Read wanga 1 ABAKORINZO 3 Bible Online

1 ABAKORINZO 3 - wanga bible

1 ABAKORINZO 3

¹Abaana befwe, akatoto kali mbu, shindakhaboolile ninenywe shinga ouboola nabandu abali nende Roho tawe, nebutswa ndaboola ninenywe shinga ouboola nende abali abomushialo muno, khandi shinga abashili abaana mubusuubili bweshikristo.

²Isie ndamunywesia amabeele, ne shindamulisia ebiliibwa ebiumilanu ta, shichila shimwali nimubiirechesheele tawe. Ne kata bulano mushili okhubiirecheshela;

³shichila mushimenyanga butswa shinga olwa abandu bomushialo muno bamenyanga. Shichila mbu imbalikha yishili mwinywe abeene khandi mushisoolananga abeene khubeene, kho kano kakhalolesia mbu mushili butswa abomushialo muno, ne mbu mushimenyile butswa okhulondana nende imelo yobomushialo shino?

⁴Okhuba olwa mulala khwinywe aboola ari, “Isie enondanga Paulo” ne oundi ari, “Isie enondanga Apolo,” shimuba nimukholanga butswa shinga abeshialo ta?

⁵Kho Apolo niwiina? Naye Paulo niwiina? Khuli butswa abakhalabani ba Nyasaye, abachila nimumusuubila. Buli mulala khwifwe akhalabananga butswa emilimo echia Omwami yamuhelesia okhukhola.

⁶Isie ndaraka imwo, naye Apolo natsushilila amaatsi khushirakwa eshio, nebutswa Nyasaye niye owachila eshirakwa eshio nishikhula.

⁷Kho oyo owaraka kata owotsushilila amaatsi, shibali eshindu ta, Nyasaye niye omukhongo khuboosi, shichila niye oukholanga ebiraache okhukhula.

⁸Obwahukhani shibuliho hakari wa ouraka nende outsushilila amaatsi tawe. Nyasaye alaruunga buli shiamulala okhuhelana nende emilimo echia yakhola.

⁹Okhuba ifwe khuli abasanjilani mumilimo chia Nyasaye, nenywe muli shinga omukunda kwa Nyasaye akholangamwo emilimo. Muli khandi shinga eliumbakho elia Nyasaye yombokhanga.

¹⁰Khulwa obukoosia obwa Nyasaye yambelesia, isie ndambokha omushinji shinga omumbashi omusitsa, mana oundi naye yombakhangakhwo. Kho buli mundu ayililisie obulayi shinga olwa yombokhangakhwo.

¹¹Nyasaye yamala okhuraho Yesu Kristo okhuba omushinji kwatsana yenyene, ne kubulaho omushinji kundi okwakhombakhwe khandi tawe.

¹²Abandu bandi balekhoonyela itsahabu noho ifetsa noho amachina kobukusi obutinyu okhumbakha khumushinji okwo; abandi nabo balekhoonyela emisaala noho obunyasi noho amakata.

¹³Nebutswa obulayi bwemilimo chiabuli mundu bwakhaloleshe khunyanga ya Kristo yilichibakala habulafu. Okhuba khunyanga eyo omulilo kulibuula emilimo chia buli shiamulala. Omulilo kulichela emilimo echio nende okhumanyia toto obulayi bwachio.

¹⁴Ne emilimo chiomundu yesi yombakha khumushinji okwo, nichiba nichichelwa ne nichilalala mumulilo ta, omumbashi oyo alinyoola omurungo.

¹⁵Ne emilimo chiomundu yesi nichiba nichiyia nichilala mumulilo, kho aba nakosiiye omurungokwe, nebutswa ye omwene alahonibwa, shinga ouba nahonokooshe okhubirira mumulilo okwo.

¹⁶Shimumanyile toto mbu, inywe muli Ihekalu ya Nyasaye, khandi mbu Roho wa Nyasaye amenyanga mwinywe ta?

¹⁷Kho omundu yesi naba niyakhasasia Ihekalu ya Nyasaye, naye Nyasaye alimusasia. Shichila Ihekalu ya Nyasaye neyindakatifu, ne ninywe Ihekaluye yatsana.

¹⁸Omundu yesi aleshe okhwisiluhasia omwene tawe. Nikaba ali mwinywe oupaaranga mbu nomuchesi khukomushialo muno, akhoya okhusiluhala khukeshialo kho mbu mana abe omuchesi watoto.

¹⁹Okhuba aka eshialo shino shilolanga okhuba obuchesi, imbeli wa Nyasaye nobusilu. Shinga Amahandiko kaboolanga mbu; “Nyasaye arekanga abachesi mubuchesichesi bwabwe;”

²⁰khandi Amahandiko kandi kaboola mbu, “Omwami yamanya mbu amapaaro kabachesi namakhaya butswa.”

²¹Kho bulano omundu yesi aleshe okhwiyitsialila akabandu banyala okhukhola. Okhuba ebindu biosi toto nebienywe.

²²Abe Paulo, noho Apolo, noho Petero, noho eshialo shino noho obulamu kata okhufwa, noho ebiliho bulano nende ebilibaho munyanga tsitsanga, bino biosi nebienywe,

²³nenywe muli aba Kristo, naye Kristo nowa Nyasaye.