Read wanga 1 ABAKORINZO 14 Bible Online

1 ABAKORINZO 14 - wanga bible

1 ABAKORINZO 14

¹Kho muteeme shinga olwa munyala okhushila ebindu bindi biosi okhuba nomwoyo kwokhuheelana. Murekhwo omwoyo okhuba nobunyali obwa Roho ahaananga mubihaanwa, ne okhushila muno okhunyalilwa okhuyaala oburume bwamakhuwa aka Nyasaye.

²Okhuba oyo ouboolela mutsinimi tsinjeni shiaboolanga nabandu ta, habula aboolanga nende Nyasaye, shichila abulaho oumanyilisianjia kaboola tawe. Mubunyali bwa Roho arumbulanga amabiso akobwatoto.

³Nebutswa oyo ouyaala oburume obwamakhuwa aka Nyasaye aboolelanga abandu amakhuwa akanyala okhubatinyisia, okhubachetsiyia nende okhubaleemia emioyo chiabwe.

⁴Oyo ouboolela mutsinimi tsinjeni yeyumbakhanga omwene yenyene, nebutswa oyo ouyaala oburume obwamakhuwa aka Nyasaye yombokhanga abeikanisa boosi.

⁵Nasi ndakhekoomba mbu mwesi muboolele mutsinimi tsinjeni; nebutswa bwakhaba obulayi mbu mube neshihaanwa eshiokhuyaala oburume bwamakhuwa aka Nyasaye. Okhuba omwenoyo ouyaala oburume bwamakhuwa ka Nyasaye nowobukhoonyi obukali okhushila oyo ouboolela mutsinimi tsinjeni, okhuula oundi abeho owokhukalula akaboolilwe mutsinimi tsinjeni ako, kho mbu abeikanisa boosi batinyisibwe.

⁶Kho ndakhamukasila shiina baana befwe, nindakhetsa khwinywe nimboolanga mutsinimi tsinjeni? Kata nahatutu ta, fwana nimba nimuboolelanga amalolelo akarula khu Nyasaye noho obuchesi noho oburume obuchomeshe noho amechesio.

⁷Kata nikaba mbu ebindu biamayoosi shinga lilele noho litungu ebibula obulamu nibilayinia amayoosi kabio akolwimbo obulayi ta, omundu yakhamanya arie olwimbo olwimbungwa?

⁸Naye omundu oukhupanga olwika nalayinia amayoosi kokhulanjilisia obulayi ta, owakherechekha okhutsia mwihe niwiina?

⁹Nolwa kali kario khwinywe, nimuba nimuboolela mutsinimi tsinjeni tsilahulilikha ta, omundu yesi yakhamanya arie akamuboolanga? Akamuboola kaba nikatsitsanga butswa mumuyeka.

¹⁰Nakatoto mbu tsiliho tsinimi tsinyinji mushialo, nebutswa lubulaho khutsio olulali neshisina tawe;

¹¹nebutswa nendamanyile eshisina shiolulimi luboolungwa ta, omundu ouluboolanga aba omucheni khwisie, nasi khandi emba omucheni khuye.

¹²Kho olwa inywe abeene mwikombanga okhuba nebihaanwa bia Roho, okhuula muteeme shinga olwa munyala okhwikhoonyela ebihaanwa ebio khulwa okhumbakha abeikanisa boosi.

¹³Khulweshio, omundu ouboola mutsinimi tsinjeni okhuula asabe ahebwe eshihaanwa shiokhukalula kaba naboolanga.

¹⁴Okhuba nimba nisaaya mululimi olucheni, roho yanje niyo eyiba niyisaayanga butswa, nebutswa amapaaro kanje shikaba nikali halali ninayo tawe.

¹⁵Kho okhuula ekhole shiina? Ekhoyile okhusaaya mu roho, nende mumapaaro kanje. Ekhoyile okhwimba mu roho, nende mumapaaro kanje.

¹⁶Kho lwokhupa orio khu Nyasaye mu rohoyo yonyene, omundu namundu anyala arie okhusanjilana ninawe mukhuboola ari, “Amina,” olwa aba nalamanyile eshioboolilenje mumasaayo ako ta?

¹⁷Kata amasaayoko akokhuupa orio ako, nikaba amalayi toto, omundu undi oyo shiaba nakhoonyilwe tawe.

¹⁸Ekhupila Nyasaye orio, shichila emboolelanga mutsinimi tsinjeni muno okhushila inywe mwesi.

¹⁹Nebutswa mumukhung'ano kweikanisa, nobulayi emboole amakhuwa karano, akanyala okhuhulilikha khulwa okhwechesia abandi, okhushila okhuboola amakhuwa eshikhumila (1,000) mutsinimi tsinjeni.

²⁰Baana befwe, mulabe shinga abaana mumapaaro kenywe tawe. Ne okhulondokhana nende akobwonooni, mube shinga abaana abatuutu, nebutswa mukhuyililisia khwenywe okhuula mube shinga abandu abakhulile.

²¹Kahandikwa mumahandiko mbu, Omwami aboola ari, “Ndalekhoonyela abandu ababoola mutsinimi tsinjeni, okhuboola nende abandu banje. Ndalaboola ninabo okhubirira muminwa chiabandu abacheni, nebutswa kata kario, abandu banje beene shibalambulila tawe.”

²²Kho bulano eshihaanwa shiokhuboola mutsinimi tsinjeni, neshilolelo khu abashili okhusuubila, tawe khu abamala okhusuubila. Nashio eshihaanwa shiokhuyaala oburume bwamakhuwa ka Nyasaye, neshilolelo khu abasuubila, tawe khu abashili okhusuubila.

²³Kho nikaba mbu, ikanisa yosi yikhung'ana halala, ne buli mundu achaache okhuboola mutsinimi tsinjeni, mana abandu bandi, noho abashili okhusuubila benjilemwo, bakhachweya okhuboola mbu, inywe mulaluushe?

²⁴Nebutswa nikaba mbu, buli mundu ayaala oburume bwamakhuwa ka Nyasaye, mana oushili okhusuubila oyo, noho oundi yesi yesi niyenjilamwo, alafuchilila habulafu obwonoonibwe khulwa amakhuwa kalahulila. Aka aba nahuliile ako koosi kalamukhalachila eshiina.

²⁵Akamasiliisi komumwoyokwe kalabakalwa habulafu, naye alenamia obwenibwe hasi khulwa okhumwinamila Nyasaye, nafuchilila naboola ari, “Toto mwene Nyasaye ali hano mwinywe!”

²⁶Baana befwe, akenzinoosinjia ngakano mbu, olwa mukhung'ana halala okhusaaya, omundu mulala abe nolwimbo, oundi nende obwibaali, oundi lilolelo okhurula khu Nyasaye, oundi oburume mutsinimi tsinjeni, naye oundi anyala okhukalula akaboolwa mutsinimi tsinjeni. Koosi akamukhola okhuula kabe akobukhoonyi bwokhutinyisia ikanisa.

²⁷Nikakhaba mbu, omundu aboolela mutsinimi tsinjeni, okhuula babe babili noho bataru abafuchililwa okhuboola nibalondana; okhuula abeho oundi oukalula akaba nikaboolungwa ako.

²⁸Nebutswa omundu nalaliho ounyala okhukalula, kho omundu oyo ouboolanga mutsinimi tsinjeni okhuula aholeele mana yeboolele masilisi ye omwene nende Nyasaye.

²⁹Abandu babili noho bataru abahelesiibwe oburume obwa Amakhuwa ka Nyasaye bakhoya okhuyaala nabo abandi bakhoyile okhurechelesia nibamanyilisia obulayi akaboolungwa.

³⁰Nebutswa omundu undi owikhale mumukhung'ano niyakhanyoola oburume okhurula khu Nyasaye, oyo ouba nayaalanga okhuula aholeele mbelio.

³¹Inywe mwesi pe munyala okhuyaala oburume bwa Nyasaye shiamulala mulala, mana abalimwo boosi beche amakhuwa khandi batinyisibwe.

³²Eshihaanwa shiokhuyaala oburume bwa Nyasaye okhuula shibe hasi wobunyali bwa oyo ouyaalanga.

³³Shichila Nyasaye shiafuchililanga mbu, khukhole ebindu mubukoyanu ta, habula mubwongoli nende mumulembe. Ne shinga olwa kali mutsikanisa tsiosi tsiabakristo,

³⁴abakhasi bakhoyile okhuholelanga tsi mumikhung'ano echia Abakristo. Shibafuchililwa okhuboola ta, okhuula bahulilenje nobwongoli shinga olwa amalako aka Abayahudi kaboolanga.

³⁵Nibakhenya okhumanya likhuwa liosi liosi bakhoya okhureeba abasaatsa babwe ingo. Okhuba neshifimbwa murwe omukhasi okhuboola mumukhung'ano kweikanisa.

³⁶Noho mupaaranga mbu likhuwa lia Nyasaye liachachila khwinywe? Noho mbu ninywe mwenyene abalietsela?

³⁷Omundu yesi owilolanga mbu, nomurumwa wa Nyasaye noho mbu ali neshihaanwa eshia Roho, okhuula amanye khandi afuchilile mbu, aka emuhandichilanga kano nelilako elia Omwami.

³⁸Ne yesi oulafuchilila kano ta, kho mwesi shimulamufuchilila tawe.

³⁹Khulweshio, baana befwe, mubetsenje nobuha bwokhuyaala oburume bwa Nyasaye, nebutswa mulakaanie abo ababoola mutsinimi tsinjeni tawe.

⁴⁰Habula amakhuwa koosi okhuula kakholwe munjila indayi khandi mubuloosie obulayi.