Read wanga 1 ABAKORINZO 8 Bible Online

1 ABAKORINZO 8 - wanga bible

1 ABAKORINZO 8

¹Ne bulano emboolekhwo khumakhuwa akamwahandichila akebiokhulia biemisango echimaliilwe ebifwanani. Nakatieli, shinga olwa abandi baboolanga mbu, “Ifwe fwesi khuli nobuchesi.” Nebutswa obuchesi bweimbia yino toto buchinjimisinjia omundu, ne nabwo obuheeli bumbakhanga.

²Omundu yesi oupaaranga mbu amanyilekhwo eshindu, akatoto kali mbu, shiamanyile shinga olwa akhoyile okhumanya tawe.

³Nebutswa omundu yesi ouheela Nyasaye, omwenoyo Nyasaye yamumanya.

⁴Kho bulano okhulondana khukebiokhulia ebiemisango echimaliilwe ebifwanani; khumanyile mbu, eshifwanani shibetsangaho mushilenje shieshindu eshilaliho tawe; ne khumanyile mbu aliho Nyasaye mulala yenyene.

⁵Kata nikali mbu baliho abalangungwa mbu “abanyasaye,” kata nibaba nibali mwikulu noho khushialo, ne toto baliho “abanyasaye” nende “abami abanji.”

⁶Habula khwifwe aliho Nyasaye mulala yenyene, naye niye Sefwe, omulonji owebindu biosi, khumenyanga khulwaye; khandi aliho Omwami mulala yenyene, niye Yesu Kristo, owebindu biosi bialongwa okhubirira muye, nefu khumenyanga okhubirira muye.

⁷Nebutswa shibali boosi abamanyile obwatoto buno tawe. Abandu bandi bamala okhunala akebifwanana okhushila, kho mbu kata okhuula bulano nibaliakhwo eshiokhulia shirio bashipaarangakhwo okhuba eshiokhulia eshieshifwanani; amayililisio kabwe akomumwoyo namateshele, ne behulilanga shinga abamalile okhwonoonibwa neshiokhulia eshio.

⁸Eshiokhulia kata kario shishikhusutinjiakhwo ahambi nende Nyasaye tawe; shikhulakosiakhwo eshindu shiosi nikhuba nikhulalia ta, ne kata nikhulia shikhulanyoolakhwo eshindu shiosi tawe.

⁹Khulweshio, mube meeso kho mbu obulekhuule bwebikhole bienywe buleshe okhukhola abateshele mubusuubili okhukwa mubwonooni;

¹⁰shichila omundu yesi naba nakhulola iwe, ouli nobuchesi niwikhale nolitsanga muhekalu yeshifwanani, ario shiolaba nomutsuubile okhulia eshiokhulia eshiemisango echimaliilwe ebifwanani nikaba mbu amayililisioke akomumwoyo namateshele.

¹¹Kho omundu omuteshele uno, ouli omwana wenywe owa Kristo yafwila, alatiba khulwa okhubela obuchesi bwenywe!

¹²Kho kario olwa mwonoonela abaana benywe abakristo khulwa okhwisichirasia obuteshele bwamayililisio akomumioyo chiabwe mulaba nimwonoonelanga Kristo.

¹³Kho bulano nikaba mbu eshiokhulia shichila omwana wefwe niyesichirala, kho ndalaleshela elala okhulia inyama kho mbu endeshe okhumwisichirasia omwana wefwe.