Read wanga 1 ABAKORINZO 13 Bible Online

1 ABAKORINZO 13 - wanga bible

1 ABAKORINZO 13

¹Kata nimba nimboolela mutsinimi tsiabandu nende tsiabamalaika, ne nimbula obuheeli emba niyochelanga shinga omukasa okusaalanga butswa noho oluyoka lwebikhuli.

²Enyala okhuba neshihaanwa eshiokhuyaala nobunyali bwa Roho; enyala okhuba nobuchesi bwosi khandi okhumanyilisia amabiso koosi; enyala okhuba nobusuubili bwosi obwakhanyala okhusiula tsingulu, ne nimbula obuheeli, shiendi eshindu tawe.

³Kata nindakhakaba ebindu bianje biosi, kata nindakhahaana omubili kwanje okhusambwa mumulilo, ne nimbula obuheeli, shikakhangasilakhwo eshindu shiosi ta.

⁴Obuheeli nobwisimilisi khandi nobweshisa; shibuli neyimbalikha kata okhwilola noho okhwichinjimisia tawe;

⁵obuheeli shibuli nebiima ebibi kata okhwiyenyela noho okhusinyikha tawe.

⁶Obuheeli shibusangalilanga obumayanu tawe; nebutswa busangalilanga obwatoto.

⁷Obuheeli shibufwitsanga omwoyo tawe; nabwo obusuubili bwabwo, obunaayi nende obwisimilisi shibikhayungwa kata nahatuutu tawe.

⁸Obuheeli bubetsangaho inziayo. Buliho obulakusi obwakhoole khushiakamo, khandi biliho ebihaanea ebiokhuboolela munimi tsinjeni nebutswa biosi khandi biakhoole khushiakamo; obuchesi buliho nebutswa bwakhahweho.

⁹Okhuba ebihaanwa biefwe ebiobumanyilisi nende ebiobulakusi nebilemu.

¹⁰Ne olwa eshihaanwa eshili eshilamba shilitsa, ne eshio eshili eshileemu shihwaho.

¹¹Ne olwa ndali nindi omwana, okhuboola khwanje, okhupaara khwanje nende okhuyililisia khwanje khwali shinga okhwomwana, ne bulano olwa endi omundu oukhulile, ndaleshile akolwana.

¹²Aka ifwe khulolanga bulano kali shinga amaweliweli butswa, mushiilolelo, ne olunyuma khulilolana habwene mumoni nomumoni; aka emanyile bulano namaleemu, ne olwene olwo, kakhabe amalamba shinga olwa Nyasaye yaamanyila isie elala.

¹³Bulano akaliho ni kataru kano, mbu obusuubili, obunaayi, nobuheeli. Ne likhulundu mukoosi nobuheeli.