Read wanga 1 ABAKORINZO 1 Bible Online

1 ABAKORINZO 1 - wanga bible

1 ABAKORINZO 1

¹Eyirula khwisie Paulo owalangwa khulwa okhwenya khwa Nyasaye okhuba omurume wa Yesu Kristo, nende okhurula khumwana wefwe Sosetsene.

²Yule khubeikanisa ya Nyasaye, eyili Korinzo, khwabo boosi abalangwa okhuba abatakatifu aba Nyasaye, abali abebe mu Yesu Kristo, halala nende abandu boosi, buli habundu abenamilanga Omwami wefwe Yesu Kristo, ouli Omwami wabwe khandi owefwe;

³munyoole obukoosia nende omulembe ebirula khu Nyasaye Sefwe nende khandi okhurula khu Omwami wefwe Yesu Kristo.

⁴Buli lwosi ekhupilanga Nyasaye wanje orio khulwenywe shichila khulwa obukoosia obwa yamuhelesiye okhubirira mu Yesu Kristo.

⁵Mu Kristo inywe mwayekholile abayinda mubindu biosi, mukhuboola khwosi nende mubuchesi bwosi.

⁶Oburume obwamakhuwa aka Kristo bwamalile okhuralisibwa mwinywe;

⁷kho mbu shimwalemakhwo okhunyoola kata shilala khubihaanwa ebia Nyasaye, olwa mulindililanga okhulolekha okhwa Omwami wefwe Yesu Kristo tawe.

⁸Naye Yesu alamulinda namuralisia okhuula khushihesi, kho mbu mulibula eshikha khu Nyanga eya Omwami wefwe Yesu Kristo alikalukha.

⁹Nyasaye nomwisikwa, omwene owamulanga inywe okhuba nobusanjilani nende Omwanawe Yesu Kristo, ouli Omwami wefwe.

¹⁰Khulwa obunyali obwa Omwami wefwe Yesu Kristo, emusaaya inywe mwesi, abaana befwe mbu, mufuchilisaninjie mukoosi akamuboola, kho mbu obukabukhani bulabaho mwinywe tawe. Habula mulimasilibwe elala, mubulala obwa aka muchooma okhukhola nende akamupaara.

¹¹Okhuba abaana befwe, abandu bandi abomunzu eya Kuloe bamboolele butswa habulafu mbu, obusoolo buli hakari mwinywe.

¹²Eshiemuboolelanga njieshino mbu; mulala khwinywe aboolanga mbu, “Isie enondanga Paulo,” oundi naye mbu, “Isie enondanga Apolo,” noundi mbu, “Isie enondanga Petero,” naye oundi ari, “Esie enondanga Kristo.”

¹³Kho Kristo yakhakabulwe mumikanda noho? Paulo niye owamufwiila inywe khumusalaba noho? Mwabatiisibwa muliira lia Paulo noho?

¹⁴Ekhupilanga Nyasaye orio okhuba shindabatiisiakhwo omundu yesi khwinywe ta, nalali Kirisipo nende Gayo bonyene.

¹⁵Kho shialiho bulano owakhaboola mbu, mwabatiisibwa muliira lianje tawe.

¹⁶(Toto, ndabatiisiakhwo khandi Sitefano nende abomunzuye, nebutswa shinzitsulilanga nimba nindabatiisiakhwo oundi yesi tawe.)

¹⁷Kristo shiyaruma okhubatiisia ta; habula yaruma okhuyaala Amakhuwa Amalayi, nende okhukayaala nindalekhoonyelanga olulimi lwobuchesi bwabandu ta, kho mbu okhufwa khwa Kristo khumusalaba khuleshe okhuba okhwa butswa tawe.

¹⁸Oburume bwamakhuwa kokhufwa khwa Kristo khumusalaba nobusilu khwabo abatibanga. Nebutswa khulwa ifwe abahonibungwa ninabwo, nobunyali bwa Nyasaye.

¹⁹Amahandiko kaboolanga mbu, “Ndalasasia obuchesi bwabachesi, nende okhufubia oburecherefu bwabarecherefu.”

²⁰Kho abachesi bali hena? Nabo abarecherefu bali hena? Kata abasitsa beene mubuyingani bweshialo shino bali hena? Nyasaye shiyasiluhasia obuchesi bweshialo shino?

²¹Okhuba mubuchesibwe omwene, Nyasaye yakhola abeshialo okhukhaywa okhumumanya okhubirira mubuchesi bwabwe abeene; nebutswa okhubirira muburume obwa khuyaalanga obwa abandi balaanganga mbu “obusilu,” Nyasaye yachama okhuhonia abo abasuubila.

²²Okhuba Abayahudi benyanga eshilolelo kho basuubile, nabo Abagiriki bakhabanga obuchesi.

²³Nebutswa ifwe, khuyaalanga Kristo owabambwa khumusalaba, oburume obuli eshisichirasio khuba Yahudi khandi obusilu khu Abamahanga;

²⁴nebutswa khwabo aba Nyasaye yalanga, boosi Abayahudi halala nende Abamahanga oburume buno ni Kristo, ouli obunyali obwa Nyasaye khandi obuchesi obwa Nyasaye.

²⁵Shichila akalolekhanga shinga akobusilu obwa Nyasaye, nakobuchesi okhushila obuchesi bwabandu; ne akalolekhanga shinga akobuteshelebwe nakamaani okhushila amaani kabandu.

²⁶Abaana befwe, bulano mwitsulile shinga mwali nimuli, olwa Nyasaye yamulanga okhuba abalondi ba Kristo. Mukhulola khwabandu nibatiti khwinywe aba mwali abobuchesi, abobunyali noho kata abobwikhalo bwahekulu muluyia.

²⁷Nebutswa Nyasaye yachooma butswa okhwahula abeshialo shilolanga mbu nabasilu kho mbu abachesi bafwimbwe murwe, khandi yalobola abeshialo shilolanga mbu shibanyala eshindu ta, kho mbu abamaani bafwimbwe murwe.

²⁸Yaahula abo aba abomushialo bafwolanga nibachaaya, nibapaara mbu shibali eshindu ta, kho mbu asasie abo aba abomushialo bapaaranga mbu nabobukhala khubo.

²⁹Kano kamanyinjia mbu, abulaho ounyala okhwiyitsiala imbeli wa Nyasaye.

³⁰Nyasaye niye eshinoko shiobulamu bwenywe mu Yesu Kristo, ne khandi Nyasaye yakholile Kristo okhuba obuchesi bwefwe, okhubirira muye khwakholwa abalunjishi, abandu abatakatifu ba Nyasaye khandi abalekhuule.

³¹Khulweshio shinga Amahandiko kaboolanga mbu, “Owiyitsiala yeyitsialile khu aka Omwami yakholile.”