Read wanga 1 ABAKORINZO 10 Bible Online

1 ABAKORINZO 10 - wanga bible

1 ABAKORINZO 10

¹Baana befwe, enzenya mwitsulile akekholekha khubakuuka befwe abaloonda khu Musa. Boosi bali hasi wobulindi bwelileesi, khandi boosi bambukha inyanza ya Hakari.

²Boosi babatiisibwa shinga abalondi ba Musa olwa babirilila mwileesi khandi nibabirila munyanza.

³Boosi balia eshiokhulia shilala shieshiroho,

⁴khandi nibanywa eshiokhunywa shieshiroho. Bashinywa okhurula mulwanda lweshiroho olwatsitsanga halala ninabo; ne olwanda olwo yali Kristo mwene.

⁵Ne kata kario abanji khubo shibachamisia Nyasaye tawe, kho yamala asalasie emilambo chiabwe mushitsiimi.

⁶Ne bulano amakhuwa kano koosi nebilolelo khwifwe, okhukhuchetsiyia mbu, khuleshe okhwikomba ebindu ebimayanu shinga olwa bo bekoomba tawe,

⁷noho kata okhwinamila ebifwanani, shinga balala khubo bakhola tawe. Shinga olwa Amahandiko kaboolanga mbu, “Abandu bekhala hasi okhulia lisabo eliamala likalukhane okhuba eshifwabwi eshiobumeesi nende obuyilani.”

⁸Kho ifwe okhuula khuleshe okhwiyinjisia mushifwabwi shiobuyilani shinga balala khubo bakhola, mana khunyanga ndala abandu ebikhumila amakhumi kabili nabitaru (230,000) nibafwa.

⁹Ifwe okhuula khuleshe okhuteema Omwami shinga olwa balala khubo bakhola, mana tsinzokha nitsibeera.

¹⁰Ifwe okhuula khuleshe okhwiyiniakana, shinga olwa balala khubo bakhola, ne nibamululwa nomumalaika owolufu.

¹¹Kano koosi kekholekha khubo kho mbu, kabe shinga eshilolelo khubandi, nebutswa kahandikwa kho mbu kabe shinga lichetsiyio khwifwe. Okhuba khumenyile mushise eshia eshihesi shili ahambi okhuula.

¹²Khulweshio oyo oupaaranga mbu, asinjiile naraliile obutinyu, okhuula ahenjelesie obulayi kho mbu aleshe okhukwa.

¹³Amateemo koosi aka mubirilangamwo nakabetsangaho butswa khubandu buli lwosi. Nebutswa Nyasaye nomwisikwa, kho shialamulekha muteemwe okhushila ahamunyalilwa okhuralila obutinyu tawe, olwa muteemwa alamuhelesia amaani akokhwifwila obutemwi obwo, khandi alamuhelesia injila eyokhwihonokoshelamwo.

¹⁴Khulweshio abaheelwa banje, mwihanye okhurula khubwinamili bwebifwanani.

¹⁵Isie emboola khwinywe shinga ouboola khubandu abarecherefu, kho abeene muchele aka emboolanga kano.

¹⁶Olwa khunywelanga mushikombe eshia khukhupilangamwo Nyasaye orio khubetsanga nikhusanga mumabanga ka Kristo. Khandi olwa khulitsanga omukaate okwa khumekanga khubetsanga nikhusanga mumubili kwa Kristo.

¹⁷Okhuba kuliho omukaate mulala, ifwe kata nikhuli abanji khuli omubili mulala, shichila khusanganga mumukate mulala okwo.

¹⁸Paarekhwo khubandu ba Isiraeli; abo abalitsanga eshihaanilwe mumusango shibasanganga neshihaanwa eshio khushimalilo shiemisango mukhukhalabanila Nyasaye.

¹⁹Kho isie akemboolanga nakaleena bulano? Mbu eshifwanani kata eshiokhulia eshihaanilwa eshifwanani biakhaba eshindu noho?

²⁰Tawe! Akemboolanga kali mbu, omusango okumalilwe khushimalilo shiemisango eshia abalamanyile Nyasaye ta, shikubeetsanga nikuhanilwe khu Nyasaye ta, habula khubishieno. Nasi shinzenya mbu mube abasanjilani nende ebishieno tawe.

²¹Shimunyala okhunywela mushikombe eshia Omwami khandi munywele mushikombe eshiebishieno tawe; khandi shimunyala okhulila khumeesa eya Omwami khandi mutsie mulile khumeesa eyebishieno tawe.

²²Khwenyanga okhukhola Omwami atilwe imbalikha noho? Khupaaranga mbu khuli namani okhumushila noho?

²³Baboolanga mbu, “Khufuchililwa okhukhola eshindu shiosi.” Nahabwene toto, nebutswa buli shiashindu shishili eshilayi ta. Khandi baboolanga mbu, “Khufuchililwa okhukhola eshindu shiosi” nebutswa buli shiashindu shishili eshiobukhoonyi ta.

²⁴Omundu shialekhabila akamukasila omwene ta, habula akhabenje akakasila abashie.

²⁵Muli abalekhuule okhulia shiosi shiosi eshikusibungwa khushiiro shieinyama, mularebelesia likhuwa liosi ta, kho mbu muleshe okhwonoonia amayililisio akomumioyo chienywe.

²⁶Shichila shinga olwa Amahandiko kaboolanga mbu, “Eshialo nende buli shiosi eshilimwo nebia Omwami.”

²⁷Omundu oulali omusuubili ta, naba nakhwinjisia okhulia eshiokhulia, ne nofuchilila okhutsia, olie shiosi shiosi eshia akhurenjeshela, ne olareebelesia likhuwa liosi ta, kho mbu aleshe okhwonoonia amayililisio akomumwoyokwo.

²⁸Nebutswa omundu undi nakhuboolela ari, “Ebiokhulia bino nebihaanilwe shinga omusango khubifwanani,” kho khulwa oyo oukhuboolele nende khulwa okhulekha okhwonoonia amayililisio akomumwoyo, olaliakhwo ebiokhulia ebio tawe;

²⁹ne shikali khulwa amayililisioko akomumioyo ta, habula aka oyo oukhuboolele. Toto mwene, omundu oundi naye anyala okhureeba ari, “Eshichila obulekhuule bwanje obwokhukhola liosi elia enzenya nibwikalilwa nende amayililisio akomumwoyo akomundu undu nishiina?

³⁰Isie nimba nindakhakhupila Nyasaye orio muno khulwa ebiokhulia bianje, eshiakhachila omundu yesi niyanzinjilila khulwa ebiokhulia ebia ekhupile orio ebio nishiina?”

³¹Liosi liosi elia okhola, khube okhulia noho okhunywa olikholenje khulwa okhuhelesia Nyasaye oluyali.

³²Mumenye obulamu obulayi nimulesichirasia Abayahudi noho Abamahanga noho abakristo tawe.

³³Khole butswa shinga olwa ekholanga; endeemanga okhuchamisia buli shiamundu mumakhuwa koosi aka ekholanga, nindalekhabilanga omwene akanjamisia ta, nebutswa nekhabanga akachamisia abandu boosi kho mbu banyale okhuhonibwa.