Read wanga 1 ABAKORINZO 11 Bible Online

1 ABAKORINZO 11 - wanga bible

1 ABAKORINZO 11

¹Kho inywe mulonde eshilolelo shianje shinga olwa nasi enondanga eshilolelo shia Kristo.

²Isie emwitsoomia inywe shichila munzitsulilanga buli lwosi mumakhuwa koosi nimuhanda khumechesio kene shinga olwa ndamuhelesia.

³Habula ndenya mumanye mbu, Kristo niye omurwe okwa buli omusaatsa. Naye omusaatsa, niye omurwe okwomukhasi. Naye Nyasaye niye omurwe kwa Kristo.

⁴Kho omusaatsa yesi nasaaya noho nayaala oburume bwamakhuwa aka Nyasaye nafuuniishe omurwekwe afwimbinjia Kristo omurwe.

⁵Naye omukhasi yesi nasaaya noho nayaala oburume bwamakhuwa aka Nyasaye, nalefuunishe omurwekwe ta, afwimbinjia omusaatsawe omurwe; obwahukhani bubulaho hakariwe nende omukhasi oubechilwe liswi.

⁶Omukhasi nalafuunikha omurwekwe ta, okhuula abeche liswilie. Ne okhuba naketsisoni omukhasi okhubekwa noho okhutetwa liswilie; okhuula yefunishe omurwekwe.

⁷Omusaatsa shiakhoyile okhufunikha omurwekwe ta, shichila ye alolesinjia obukondo nende oluyali lwa Nyasaye. Nebutswa omukhasi alolesinjia oluyali lwomusaatsawe;

⁸shichila omusaatsa shiyalongwa okhurula khumukhasi ta, habula omukhasi niye owarula khumusaatsa.

⁹Kata kario, omusaatsa shiyalongwa khulwa omukhasi ta, habula omukhasi niye owalongwa khulwa omusaatsa.

¹⁰Khulweshifune shino nende khulwa okhubela abamalaika, omukhasi akhoyile okhufunikha omurwekwe khulwa okhumanyia mbu, ali hasi wobunyali bwomusaatsawe.

¹¹Nebutswa mukhumenya khwefwe mu Omwami, omukhasi shiakhoyile okhumenya naleleeta khumusaatsa tawe, khandi omusaatsa yesi shianyala okhumenya naleleeta khumukhasi tawe.

¹²Okhuba shinga omukhasi yalongwa okhurula khumusaatsa, munjila ndala eyo, omusaatsa yesi yebulwa nomukhasi. Naye Nyasaye niye oukholanga ebindu biosi okhubaho.

¹³Abeene boolekhwo, kali habwene omukhasi okhusaaya Nyasaye nalefuunishekhwo eshindu shiosi khumurwe?

¹⁴Ne kata shimulola mbu imelo yene yoburulanda yimwechesinjia mbu naketsisoni omusaatsa okhuba neliswi lirambi,

¹⁵nebutswa khumukhasi liswi lirambi neshindu shiokhuchamisia. Yahelesibwa liswi lirambi kho libetsenje eshifuunikho khumurwekwe.

¹⁶Ne omundu yesi naba nayingana khu kano, akemboola kali mbu ifwe nende abetsikanisa etsia Nyasaye tsiosi shikhuliikhwo nomwima kundi okwahukhane khukuno mukhwinamila Nyasaye tawe.

¹⁷Mumebaalo kaloondakhwo kano, shienyala okhumwitsoomiakhwo tawe, shichila mumikhung'ano chienywe echiobusaayi shichimumeetanga obulayi ta, habula obubi.

¹⁸Eliambeli, embulilanga mbu, olwa mukhung'ananga shinga abeikanisa obukabukhani bubetsangaho hakari wenywe, ne siesi esuubila mbu kanyala okhuba nikali kario.

¹⁹Ne obwahukhani okhuula bubeho mwinywe, kho mbu abobwatieli bamanyishe obulayi.

²⁰Olwa mukhung'ananga halala mung'anda shimulitsanga lisabo elia Omwami tawe;

²¹shichila mukhulia khwenywe buli mundu ayuyukhananga naranjilila okhwibukulila ebiokhuliabie yenyene, kho mbu abandi nibashili inzala abandi babetsanga bamalile okhumeela.

²²Nimakhuwa shiina kano? Shimunyala okhulia noho okhunywa nimuli inango wenywe ta? Noho mwenyanga okhulechelesia ikanisa ya Nyasaye nende okhubafimbia emirwe abo abali nobuha? Kho emuboolele shiina? Emwitsoomie mumakhuwa kano? Tawe; shiemwitsoomia tawe!

²³Okhuba amechesio akandanyoola okhurula khu Omwami niko aka ndamuhelesia mbu, Omwami Yesu mushilo shiene eshia yakhobelwakhwo, yabukula omukaate,

²⁴nakhupila Nyasaye orio, nakusonyola, mana naboola ari, “Kuno nomubili kwanje, okuliho khulwenywe, mukholenje murio khulwa okhunzitsulila.”

²⁵Munjila ndala eyo nibamalile okhulia, yabukula eshikombe naboola ari, “Eshikombe shino neyindakano eya Nyasaye imbia, eyili eshibalikho shiamabanga kanje, buli lwosi olwa munywakhwo, mukholenje murio khulwa okhunzitsulila.”

²⁶Kano kamanyia mbu buli lwosi olwa mulia omukaate kuno khandi nimunywa khushikombe shino, murumbulanga okhufwa okhwa Omwami okhuula olwa alikalukha.

²⁷Khulweshio omundu yesi naba nalia omukaate okwa Omwami kata okhunywakhwo eshikombe eshia Omwami, ne nalakwaniile ta, alaba niyonoonele omubili nende amabanga aka Omwami.

²⁸Kho buli mundu yehenjelesie omwene mbelio, mana alie khumukaate nende okhunywa khushikombe eshio.

²⁹Okhuba nalanyala okhumanyilisia eshisina eshiomubili okwa Omwami olwa aba nalia omukaate khandi nanywa eshikombe, yekhalachilanga eshiina omwene.

³⁰Kano niko akachilanga abanji khwinywe nibali abateshele khandi nibalwala, ne abandi bamala okhufwa.

³¹Nikakhabele mbu, khuranjililanga okhwihenjelesia abeene, shikhwakhabele mukhukhalachilwa eshiina shia Nyasaye tawe.

³²Nebutswa ifwe khukhalachilungwa eshiina nikhuhebwa eshinyasio nende Omwami, kho mbu khuleshe okhukhalachilwa eshiina halala nende abeshialo.

³³Kho bulano, baana befwe, olwa mukhung'ana halala okhulia lisabo elia Omwami, mulindanenje.

³⁴Ne naliho yesi ouli neinzala, akhoya okhulia ebiokhulia nashili ingowe, kho Nyasaye aleshe okhumukhalachila eshiina olwa muba nimukhung'ana halala. Ne amakhuwa kandi koosi ndakhakololosie omwene olwa nanditse eyo.