Read wanga 2 ABAKORINZO 12 Bible Online

2 ABAKORINZO 12 - wanga bible

2 ABAKORINZO 12

¹Okhuula enzililile okhwiyitsiala kata nishibulaho eshia ndakheyitsialilakhwo; nebutswa ndalaboolakhwo khu akamalolelo nende akobufwimbuli obwa Omwami yamanyisia.

²Emanyile Omukristo mulala owa emiyika ekhumi nachine chiabira, yayulwa nayilwa hekulu mwikulu liakhataru. Omwene ndiboolakhwo, nebutswa shimanyile kano nikaba nikekholekha tawe, nikaba nikali mbu, toto ndali mwikulu noho nikaba nikali lilolelo, Nyasaye yenyene niye oumanyile.

³Nebutswa, emanyile mbu, omundu uno yayulwa nayilwa mu Paradiso[2], khandi shiemanya kano nikanzikholekhakhwo noho nikali lilolelo ta, Nyasaye yenyene niye oumanyile.

⁴Ne ebweneyo yahulila amakhuwa aka olulimi lwomundu lulanyala okhuboola ta.

⁵Ndaleyitsialila khukomundu uno, nebutswa khulwa isie omwene shinyala okhwiyitsiala ta, habula khukobuteshele bwanje.

⁶Kata kario nindakhenya okhwiyitsiala, shindakhalolekha omusilu ta, shichila ndalaba nemboolanga akatoto. Nebutswa shindaleyitsiala ta, kho mbu omundu yesi aleshe okhumbarakhwo okhushila akayaluutsi nikholanga nende okhuhulila aka ndaboolile tawe.

⁷Ne kho mbu endeshe okhwichinjimisia muno khulwa okhubela ebindu ebinji ebiokhuhuchisia ebia ndalola, ndahebwa obutsuni obululu mumubili kwanje, obuli shinga omurume wa Setani owarumwa okhunyasia nende okhukhola endeshe okhwichinjimisia.

⁸Ndasaaya Omwami okhuula khataru khukano mbu yayiniekhwo obutsuni obwo.

⁹Naye yangalusia ari, “Obukoosia bwanje bukhuhelile, okhuba obunyali bwanje bukholungwa obulamba mubuteshele.” Kho ndalasaangaala muno nindiyitsiala khulwa obuteshele bwanje, kho mbu obunyali bwa Kristo bumenye mwisie.

¹⁰Khulwa okhubela Kristo esangalila obuteshele, amanyeko amatinyu, obusandibwi, amanyakhano, okhuba olwa emba nendi omuteshele nolwa emba namani.

¹¹Ndikholanga omusilu! Nebutswa ninywe abachila nindikhola endio, okhuba ninywe abakhoyile okhulolosia mbu endi habwene. Okhuba kata nindalali eshindu ta, shendikhwo omulemu munjila yosi khu “barume” benywe abo tawe.

¹²Nyasaye yakhola okhubirira mwisie ebiamakana ebinji nende ebiokhuhuchisia mwinywe, ebia ndakhola nindisumilisiye muno. Ebilolelo ebio bimanyiinjia mbu endi omurume.

¹³Ne tsikanisa tsindi tsiamushilila shiina, nililali butswa mbu isie shindamusitohela tawe? Mundeshele libi lino!

¹⁴Bulano buno ndirecheshe okhwitsa ewa muli olukhola kataru. Ne shindalamusitohela ta, okhuba shikhabanga emiandu chienywe ta, habula inywe abeene. Shibali abaana abakhoyile okhubishila abebusi babwe libikho ta, habula abebusi.

¹⁵Enjamile okhuhaana biosi ebia endi ninabio nende isie mwene, khulwa okhumukhoonya. Obuheeli bwenywe khwisie bulatitiha shichila mbu obwanje khwinywe bwimeetile?

¹⁶Mulafuchilisania ninasi mbu shindamusitohela tawe. Nebutswa abandi baboola mbu ndali omuchesichesi, ne nemutila nobubeeyi.

¹⁷Kho ndakhali omuchesichesi endie? Okhubirira mwabo abandamurumila noho?

¹⁸Ndatsuuba Tito okhwitsa, nemuruma nende Omukristo undi oyo. Tito yamubatsa? Shikhwachenda mu Roho mulala oyo? Omwima kwefwe shikwali mulala okwo?

¹⁹Mwakhaba nimupaaranga okhuula bulano mbu, khwiterelanga abeene imbeli wenywe? Tawe, khuboolanga shinga Kristo yenya khuboole imbeli owa Nyasaye, ne buli shia shindu eshiakhukholanga, abaheelwa, khushikholanga okhumumbakha inywe.

²⁰Ehendanga mbu haundi, olwa nditsa ndalamunyoola nimulali shinga olwa ndenya ta, nasi omwene mulanyola nindalali shinga olwa mwenya tawe. Haundi ndalamunyoola nimuli nobusoolo, eshikhalikhali, oburuma, okhwiyenyela, obuchikhani, obumonyi, obwichinjimisi, nobukoyanu.

²¹Ehendanga mbu olwa nditsa khandi, Nyasaye wanje yakhanditiyie imbeli wenywe; nendile khulwa abanji abonoona khale, ne bashili okhwikalukhasia okhulekha akeshifwabi, nobuheyi nende obwilaasi bwosi obwa bakhola.