Read wanga 2 ABAKORINZO 1 Bible Online

2 ABAKORINZO 1 - wanga bible

2 ABAKORINZO 1

¹Eyirula khu Paulo, omurume wa Kristo Yesu khulwa okhwenya khwa Nyasaye, nende okhurula khumwana wefwe Timotseyo. Yule khu abeikanisa ya Nyasaye abali Korinzo, nende khu abandu ba Nyasaye boosi abali mu Akayia.

²Nyasaye Sefwe nende Omwami Yesu Kristo bamuhelesie obukoosia nende omulembe.

³Leshe khupile Nyasaye ouli Samwana Omwami wefwe Yesu Kristo, Sefwe owetsimbabasi, ouli Nyasaye owobukhoonyi bwosi, orio muno.

⁴Akhuhotselesinjia mumatinyu kefwe koosi, mbu fwesi khunyalilwe okhuhotselesia abali mumatinyu, nikhwikhoonyelanga obuhotselesi bulala tsana obwakhwanyoola okhurula khu Nyasaye.

⁵Okhuba shinga olwa khusanganga mukhunyakhana khwa Kristo, nolwa khandi okhubirira mu Kristo khusanganga mubuhotselesi obukhongo obwa Nyasaye.

⁶Nikhuba nikhusandibwa, khusandibungwa khulwa okhuhotselesibwa kwenywe nende okhuhabinwa khwenywe. Ne nikhuba nikhuhotselesibwa, nikhulwa okhuhotselesibwa khwenywe, olwa mwifwilanga obusalili bulala bwa khusalilanga.

⁷Kho obunaayi bwefwe mwinywe noburalilu, okhuba khumanyile mbu shinga musanganga mubusalili bwefwe, khandi nolwa musanganga mukhuhotselesibwa khwefwe.

⁸Baana befwe khwenya okhumwitsusia, akobusandibwi bwakhwali ninabwo mulukongo lwa Asia. Emisiko chia khwatukhwa chiali emikhongo khandi emisiro okhushila, nikachila nikhufwa emioyo khumakhuwa kobulamu.

⁹Khwapaara mbu khumalile okhukhalachilwa eshiina shiokhufwa. Nebutswa kano kekholekha kho mbu khuleshe okhwileeta khwifwe abeene ta, habula khwileete khu Nyasaye oulamusinjia abafu.

¹⁰Ye yakhuhonia okhurula mumatinyu kokhufwa, khandi alakhuhonia. Nefu khwara obunaayi bwefwe muye mbu alakhuhonia khandi.

¹¹Inywe nenywe khandi mukhoyile okhukhukhoonya khulwa okhukhusaayila; kachile abandu abanji bakhusaayile khu Nyasaye, naye Nyasaye ahulile amasaayo kabwe nakhuhelesia tsikhabi; mana abandu abanji bakhupile Nyasaye orio khulwa okhukhuhelesia ifwe tsikhabi.

¹²Khwiyitsialilanga eshindu shilala mbu, amayililisio kefwe komumwoyo kakhusuubisinjia mbu, obulamu bwefwe mushialo muno, khandi okhushila muno, okhumenya khwefwe ninenywe khurukungwa nobutakatifu nende obwatoto obwa Nyasaye, okhubirira mubukoosia bwa Nyasaye, tawe obuchesi bwomundu namundu.

¹³Khumuhandichilanga inywe akamunyala okhusooma nende okhumanyilisia, ne esuubila mulakamanyilisilia elala okhuula khushisina,

¹⁴okhuba okhuula olwa leelo mukhumanyilekhwo butswa hatiiti. Munyala okhwiyitsiala khulwefwe shinga nefu khuliyitsialila inywe khunyanga eya Omwami wefwe Yesu alikalukha.

¹⁵Ndali nobusuubili obukhongo khukokhwiyitsiala khwenywe ako, mbu nikachila nindirechekha olwambeli okhwitsa okhumucheniha, kho mbu munyoole tsikhabi tsiokhumucheniha eshikhabili.

¹⁶Nderechekha okhumucheniha nendi khuluchendo lwokhutsia Makedonia, khandi nirulangayo, kho mbu enyoole obukhoonyi bwoluchendo lwanje okhutsia Yudea.

¹⁷Kho mupaaranga olwa ndakalukhasia aka ndali nindirecheshe okhukhola, ndali oweshikhabili noho? Olwa eloosinjia akenzenya okhukhola, ekaloosinjia, ne mumwoyo kwokhwiyenyela, nindirecheshe okhuboola endi, “Iwe, kali kario” nende khandi mbu, “Tawe,” khushise shilala eshio noho?

¹⁸Ne shinga olwa Nyasaye ali omwisiikwa, obusuubisie bwefwe khwinywe shibwali obwokhufuchilila nende okhwikaana tawe.

¹⁹Okhuba Yesu Kristo, Omwana wa Nyasaye, owa Sila, Timotseyo, ninasi khwamuyaalila, shiyali omundu owa, “Iwe kali kario” nende khandi, “Tawe” ta, habula, ye buli lwosi abetsanga, “Iwe, kali kario.”

²⁰Shichila niye “Iwe kali kario” owobusuubisie bwa Nyasaye bwosi. Niko akachilanga okhubirira mu Yesu Kristo khuboolanga khuri, “Amina” khulwa oluyali lwa Nyasaye.

²¹Nebutswa, Nyasaye niye oukhutinyilisinjia mu Kristo, halala ninenywe, khandi niye owakhwahula nakhutsushililakhwo amafura;

²²ye omwene yakhurakhwo eshimanyiloshie nakhuhelesia Roho mumioyo chiefwe, mbu abe shinga omusingo khwifwe.

²³Nyasaye oumanyile akali mumwoyo kwanje nomuloli wanje mbu, ndalekha okhwitsa Korinzo kho mbu endeshe okhumumeeta amanyakhano.

²⁴Shikali mbu khumuhachinjia khukamukhoyile okhusuubila tawe, habula khukhoonyananga ninenywe khulwa okhwikhoya khwenywe, okhuba mwaralila mubusuubili bwenywe.