Read wanga 1 ABAKORINZO 15 Bible Online

1 ABAKORINZO 15 - wanga bible

1 ABAKORINZO 15

¹Ne bulano abaana befwe, enzenya okhumwitsusia khu aka Injiili eya ndamuyalila, nenywe nimuchifuchilila khandi nimuralila muyo.

²Yino niyo Injiili eyoburume eyandamuyaalila. Mwahonibwa khulwa okhuhanda khu Injiili yatsana eyo. Habula fwana obusuubili bwenywe nibuba nibwali obweshikhaya butswa.

³Isie ndamuhelesia ako aka nasi ndahebwa, akali amakhongo okhushila; mbu Kristo yafwila obwonooni bwefwe shinga kahandikwa mu Amahandiko;

⁴mbu yayabilwa mana nalamukha olunyuma lwetsinyanga tsitaru shinga kahandikwa mu Amahandiko;

⁵yaloleshela Petero, mana khandi khubarume ekhumi nababili boosi.

⁶Mana khandi nalolekha khabalondibe abashila ebikhumi biraano, abanji khubo bashiliho abalamu, nabandi khubo bafwa.

⁷Mana naloleshela Yakobo, ne olunyumakhwo khubarume boosi.

⁸Ne olunyuma olwa abo boosi yandoleshela isie siesi khandi, ouli shinga owebulwa tsinyanga nitsishili.

⁹Okhuba isie endi omutiiti khubarume boosi. Kata isie shingwanile okhulangwa omurume ta, shichila ndasandia ikanisa ya Nyasaye.

¹⁰Ne khulwa obukoosia bwa Nyasaye endi shinga olwa endi bulano, kata obukoosiabwe obwa ndahelesibwa shibwali obwa butswa tawe. Kata kario, isie ndanyakhana nikhola emilimo okhushilakhwo abarume bandi boosi, ne shindi isie owachikholanga ta, habula obukoosia obwa Nyasaye bwali nibukholelanga mwisie.

¹¹Kho kata nikaba nikarula khwisie noho nikarula khubo, kano koosi niko aka fwesi khuyaalanga khandi kano niko aka musuubilanga.

¹²Kho bulano oburume bwefwe buli mbu, Kristo yalamusibwa okhurula mukhufwa, kho eshichilanga abandi khwinywe nibaboola mbu, abafu shibalilamusibwa ta nishiina?

¹³Nebutswa nikaba mbu, obulamushi bwabafu shibuliho ta, kho Kristo shiaba niyalamusibwa ta,

¹⁴ne Kristo naba nalalamusibwa okhurula mukhufwa ta, kho oburume bwakhuyaalanga nende obusuubili bwenywe mu Kristo buba nibubula eshifune.

¹⁵Okhushila ako nefu khunyoolekhanga nikhuli shinga abarumbulanga akobubeeyi khu Nyasaye, shichila khwaboola akobuloli mbu, Nyasaye yalamusia Kristo okhurula mukhufwa, nebutswa nikaba toto abafu shibalilamusibwa ta, kho Nyasaye shiyalamusia Kristo tawe.

¹⁶Okhuba abafu nibalalamusibwa ta, kho Kristo yesi shiyalamusibwa tawe.

¹⁷Ne Kristo naba nalalamusibwa ta, kho obusuubili bwenywe nobwa butswa, khandi muba mushikorere butswa mubwonooni bwenywe.

¹⁸Khandi kaba kamanyia mbu, abo abafwa nibasuubila mu Kristo bamala okhutiba.

¹⁹Ne nikaba mbu, obunaayi bwefwe mu Kristo nobwomubulamu buno bwonyene, kho khuba nikhukhoyile okhubeleelelwakhwo okhushila abandu bandi boosi mushialo.

²⁰Nebutswa akatoto kali mbu, Nyasaye yalamusia Kristo okhurula mukhufwa, niye owambeli okhulamusibwa okhurula mubafu

²¹Okhuba shinga olufu lwetsa okhubirira mumundu mulala, nolwa khandi okhulamusibwa okhurula mukhufwa khwetsa okhubirira mumundu mulala khurio.

²²Okhuba shinga abandu boosi olwa bafwila mu Adamu, nolwa boosi khandi balilamusilibwa mu Kristo bario.

²³Nebutswa buli mulala alalamusibwa mutsisinjitsie. Kristo mbelio; mana mukhwitsakhwe abali aba Kristo.

²⁴Mana obumalilishi bulitsa, olwa alihula oburuchi bwosi bweshiroho, obwami nende obunyali mana nahelesia Nyasaye Samwana oburuchi.

²⁵Okhuba Kristo okhuula aruche okhuula olwa Nyasaye alaba nahulile abasukube boosi, mana nabarele hasi wamakulu ka Kristo.

²⁶Ne omusuku oulihulwa mukhumalilikha nolufu.

²⁷Okhuba Amahandiko kaboola mbu, “Nyasaye yara ebindu biosi hasi wamakuluke.” Kho kali habulafu mbu, amakhuwa mbu “ebindu biosi” shikabasilinjiamwo Nyasaye mwene, ouretsanga ebindu biosi hasi wobunyali obwa Kristo tawe.

²⁸Nebutswa olwa ebindu biosi bilaba nibireerwe hasi woburuchi bwa Kristo, kho nolwa ye omwene ouli Omwana, yakhalekhuule hasi oburuchi bwa Nyasaye, owara ebindu biosi hasi woburuchibwe; naye Nyasaye alaruchila elala boosi.

²⁹Ne kho obulamushi bwabafu nibulaliho ta, balakhola barie abo, ababatiisibwa khulwa abafu? Eshiabanayanga okhunyoola nishiina? Nikali mbu nakatoto shinga abandi baboolanga mbu, abafu shibalamusibwa ta; kho eshichilanga abo nibabatiisibwa khulwabwe nishiina?

³⁰Nefu fwesi khulwa shiina khwiretsanga mumasila buli khase?

³¹Baana befwe, buli nyanga ndakananga nolufu! Ne okhwiyitsoomia khwendi ninakhwo mwinywe mu Kristo Yesu Omwami wefwe, khuchilanga nirumbula kano.

³²Nikakhaba mbu lichoomo lianje liali lieshinamundu butswa, kho okhulwana khwanje netsisolo nabulimo tsimbalaba Efeso hano khwakhangasila shiina? Nikali mbu abafu shibalamusibungwa ta, kho, “Chende khulie nikhunywa, okhuba mukamba khulafwa.”

³³Muleshe okhusiluhasibwa. “Okhuchenda nababi khwonooninjia ebiima ebilayi.”

³⁴Labe tsimoni mana muleshe tsinjila tsienywe etsiobwonooni. Abandi khwinywe shibamanyile Nyasaye tawe. Emboola kano khulwa okhumufimbia omurwe.

³⁵Omundu anyala okhureeba ari, “Abafu balamusibwa barie? Ne nomubili shiina okwa balilamusibwa ninakwo?”

³⁶Ako namareebo kobusilu! Olwa oraakanga imwo mwiloba shiyirulangamwo inamu niyilafwiile ta!

³⁷Ne eshioraakanga neyimwo butswa, yinyala okhuba yeingano noho yeimbia yindi, shishibetsanga eshiraache eshilamba eshilikhula olunyuma tawe.

³⁸Ne Nyasaye ahelesinjia imwo eyo omubili kwomwene achama, buli imwo nomubili kwayo eyene.

³⁹Okhuba emibili chiosi shichifwanananga tawe, kuliho okwabandu, ne okundi kuliho okwetsisolo, ne okundi okwa amanyonyi, ne okundi okwa tsinyeni.

⁴⁰Khandi chiliho emibili chindi chiomwikulu nachio echindi echieshinashialo; ne oluyali lwemibili echio mwikulu lwahukhane nende oluyali lwemibili chieshinashialo.

⁴¹Eliuba lili noluyali lwalio, nakwo omwesi noluyali lundi; ne kata khandi tsing'ining'ini noluyali lwahukhane; okhuba khandi mutsing'ining'ini tsiosi, ndala yinyala okhwahukhana neyindi muluyali.

⁴²Nolwa kaliba kario olwa abafu balilamusibwa. Olwa omubili kuyabilwa, kufwa; ne olwa kulamusibwa, kuba omulamu.

⁴³Kuyabilwa munjila yokhufwolwa nebutswa kulamusibwa muluyali; kuyabilwa mubuteshele, nebutswa kulamusibwa mubunyali;

⁴⁴kuyabilwa nikuli omubili kwoburulanda; nebutswa kulamusibwa nikuli kweshiroho. Nikuba nikulikhoho omubili kwoburulanda, kuliho khandi omubili kweshiroho.

⁴⁵Okhuba Amahandiko kaboolanga kari, “Omundu owambeli Adamu, yalongwa nali omulamu”; naye Adamu owobumalilishi niye Roho ouhaananga obulamu.

⁴⁶Ne shikuli omubili kweshiroho okwaranjilila okhubaho ta, habula okwoburulanda, mana okweshiroho nikulondakhwo.

⁴⁷Adamu owambeli nowokhulufu lwokhushialo, naye Adamu wakhabili yarula mwikulu.

⁴⁸Abo abali abolufuu lwokhushialo bali shinga oyo owalongwa khulufu lwokhushialo. Abo abali abomwikulu bali shinga oyo owarula mwikulu.

⁴⁹Ne shinga olwa khwefwala likoondo lia oyo owolufu, nolwa khulifwala likoondo elia oyo owomwikulu khurio.

⁵⁰Baana befwe, eliemuboolelanga lili mbu, omubili nende amabanga shibinyala okhulaamilwa obwami bwa Nyasaye tawe. Kata eshifwitsanga shishinyala okhunyoola obulamu bwobumeli tawe.

⁵¹Ne lole, emubisulila libiso liobwatoto mbu: Ifwe fwesi shikhulifwa tawe, ne khulikalukhasibwa,

⁵²lwangu mushise shitiiti shinga olwa imoni yitematemanga, lwolwika lwokhumalilikha lulikhupwa; okhuba lwolwika lulikhupwa, abafu balilamusibwa ne shibalifwa khandi ta, fwesi khulikalukhasibwa.

⁵³Okhuba eshia imelo yokhufwa okhuula shiikalukhasie okhuba eshieimelo yobumeli, nashio eshifwitsanga okhuula shikalukhasie okhuba eshilafwitsanga ta.

⁵⁴Kho olwa kano kaliikholekha mbu, eshieimelo yokhufwa nishikalukhana okhuba eshiobumeli, habwenaho nilwo olwa Amahandiko kaliusibwa habwene mbu; “Okhufwa khumilishile elalala mukhuhula!”

⁵⁵“Iwe lifwa, obuhulibwo buli hena? Iwe lifwa, olubalalwo luli hena?”

⁵⁶Olubala lwokhufwa nobwonooni; nabwo obunyali bwonooni burula mumalako.

⁵⁷Nebutswa khumukhupile Nyasaye orio, oukhunyalilanga ifwe okhuhula khulwa Omwami wefwe Yesu Kristo.

⁵⁸Khulweshio, baana befwe abaheelwa, muralile ne shimulasikukha ta, buli lwosi mukholenje emilimo echia Omwami. Okhuba mumanyile mbu, mu Omwami emilimo chienywe shichili emikhaya butswa tawe.