Read wanga 1 ABAKORINZO 12 Bible Online

1 ABAKORINZO 12 - wanga bible

1 ABAKORINZO 12

¹Ne bulano okhulondana namakhuwa akebihaanwa bia Roho, shinzenya mukorwe ta baana befwe.

²Mumanyile mbu olwa mwali nimushili okhumanya Nyasaye mwemililungwa nimukora munjila tsinyinji khulwa okhwinamila ebifwanani ebilali ebilamu ta.

³Enzenya mumanye mbu abulaho omundu yesi yesi owakhaboola mbu, “Yesu alimushilaamo shiobubi,” nalemililwe nende Roho wa Nyasaye ta, khandi abulaho owakheyama mbu, “Yesu niye Omwami” nalemililwe nende Roho Omutakatifu tawe.

⁴Biliho ebihaanwa bieshiroho ebiaukhane, nebutswa Roho nimulala mwene oyo oubihananga biosi.

⁵Buliho obukhalabani obwahukhane, nebutswa Omwami nimulala mwene oyo niye oukhalabanilungwa.

⁶Buliho obunyali obwahukhane mubukhalabani, nebutswa Nyasaye nimulala oyo niye ouhaananga obunyali obwo khuboosi okhukhola omulimo.

⁷Nyasaye ahelesinjia buli mundu obunyali bwokhubaho khwa Roho khulwa okhwikhonyelwa okhukhoonya abasuubili boosi.

⁸Roho oyo ahelesinjia omundu mulala likhuwa liitsulemwo obuchesi, ne khuwundi, Roho mulala oyo ahaananga likhuwa liitsulemwo obumanyilisi.

⁹Roho wobunyali owatsana oyo ahaananga khumundu mulala obusuubili, ne khuwundi ahaana obunyali bwokhuhonia.

¹⁰Roho oyo ahelesinjia omundu obunyali bwokhukhola akamakana; ne khuwundi, eshihaanwa shiobulakusi, ne khuwundi obunyali bwokhwahukhasia ebihaanwa ebirula khu Roho oyo nende ebilali ebia Roho tsana oyo ta. Khumundu mulala ahaananga obunyali bwokhuboolela mutsinimi tsinjeni, ne khuwundi ahaana obunyali bwokhwinoosia akaboolilwe mutsinimi etsio.

¹¹Nebutswa Roho nimulala mwene oyo oukholanga kano koosi; kho mukhuchamakhwe ahaananga eshihaanwa eshiaukhane khubuli mundu.

¹²Kristo ali shinga omubili mulala, okuli nebiungo ebinji, kata nikaba mbu kuli nebiungo ebinji ebiaukhane khushili butswa omubili mulala.

¹³Munjila ndala eyo, ifwe fwesi, khube Abayahudi noho Abamahanga, khube abasumba noho abalekhuule Roho mulala oyo yakhubatiisia mumubili mulala; mana fwesi khwanywesibwa Roho mulala oyo.

¹⁴Okhuba omubili kwene shikwalongwa neshiungo shilala shionyene tawe, nebutswa ebiungo ebinji.

¹⁵Eshilenje nishiakhakana mbu, “Shichila shiendi omukhono ta, kho shiendi eshiungo eshiokhumubili ta;” eliene elo shiliakhachila shiakhaywa okhuba eshiungo shiokhumubili okwo tawe.

¹⁶Nashio eshirwi nishiakhakana shiri, “Shichila shiendi imoni ta, kho shiedi eshiungo eshiokhumubili ta;” eliene elo shiliakhachila shiakhaywa okhuba eshiungo shiokhumubili okwo tawe.

¹⁷Bulano omubili kwosi nikwakhabeele butswa imoni, kho kwakhahulile kurie? Ne nikhwakhabele butswa eshirwi shionyene, khwakhahunyilisiye khurie?

¹⁸Ne shinga olwa kali, Nyasaye yara khumubili eshiungo eshiaukhaane shinga lwomwene yachama butswa shibe.

¹⁹Kho omubili shikwakhabeleho ta, nikakhabele mbu kwosi kuli butswa eshiungo shilala shionyene!

²⁰Ne shinga olwa kali bulano, biliho ebiungo ebinji nebutswa omubili mulala.

²¹Kho bulano imoni shiyinyala okhukania omukhono mbu, “Isie shikhwenya iwe tawe!” Noho omurwe kukanie ebilenje mbu, “Shimwenya inywe tawe!”

²²Shikakhaba kario tawe, ifwe shikhunyala okhumenya khurio nikhulali nebiungo ebilolekhanga okhuba ebiteshele tawe.

²³Ne ebiungo biomubili biakhupaaranga mbu bibula oluyali kata lutiti, ebiene ebio nibio ebia khulindanga noluyali olukhongo; ne nabio ebiungo ebilalolekhanga okhuba ebilayi ta; nibio ebiakhulindanga obulayi bwene,

²⁴nabio ebiungo ebibachamisia ebio shibikhoyeele okhulindwa birio ta. Nyasaye omwene yalimasia omubili halala obulayi munjila eyo okhukhumeeta oluyali olukhongo khubiungo ebio ebibula oluyali.

²⁵Kho neshichila obwahukhani nibubulaho mumubili, nebutswa ebiungo biakwo ebiaukhane bileetananga.

²⁶Ne eshiungo shilala eshiokhumubili nishisalila, ebiungo bindi biosi khumubili bisalila halala ninashio; ne eshiungo shilala nishiakhetsoomibwa, ebiungo bindi bisanjilana ninashio mukhwikhoya khwashio.

²⁷Inywe mwesi pe muli omubili kwa Kristo, ne shiamulala neshiungo shiakwo.

²⁸Nyasaye yaraho abandu boosi mukanisa: abambeli nibo abarume, abakhabili abalakusi, abakhataru abechesi, mana abakholanga akamakana, nibaloondwakhwo, abobunyali bwokhuhonia, abokhukhoonya abashiabwe, abali neshihaanwa eshiobwimilisi noho shiokhuboola mutsinimi.

²⁹Mana boosi nabarume? Noho boosi nabalakusi? Boosi nabechesia? Boosi bali nobunyali bwokhukhola akamakana?

³⁰Mana boosi bali nobunyali bwokhuhonia abalwale? Boosi bali nobunyali bwokhuboola mutsinimi tsindi? Boosi bali nobunyali bwokhukalula akaboolilwe mutsinimi tsindi?

³¹Khulweshio muchoomie amapaaro kenywe khubihaanwa ebioluyali olukhongo. Ne bulano enzenya okhumumanyia injila indayi okhushila tsiosi.