Read wanga 2 ABAKORINZO 11 Bible Online

2 ABAKORINZO 11 - wanga bible

2 ABAKORINZO 11

¹Ndakhekoomba mwanzisumilisiliakhwo mubusilu bwanje hatiiti! Chame munzisumilisilie.

²Okhuba emutililwe imbalikha shinga imbalikha eya Nyasaye khwinywe, shichila ndamubashila omusaatsa mulala yenyene, ouli Kristo, kho mbu emuhaane khuye shinga Omukhaana omushisila.

³Nebutswa eritsanga mbu shinga inzokha yamukatia Hawa mubuchesichesi bwayo, munyala okhukoyasibwa mwarula khubwongoli nobuheeli bwatoto obwa muli ninabwo.

⁴Okhuba mufuchililanga nobusaangaafu omundu yesi owitsa namuyaalila Yesu undi owahukhane nende owa ifwe khwamuyaalila. Khandi mufuchililanga roho undi nende Injiili yindi eyahukhaane muno nende eyamwanyoola okhurula khwifwe,

⁵Embaaranga mbu shineema mubukhulundu khwabo abamulanganga mbu “Abarume” ta!

⁶Kata nimba nindalali omusitsa mukhuboola, endi nobuchesi, khwamumanyia inywe kano kalalani ebise biosi mutsinjila tsiosi.

⁷Kho ndonoona olwa ndetitiyia omwene kho mbu muchinguushe? Okhuba ndamuyaalila Injiili ya Nyasaye nindalamurunjia eshindu ta.

⁸Ndali shinga ounuulanga tsikanisa tsindi, olwa ndafuchilila obukhoonyi bwabwe kho mbu emukhalabanile inywe.

⁹Ne olwa ndali ninenywe shindamusitohelakhwo omundu yesi kata mulala mbu endambile eshindi tawe; abaana befwe abarula Makedonia banderela biosi ebia ndali nendabile. Kho shinga olwa ndelinda endio, nolwa khandi nandilinde endio endeshe okhumusitohela munjila yosi.

¹⁰Khulwa obwatieli bwa Kristo obuli mwisie, esuubisia mbu okhwiyitsiala khuno shikhulekalilwakhwo hosi mumbali tsie Akayia tawe.

¹¹Emboolanga endio shichila mbu shindamuheela ta noho? Nyasaye amanyile mbu ndamuheela!

¹²Nasi ndalatsiililila okhukhola aka ekholanga kano, kho mbu ndikalile abo abelanganga mbu “Abarume,” Kho baleshe okhubakhwo neshifune shiosi shiokhwiyitsialila mbu bakholanga akafwanana nende akefwe.

¹³Abandu abeimbia eyo nabarume bobubeeyi, nabakholi bobubeeyi abefwananinjia nabarume aba Kristo.

¹⁴Ne ako shikakhuhuchisia ta, shichila kata Setani yefwananinjia nende omumalaika wobulafu.

¹⁵Kho shilili likhuwa licheni khulwa abakhalabanibe boosi okhwifwanania nabakhalabani bobulunjishi tawe. Mubumalilishi balihelesibwa eshinyasio shinga ebikhole biabwe bikhoyeele.

¹⁶Engalushilamwo mbu, omundu yesi alambarakhwo mbu endi omusilu tawe. Nebutswa nimuba nimumbarakhwo murio, mufuchilile isie okhuba shinga omusilu, kho mbu siesi ndiyitsialekhwo.

¹⁷Amakhuwa akokhwiyitsiala akemboolanga kano shiekaboolanga mwilako elia Omwami ta, habula shinga omusilu.

¹⁸Ne shichila abanji beyitsialilanga akeshialo, siesi ndaleyitsiala.

¹⁹Inywe abeene muli abachesi, kho mwisumilisilinjia abasilu nimusangalile.

²⁰Mwisumilisilinjia kata omundu namubukula shinga abasumba, noho namureka kata namwikhoonyela obubi, kata namwikhulumamilia, kata namukhupa mumoni.

²¹Emboola akokhwileka mbu ifwe khwali abari okhushila mumakhuwa kano. Ne omundu yesi nali neitswoni yokhwiyitsialila eshindu shiosi, kano akaboola shinga omusilu, siesi ndalaba neitswoni yokhwiyitsiala.

²²Ababoolanga naba Heburania? Siesi endi endio. Naba Isiraeli? Siesi endi endio. Nabolwibulo lwa Aburahamu? Siesi endi endio.

²³Nabakhalabani aba Kristo? Emboola shinga oubiyile omurwe Ndakhalabana okhushila muno, ndarebwa mumbohe okhuula akhanji okhushila, ndakhupwa ebiboko ebinji okhushila, ndali ahambi Okhwiirwa akhanji okhushila.

²⁴Okhuula kharano Abayahudi bakhupa ebiboko amakhumi kataru nashienda (39).

²⁵Okhuula khataru ndanywekhwa nemisheleti nabobunyali aba Roma; lulala ndalaswa namachina. Khataru eliaro liandalimwo lieyinikha munyanza, ne lulala ndahonga mumaatsi kolusiba eshilo neshiteere.

²⁶Mutsinjendo tsianje tsinyinji ndaba mumatinyu kemiyembo chia matsi, amatinyu kabanuuli, kaboluyia lwanje olwa Abayahudi, aka Abamahanga, akomwitookho, akomushitsiimi, kamarunda amakali akomunyanza, nende Amatinyu akomubaana befwe abobwikaati.

²⁷Ndakhola emilimo emikali chiokhwilisia; akhanji ndafuba tsindoolo; ndalumwa inzala nende obuloho; akhanji ndabula eshiokhulia, ahengona kata eshiokhwifimba.

²⁸Ne halala nende akandi ako koosi, buli nyanga esitohelungwa nende okhuhendela tsikanisa tsiosi.

²⁹Olwa mulala atofula, ndihulila nendofule siesi, olwa mulala akwa mubwonooni nditsulanga neshibeela.

³⁰Nimba nikhoyile okhwiyitsiala ndakheyitsialila khu ebindu ebimanyia shinga endi omuteshele.

³¹Nyasaye, Samwana Omwami Yesu, amanyile mbu shimbeyanga ta; eliiralie litsoomibwe ebisoni nebisoni.

³²Olwa ndali Damasiko, omukafuna owarebwaho nende omuruchi Areta, yara abalindi mubiliibwa biomwitookho lia Damasiko mbu bandiile;

³³nebutswa ndeshibwa hasi okhubirira mwitirisha mushimwelo nindihonokokha khuye. .