Read wanga 1 ABAKORINZO 5 Bible Online

1 ABAKORINZO 5 - wanga bible

1 ABAKORINZO 5

¹Kaboolungwa bulano mbu, eshifwabwi shiobuyilani shili mwinywe. Eshifwabwi eshishili kata okhunyoolekhakhwo mubamahanga, abalamanyile Nyasaye tawe. Emboolelungwa mbu, omundu ayilananga nomukhasi wa samwana.

²Kho bulano nenywe mwakhechinjimisia murie? Shikakhaba kario ta, inywe mukhoyile okhubeelelela eshikhole eshio. Ne omundu owakhola ako akhoya okhurusibwa mubusanji bwenywe.

³Okhuba kata isie nindilaliho ninenywe mumubili ta, endi ninenywe muroho, ne shinga ouliho ninenywe, emalile okhumukhalachila eshiina owakhola likhuwa elo.

⁴Emukhalachile muliira elia Omwami wefwe Yesu Kristo. Olwa muba nimukhung'anile halala, nayo roho yanje niyili ninenywe, mubunyali obwa Omwami wefwe Yesu,

⁵mukhoya okhuhaana omundu uno mubunyali bwa Setani, kho mbu omubilikwe kusasibwe, nayo rohoye yihonibwe khunyanga eya Omwami wefwe alikalukha.

⁶Shibuli obulayi inywe okhwichinjimisia tawe! Inywe mwamanya amakhuwa kaboolanga mbu, “Limela litiiti lifwimbinjia omuhayila kwosi okwobusie obunyoobe.”

⁷Okhuula mwisiiye nimurusia limela liakhale, eliobwonooni, kho mbu mube abasiiyikhu mana mulaba shinga omuhayila omuyia okulalimwo limela liosi liosi ta, shinga olwa emanyile muli murio. Okhuba omusango kwefwe okuli Kristo kwamala okhuhaanwa.

⁸Chende bulano khwikhoye nikhulia lisabo liefwe lia Pasaka, ne shikhulalilia nomukaate okulimwo limela liakhale eliobwonooni nende obumayanu ta, habula khulilie nomukaate okubulamwo limela, kwobweleleshe khandi obwatoto.

⁹Mubarwa eya ndamuhandichila eyo, ndamukania mbu, mulasanjilana nende abandu abayilani tawe.

¹⁰Ne shindaboolanga khubandu abalamanyile Nyasaye abali abayilani, noho abalang'u noho abefi, noho abenamilanga ebifwanani tawe. Okhulekha okhusanjilana ninabo okhuula murule mubulamu bweshialo shino.

¹¹Aka ndachomanga okhumuboolela kali mbu mulasanjilanakhwo nende omundu yesi owilanganga omwene mbu nomusuubili washienywe nebutswa nali omuyilani noho omulang'u noho owinamilanga ebifwanani noho owokhuchikha abashie noho omumesi noho omwifi tawe. Kata mulekhalekhwo okhulia halala nomundu oufwana ario tawe.

¹²Kata shikuli omulimo kwanje okhukhalachila abalali abeikanisa ya Kristo eshiina tawe.

¹³Nyasaye niye oulibakhalachila eshiina. Nebutswa inywe abeene mukhalachile abasanji bashienywe eshiina tawe. Shinga olwa Amahandiko kaboolanga mbu, “Rusie mumukunda kwenywe omundu omumayanu.”