Read wanga 1 ABAKORINZO 6 Bible Online

1 ABAKORINZO 6 - wanga bible

1 ABAKORINZO 6

¹Nikakhaba mbu mulala khwinywe asolana nomukristo washie, yakhatsalikha arie okhumuyila imbeli wabakhalachi beshiina abalamanyile Nyasaye ta, mushilenje shiokhulekha abakristo bashie bakaasie omulembe?

²Shimumanyile mbu abakristo balikhalachila abeshialo eshiina ta? Kho nikakhaba mbu, inywe munyala okhukhalachila abeshialo eshiina, shimuli abanyala okhukhalaka eshiina shiamakhuwa amatutu ta?

³Shimumanyile mbu, nifwe abalikhalachila abamalaika eshiina ta? Kho nikaba nikali kario, khukhoyile okhukhalaka kata eshiina shiamakhuwa aka buli inyanga!

⁴Amakhuwa shinga akene ako nikakhabaho mwakhakayila okhuyaasibwa nende abandu abalalikhwo nobusimbiilo bwosi mukanisa noho?

⁵Emboola endio khulwa okhumufimbia omurwe. Akatoto kali, mbu okhuula abekhwoho mwinywe omundu omuchesi ounyala okhukaasia omulembe hakari wabakristo bashienywe.

⁶Mushilenje shiokhukhola murio, omukristo mulala yenjililanga owashie mushina mana alekha abandu abalali abasuubili okhukhalaka eshiina eshio!

⁷Khulwa okhuba inywe mwinjililananga abene khubeene mushiina kamanyinjia mbu, mwakhayilwa elala. Shibwakhabeele obulayi khwinywe nimwakhafuchilila okhukholelwa amabi? Shibwakhabeele obulayi inywe nimwakhafuchilile okhunuulwa?

⁸Mushilenje shiakene ako, inywe abeene mukholelanga abashienywe obubi khandi munulananga abeene khubene, kata nende abaana benywe beene!

⁹Mumanyile toto mbu, abonooni shibalinjilila mubwami bwa Nyasaye tawe. Mulesiluhasie abeene tawe. Abandu abayilani, abenamilanga ebifwanani, ababeeyi, abatanyani,

¹⁰abeefi, abalang'u, abameesi, abachikhanga abashiabwe nende abanuuli, shibalinyoola obwami bwa Nyasaye tawe.

¹¹Abandi khwinywe mwalinji murio. Nebutswa mwamala okhusiiywa okhurula mubwonooni obwo; mwamala okhuhaanwa khu Nyasaye; mwamala okhukholwa abalunjishi khulwa Omwami Yesu Kristo nende khulwa Roho wa Nyasaye wefwe.

¹²Oundi naye anyala okhuboola ari, “Ndafuchililwa okhukhola eshindu shiosi shiosi.” Kali habwene, nebutswa shikali mbu buli shiashindu neshilayi khwiwe okhukhola tawe. Enyala okhuboola mbu ndafuchililwa okhukhola eshindu shiosi shiosi, nebutswa shienzia okhulekha eshindu shiosi shiikhole isie okhuba omusumba washio tawe.

¹³Omundu undi naye anyala okhuboola ari, “Eshiokhulia neshieinda, nayo inda neyeshiokhulia.” Kali habwene, nebutswa Nyasaye alabisasia biosi, inda nende eshiokhulia. Omubili shikuliho khulwa okhwikhonyelwa khulwa obuyilani ta, nebutswa kuliho khulwa okhukhalabanila Omwami, naye Omwami niye ouhelesinjia omubili ebiakutakha.

¹⁴Nyasaye yalamusia Omwami okhurula mukhufwa, khandi fwesi alikhulamusia nobunyalibwe.

¹⁵Inywe shimumanyile mbu, emibili chienywe nebiungo ebiomubili kwa Kristo tawe? Kho enzie embukule eshiungo eshiomubili okwa abali aba Kristo mana eshikhole okhuba eshiungo eshiomubili okwomutamba noho? Shikanyalikha tawe!

¹⁶Kata shimumanyile mbu, oulimaasia omubilikwe khumutamba abetsanga niyekholile mulala ninaye mumubili ta? Amahandiko kaboolanga habulafu mbu, “Abo bosi bekholile omubili mulala.”

¹⁷Nebutswa oyo oulimananga omwene khu Omwami yekholanga omubili mulala ninaye mu Roho.

¹⁸Lekhane neshifwabi shiobuyilani. Obwonooni bundi bwosi bwomundu akholanga shibwonooninjia omubilikwe ta, nebutswa omundu ouli neshikha shiobwonooni bwobuyilani yonoonelanga omubilikwe omwene.

¹⁹Inywe shimumanyilekhwo mbu emibili chienywe ni Ihekalu eya Roho Omutakatifu, oumenyanga mwinywe, khandi owa Nyasaye yahaana khwinywe ta? Inywe shimuli abeene khulwenywe ta, habula muli aba Nyasaye;

²⁰ye yamukula inywe nobukusi obukhongo, kho helesinjie Nyasaye oluyali mumibili chienywe.