Read wanga 1 ABAKORINZO 4 Bible Online

1 ABAKORINZO 4 - wanga bible

1 ABAKORINZO 4

¹Mukhoya okhukhupaarakhwo ifwe shinga abakhalabani ba Kristo abahelesibwa obusinjilili bwokhwechesia amabiso ka Nyasaye.

²Omusinjilili yenyekhanga anyooleshe nali omusuubilwa khu Omwamiwe.

³Ne khulwanje kali mbu, kata nimwakhaba inywe noho obukhalachi bundi bwosi bwabandu nibwakhakhalachila isie, shilili likhuwa likhongo tawe.

⁴Okhuba okhuyililisia khwanje khwomukari khuli habwene, halali kano shikamanyinjia mbu embula eshikha tawe. Omwami niye omwene oukhalakanga eshiina shianje.

⁵Khulweshio, inywe shimulakhalachila oundi yesi eshiina indukho niyishili okhuula tawe. Obukhalachi bwokhushihesi okhuula bulinde okhuula olwa Omwami yetsa, niye oulara habulafu amabiso akomumioyo akeshilima nende akabakale habulafu ako akabiswa khulwa amachoomo akali mumapaaro kabandu. Ne nilwo olwa shia buli mundu alinyoola okhwitsoomibwa okhurula khu Nyasaye.

⁶Baana befwe, khulwenywe, ndayekhonyele kano koosi khu Apolo nende khwisie omwene, nindikhoonyelanga ifwe babili shinga eshilolelo, kho mbu mube abanyala okhweka eshisina shiamakhuwa kano mbu, “Mulinde amalako akahandikwa.” Alabaho kata mulala owitsialila omundu mulala, ne nalechelesia oundi tawe.

⁷Oukhukholile iwe okhuba oweikulu okhushila abandi niwiina? Shiali Nyasaye owakhuhelesia ebia oli ninabio biosi? Kho nikali kario, eshiakhachila iwe niwiyitsiala shinga ebia oli ninabio ebio shibiarula khu Nyasaye nishiina ta?

⁸Inywe mwamala khale okhwikura! Mwamala khale okhuyindihala! Mwamala khale okhukwa abaruchi, olwa nefu khulali abaruchi tawe! Toto ndakhekoombile mbu mwaba abaruchi toto, kho kachile ifwe fwesi khube abaruchi halala ninenywe.

⁹Okhuba kalolekhanga khwisie mbu, Nyasaye yakhuhelesia ifwe abarume obwikhalo obumayanu, khuli shinga abandu abakhalachiilwe eshiina eshiokhufwila habulafu okhuba eshihenyehenye eshieshialo shiosi eshiabamalaika nende eshiabandu.

¹⁰Okhuba khulwa Kristo ifwe khuli abasilu; nebutswa inywe muli abachesi mu Kristo! Ifwe khuli abateshele, nebutswa inywe muli namani! Ifwe khuchayungwa, nebutswa inywe mukosibungwa!

¹¹Okhuula bulano khushihoonganga inzala nabwo obuloho nibukhulia; khwifwalanga amatasi, khukhupungwa; khandi khuyiyayiyanga nikhuchendachenda shinga ababula eshimenyo;

¹²abeene khwichonyinjia khulwa okhukhola emilimo emitinyu. Khubasabilanga tsikhabi abo abokhulamanga eshilaamo shiobubi, ne khwisimilisinjia olwa khusandibwa.

¹³Nikhunyekwa khukalusinjia nobuholo. Khuli butswa shinga omukhutsi kwokhushialo khuno; khuli butswa amakokha akokhushialo okhuula khubise bia bulano bino!

¹⁴Shiemuhandichilanga amakhuwa kano khulwa okhumufimbia omurwe ta, nebutswa emuhandichila khulwa okhumwechesia shinga abaana banje abaheelwa.

¹⁵Shichila kata nimuba nimuli nabeechesia abalabalikha ta, mukhumenya khwenywe khweshikristo, muli butswa nende Senywe mulala yenyene. Mu Kristo Yesu isie emalile okhwikhola senywe khulwokhumurelela Injiili.

¹⁶Kho nasi emutsuuba obutinyu mbu, bulano mulonde eshilolelo shianje.

¹⁷Khulweshifune shino, erumanga Timotseyo khwinywe, ouli omwana wanje omuheelwa khandi omusuubilwa mubulamu bweshikristo. Alamwitsusia inywe amechesio aka isie ndechesia mubulamu obuyia buno obwa Kristo Yesu mutsikanisa tsiosi habundu hosi.

¹⁸Abandi khwinywe mwakwiile abokhwichinjimisia, shichila mupaaranga mbu shinanditse okhumucheniha tawe.

¹⁹Omwami nachama, nanditse okhumucheniha lwangu luno, mana omwene emanyilisie obunyali bwabandu abechinjimisinjia abo bali ninabwo, tawe butswa amakhuwa akababoolanga.

²⁰Okhuba obwami bwa Nyasaye shibuli butswa obwamakhuwa konyene ta, habula nobwobunyali.

²¹Akamwikombanga nakaleena? Enzitse ewa muli nendi nolusaala noho nomwoyo kwobuheeli nende obuholo?