Read wanga 1 ABAKORINZO 7 Bible Online

1 ABAKORINZO 7 - wanga bible

1 ABAKORINZO 7

¹Bulano leshe emboolekhwo khumakhuwa aka mwahandichila. Emboola mbu, nobulayi omundu okhulekha okhuteshia.

²Nebutswa khulwa amateemo amanji akobuyilani, okhuula buli omusaatsa abe nomukhasiwe omwene, khandi buli omukhasi okhuula abe nomusaatsawe omwene.

³Omusaatsa okhuula yehanile elala khumukhasiwe, khandi omukhasi yesi okhuula yehanile elala khumusaatsawe.

⁴Omukhasi shiali nobunyali khumubilikwe omwene ta, habula omusaatsawe niye oumurukanga, naye omusaatsa shiali nobunyali khumubilikwe omwene ta, habula omukhasiwe niye oumurukanga.

⁵Mulemanaga okhuba halala abeene khubeene ta, habula nimuba nimufuchilisaniye okhulekhanakhwo hatutu kho mbu kachile mube nebise biokhusaaya; mana khandi mukalushe okhuba halala shinga mwamala okhunala mubuteshani bwenywe, kho mbu Setani aleshe okhumuteema khulwa okhubula okhwilinda abeene.

⁶Shimboolanga kano shinga oumulaka akamukhola tawe, habula shinga oumufuchilila butswa okhukakhola.

⁷Toto ndakhekombile mbu, mwesi pe mwaba shinga olwa isie endi, nebutswa buli shiamulala ali neshihaanwa eshichoomeshe okhurula khu Nyasaye, omundu mulala ali neshihaanwa eshiahukhaane nende eshioundi.

⁸Ne khwabo abalateshania ta, nende abakhasi abalekhwa emboola mbu bwakhaba obulayi khwinywe okhumenya wenyene shinga olwa isie endi.

⁹Ne nolanyala okhuruka obwikombibwo ta, bwakhaba obulayi nimuteshania. Okhuba nobulayi okhuteshania okhushila okhusamba nomwikombi.

¹⁰Ne khwabo abateshania endi nelilako elilali elianje omwene ta, habula elia Omwami mbu, omukhasi alalekhana nomusaatsawe tawe.

¹¹Naba namulekha, okhuula amenye butswa ario yenyene, noho akalushe asasanibwe nomusaatsawe oyo. Naye omusaatsa yesi alalekhana nomukhasiwe tawe.

¹²Ne khubandi nabo (isie omwene oulali Omwami ta) emboola mbu, nikakhaba omusaatsa omukristo ali nomukhasi oulali omukristo ta, ne omusaatsa oyo niyafuchilila okhumenya nomukhasi oyo, kho alalekhana ninaye tawe.

¹³Ne naye omukhasi omukristo niyateshibwa nomusaatsa oulali omukristo ta, ne omusaatsa oyo niyafuchilila okhumenya nomukhasi oyo, kho alalekhana ninaye tawe.

¹⁴Shichila omusaatsa oulali omukristo oyo ta, anyala okhufuchililwa khu Nyasaye khulwa okhulimana nomukhasiwe omukristo, naye omukhasi oulali omukristo ta, anyala okhufuchililwa khu Nyasaye khulwa okhulimana nomusaatsawe omukristo. Nikaba mbu shikali kario ta, abaana babwe bakhabeele abanashialo, nebutswa shinga olwa kali bulano, bafuchililwa khu Nyasaye.

¹⁵Nebutswa, nikaba mbu mulala khubo oulali omukristo ta, yenya okhulekhana nowashie ouli omukristo, abe omusaatsa noho omukhasi, nomulekhuule okhukhola ario. Nyasaye yamulanga inywe okhumenya mumulembe.

¹⁶Iwe omukhasi omukristo wakhamanyila khulishi? Haundi niwe owakhahonie omusaatsawo? Nawe omusaatsa omukristo haundi niwe owakhahonie omukhasiwo?

¹⁷Buli shiamulala akhoyile atsiililile okhumenya okhulondana nende eshihaanwa eshia Omwami yamukabulila khandi shinga olwa yali olwa Nyasaye yamulanga okhuba omukristo. Lino nilio lilako elia ndechesinjia mutsikanisa tsiosi.

¹⁸Omundu owalangwa niyashebwa aleshe okhwikhola shinga omusinde, naye owalangwa nali omusinde, aleshe okhushebwa.

¹⁹Okhuba kata abe niyashebwa noho nali omusinde kabula eshifune shiosi ta; likhongo nokhuhulila amalako aka Nyasaye.

²⁰Buli shiamulala akhoya okhuba mumasinji kayalimwo olwa yafuchililila omulango kwa Nyasaye.

²¹Wali noli omusumba olwa Nyasaye yakhulaanga? Kho olateeba tawe; nebutswa noba niwakhanyoola obwiyangu bwokhuba omulekhuule, kho wikhonyele obwiyangu obwo.

²²Okhuba omusumba owa Omwami yalanga nomulekhuule owa Omwami; munjila ndala eyo omundu omulekhuule owa Kristo yalanga nomusumba wa Kristo.

²³Nyasaye yamukula inywe obukusi, kho mulakwa khandi abasumba babandu tawe.

²⁴Baana befwe, buli shiamulala okhuula atsiililile mubusanjilani nende Nyasaye mumelo ya yalimwo olwa yalangwa.

²⁵Bulano enzenya okhukalusia amareebo khukamwahandichila khu abashili okhuteshania: Isie shiendikhwo nelilako okhurula khu Omwami tawe, halali ehaananga obukhalachi obwa amayililisio kanje shinga mulala oukhoyile okhusuubilwa khulwa tsimbabasi tsia Omwami.

²⁶Okhulondakhana nende amanyakhano kuliho bulano, isie embaara mbu, nobulayi omundu okhumenya butswa shinga olwa ali.

²⁷Noba niwateshia omukhasi olakhaaba okhulekhana ninaye tawe. Ne noba noshialateshia ta, olakhaaba okhuteshia omukhasi tawe.

²⁸Nebutswa noteshia omukhasi, shioba nokholile obwonooni tawe; naye omukhaana oushili okhuteshibwa, nateekha, shiaba nakholile obwonooni tawe. Nebutswa abo abateshia balanyoola amanyakhano mubulamu bwabwe; ne ndakheenya okhumuhonia mumanyakhano ako.

²⁹Aka emboolanga baana befwe kali mbu: ebise bimalile okhusita ahambi, ne okhurula bulano, okhuula abasaatsa abateshia bamenye shinga abalateshia tawe;

³⁰nabo abekhuulanga, babe shinga abalali neshibeela tawe; nabo abekhoyanga babe shinga ababula omwikhoyo; nabo abakulanga babe shinga abalali beene bindu biabakulile tawe;

³¹nabo abakusinjia ebindu, babe shinga abalali mukhukusia tawe. Shichila eshialo shino, shinga olwa shili bulano shishilabaho khulwa eshise eshiraambi tawe.

³²Isie ndikomba muleshe okhuhenda; shichila omundu owalateshia ta, ahendelanga emilimo echia Omwami, okhuba ateemanga okhuchamisia Omwami.

³³Nebutswa omundu owateshia, ahendelanga amakhuwa keshialo, shichila akhabaanga okhuchamisia omukhasiwe;

³⁴kho akhwesungwa mumbeka tsibili. Naye omukhaana oulateshibwa ta, noho omushisila ahendelanga emilimo echia Omwami, shichila akhabanga okhwihaanila elala khuchio mumubili nende mumwoyo; nebutswa omukhasi owateshibwa ahendelanga amakhuwa keshialo, shichila akhabanga okhuchamisia omusaatsawe.

³⁵Emboola kano shichila ndenyanga okhumukhoonya inywe. Shiendeemanga okhumuboha namalako tawe. Habula isie ndenya mbu, mukhole akali amalayi khandi akahabwene, mana mwirusilie elala nimwihaana okhukhalabanila Omwami.

³⁶Ne omundu yesi naba nalola mbu shiakholelanga omwitsawe omukhaana owa ashili okhuteshia akali habwene ta, ne niyehulilanga mbu akhoyile okhuteshia, akhoya okhukhola ario shinga yenya, shichila shialaba niyonoonanga tawe. Bakhoyile okhuteshania.

³⁷Nebutswa omundu naba nalalunyiibwe khandi nafuchiliile mumwoyokwe mbu shiateshia ta, ne nikaba mbu omwene niye oufuchilile ario mumwoyokwe mbu, shiyenya okhuteshia ta, kho nobulayi aleshe okhuteshia omukhaana omushisila oyo.

³⁸Omundu outeshia omushisila oyo akhola obulayi, nebutswa oyo oulateshia ta, naye akhola obulayi kata okhushilakhwo.

³⁹Omukhasi owateshibwa shiali omulekhuule lwomusaatsawe aba nashiliho mwoyo tawe; nebutswa omusaatsawe naba nafwa, kho aba bulano omulekhuule okhuteshibwa nomusaatsa undi yesi owayenya; nebutswa omusaatsa oyo okhuula abe omukristo.

⁴⁰Ne kata kario, mukhulola khwanje yakhaba omusangafu okhushila, niyakhamenya nalateshibwa khandi ta. Ne embaara mbu, siesi endi nende Roho wa Nyasaye.