Read wanga 1 ABAKORINZO 9 Bible Online

1 ABAKORINZO 9 - wanga bible

1 ABAKORINZO 9

¹Isie shiendi omulekhuule? Isie shiendi omurume? Isie shindalola Yesu Omwami wefwe? Ne inywe shimuli ebiamo ebiemilimo chianje mu Omwami?

²Kata abandi nibalafuchililanga mbu endi omurume ta, nebutswa endi omurume khwinywe! Okhuba inywe muli eshibalikho shioburume bwanje mu Omwami.

³Olwa abandu baafukulanga isie, khulwa okhwiterera omwene ebareebanga endi,

⁴ifwe shikhuli nobulekhule okhunyoola eshiokhulia kata eshiokhunywa khulwemilimo chiefwe ta?

⁵Kho shikhuli nobulekhule okhutsia tsichendo tsiefwe nabakhasi abakristo shinga olwa abarume nende abasiani babwe Omwami nende kata Petero batsitsanga ninabo ta?

⁶Noho nisie nende Baranaba fwenyene abakhoyile okhukhola emilimo kho mbu khunyoole eshiakhulia?

⁷Yakhaba omusikari shiina ounyala okhwirunjila omwene khubiarumishila mwihe? Kata yakhaba omulimi shiina oulakhaliakhwo ebiamo ebirula mumukundakwe okwemitsabibu ta? Noho yakhaba omwayi shiina oulakhanywakhwo amabeele akarula mubiayobie?

⁸Shikhoyile okhwikhoonyela ebilolelo biabuli nyanga bino bionyene tawe, shichila kata Amalako koosi kaboolanga amakhuwa malala ako.

⁹Khusoomanga mumalako ka Musa mbu, “Olabohakhwo ing'ombe omunwa lwochiikhoonyela okhuhula imele tawe.” Kho Nyasaye ahendelangakhwo khukeying'ombe noho?

¹⁰Olwa Nyasaye yaboola ario shiyachoomanga okhuboola khwifwe? Kali kario mbu, ako kahandikwa khulwefwe. Omundu oulimanga nende oufunanga bakhoyile okhukhola emilimo chiabwe nibanayanga mbu bali nomukabo khubiabachesa ebio.

¹¹Ifwe khwarachile mwinywe imwo yeshiroho, kho nobubi shiina obwakhabaho nikhuba nikhuchesa mwinywe ebikhukhoonya mubulamu bwefwe?

¹²Nikakhaba abandi bali habwene okhunyoola obukhoonyi buno okhurula khwinywe, ifwe nefwe shikhuli habwene kata okhushilakhwo bo? Kata kario ifwe shikhwayekhoonyela obunyali obwo tawe. Habula khwefwila mumakhuwa koosi kho mbu khuleshe okhura eshisichirasio khunjila eya Amakhuwa Amalayi aka Kristo.

¹³Inywe shimumanyile mbu abandu abakhalabananga muhekalu banyoolanga ebiokhulia biabwe okhurula muhekalu ta? Nabo abakhalabananga khushimalilo shiemisango banyoolanga omukabo kwabwe okhurula khubihaanwa biemisango echio ta?

¹⁴Munjila ndala eyo, Omwami yaraho lilako mbu, abo abayaalanga Injiili okhuula banyoole ebiabalila okhurula khu Injiili eyo.

¹⁵Nebutswa isie eshili okhwikhoonyelakhwo obunyali obwo ne kata shihandikanga kano kho mbu mukholele akenyekha tawe. Bwakhaba obulayi kata ndafwa okhushila ako. Abulaho ounyala okhukalukhasia okhwiyitsiala khwanje khuno okhuba okhwa amakhuwa butswa.

¹⁶Shiendi nobunyali obwokhwiyitsiala shichila butswa mbu eyaalanga Injiili tawe. Kata kario endi hasi wamalako okhuyaala Injiili. Ne bwakhaba obubi okhushila nikaba mbu shieyaala Injiili ta!

¹⁷Kalaba mbu ekholanga emilimo chianje khulwa okhwenya khwanje, ndakhalindilile okhurungwa nebutswa echikholanga shinga omusinjilili wachio, shichila nemilimo echia Nyasaye yambelesia okhukhola.

¹⁸Kho bulano omurungo kwanje nishiina? Omurungo kwanje, nobulekhuule bwokhuyaala amakhuwa Amalayi nendarunjilwe tawe, nende okhulekha okhubanza aka engwanile okhunyoola khulwa emilimo chianje echia Injiili eyo.

¹⁹Kata nendi omulekhuule oulali omusumba owomundu yesi ta; ndikholanga okhuba omusumba wabandu boosi kho mbu, enyoole abandu abanji muno.

²⁰Nikhalabananga mu Abayahudi ndikholanga shinga Omuyahudi kho mbu enyoole Abayahudi, nikhalabananga mubarukungwa namalako aka Musa ndikholanga shinga ourukungwa namalako ako, kata omwene nindarukungwa namalako ako ta, kho mbu enyoole abo abarukungwa namalako ako.

²¹Munjila ndala eyo nikhalabananga mubamahanga ndikholanga shinga omumahanga, ouli elwanyi wamalako aka Abayahudi, kho mbu enyoole Abamahanga abo. Kata kario kano shikamanyinjia mbu shienondanga Amalako ka Nyasaye tawe, toto mwene isie erukuungwa namalako ka Kristo.

²²Nikhalabananga mubali abateshele mubusuubili ndikholanga omuteshele mumwoyo shinga bo, kho mbu enyoole abateshele abo. Kho ndikholanga okhuba owetsimelo tsiosi khubandu boosi kho mbu munjila tsiosi embe ouhoniakhwo balala khubo.

²³Ekholanga kano koosi khulwa Injiili kho mbu, enyale okhusanga mutsikhabi tsiayo.

²⁴Shimumanyile mbu mutsimbilo abelushi abanji batiebananga, nebutswa mulala yenyene niye ounyoolanga eshihaanwa ta? Kho mwesi mwilushe murio mbu munyalilwe okhunyoola eshihaanwa eshio.

²⁵Buli omwilushi yenasinjia amalako amatinyu, kho mbu afwalwe olusimbi lwebimuli ebiniala butswa lwangu; nebutswa ifwe khwilukhanga khurio khulwa okhunyoola olusimbi olulimenya obushia nobushia.

²⁶Niko akachilanga isie ninzilukha shilunji okhuula khumukoye okwokhumalililakhwo tsimbilo; khandi niko akachilanga isie endi shinga omupani oulalasanga ebifusibie mumuya butswa ta.

²⁷Habula enasinjia omubili kwanje nebifuusi nende okhukuruchila elala, kho mbu Nyasaye aleshe okhurusia mumbiro olwa isie omwene emba nimalile okhulanga abandi mumutiebano kuno.