwa okhurula mubwonooni, muli abasumba ba Nyasaye. Inganga yenywe eya muli ninayo bulano nobulamu obutakatifu, ne obulayi bwabwo nobulamu bweinziayo.

²³Shichila omurungo kwobwonooni nolufu, nebutswa eshihaanwa shiabutswa eshia Nyasaye nobulamu obulahwaho ta mubusanjilani nende Kristo Omwami wefwe.