Read wanga 1 ABAKORINZO 16 Bible Online

1 ABAKORINZO 16 - wanga bible

1 ABAKORINZO 16

¹Ne okhulondana nende omusololo kwamapesa kokhukhoonya abakristo bashiefwe abali Yudea, okhuula mwesi mukhole aka ndaboolela abetsikanisa tsili Galatia okhukhola.

²Buli khunyanga ya Isabato, buli mulala khwinywe okhuula abishenjekhwo halubeka amapesa okhulondana nobunji bwako shinga olwa akanyoolile, kho mbu okhusolola khuleshe okhubaho olwa ndiitsa.

³Ne olwa nditsayo ndalabahelesia tsibarwa tsiokhumanyisia abandu aba muliba nimwahule mana mubarume okhuyila eshihaanwa shienywe Yerusalemu.

⁴Ne nikaba nikanichilisia mbu, okhuula siesi enzieyo, kho emba ndalatsia ninabo.

⁵Nanditse okhumucheniha nimalile okhubirira Makedonia, okhuba ndirechekhanga okhubirirayo.

⁶Ne haundi nemenyekhwo ninenywe khulweshisekhwo, kata enyala okhumalilayo tsinyanga tsiomunyiri tsiosi. Mana munyala okhukhoonyakhwo namapesa akokhwikhoonyela khuluchendo lwanje hosi hosi aha emba nindenya okhutsia khandi.

⁷Okhuba shinzenya okhumulola butswa nimbiranga tawe; habula enaayanga okhumenyakhwo ninenywe oluhoono, Omwami naba nachama.

⁸ Nebutswa ndalamenyakhwo Efeso hano okhuula khunyanga eya Pendekote.

⁹Shichila obwiyangu bunyooleshe hano obulayi bwokhukholelamwo emilimo emikhongo khandi echikhoyile, kata abafukuli abanji nibaliho.

¹⁰Ne Timotseyo naba niyetsa ewamuli, mumwinjisie nomwoyo mulala, mana yehulile mbu yenjisibwe mwinywe, okhuba yesi akhalabanilanga Omwami shinga olwa siesi ekhalabalanga.

¹¹Kho omundu yesi yesi alalechelesia Timotseyo ta, habula mumukhoonye atsililile khuluchendolwe nomulembe, kho kachile akalushe ewa endi, okhuba emulindililanga okhwitsa halala nabakholi bashiefwe.

¹²Ne khumakhuwa aka Omwana wefwe Apolo, buli lwosi emutsuubanga mbu, yetse halala nende abaana befwe bandi amuchenihe, nebutswa ashili okhufuchilila okhwitsa eyo bulano. Niyetse olwa nanyoole obwiyangu.

¹³Mube meeso, muralile mubusuubili bwenywe; mube abeitswoni, khandi abamaani.

¹⁴Mukhole emilimo chienywe chiosi mubuheeli.

¹⁵Bulano baana befwe, mumanyile amakhuwa aka Sitefano nende abeinzuye, nibo abaranjilila okhuba Abakristo mu Akayia, mana behaana abeene okhukhalabanila abasuubila mu Nyasaye, kho emusaaya mbu nimuchama,

¹⁶mulonde imelo eyobwiimilisi bwabandu shinga abo, nende oundi yesi ouba nakholanga khandi nakhalabana halala ninabo.

¹⁷Ndikhoyile po khulwa okhwitsa khwa Sitefano, Faritunato nende Akaiko; shichila bakalukha mushilenje shienywe olwa mulaaliho ta.

¹⁸Mana basangasiye muno shinga olwa bamusangasia inywe. Muhulile aka bandu shinga abo baboola.

¹⁹Abetsikanisa tsiomulukongo lwa Asia barumile amashiesio kabwe khwinywe; Akwila nende Pirisila halala nende Abakristo bakhung'anilanga munzu mwabwe, boosi bamurumile amashiesio kabwe aka eshikristo nomwoyo kwosi.

²⁰Abakristo bashiefwe bali hano boosi bamushiesiye. Mushiesanie abeene khubeene namashiesio keshikristo.

²¹Isie Paulo nomukhono kwanje omwene, emuhandichila nemushiesia.

²²Omundu yesi oulaheela Omwami ta, abe neshilaamo shiobubi. Maranatsa, nilio mbu, Omwami wefwe itsa!

²³Obukoosia obwa Omwami wefwe Yesu Kristo bubetsenje ninenywe.

²⁴Obuheeli bwanje bubetsenje ninenywe mwesi mu Kristo Yesu. Amina!