Read wanga 2 ABAKORINZO 13 Bible Online

2 ABAKORINZO 13 - wanga bible

2 ABAKORINZO 13

¹Luno bulano nolukhola khataru nimwitsilanga okhumucheniha. Ne shinga Amahandiko kaboolanga; buli likhuwa likhoyele okhutinyisibwa nende abakobosheli babili noho bataru.

²Ndakondoshela abo abonoona khale nende abandi boosi, ne ebakondeshela bulano nembulaho, shinga olwa ndabakondeshela mukhucheniha khwanje khwakhabili mbu, olwa nditsa khandi shindilibabela tawe.

³Mulanyoola eshimanyilo shinga olwa mwenyanga, mbu Kristo aboolelanga mwisie. Olwa aba nakhalabananga ninenywe shiali omuteshele ta, habula amanyinjia obunyalibwe hakari wenywe.

⁴Okhuba kata okhubambwakhwe khumusalaba nikhwali mubuteshele, amenyanga khulwa obunyali bwa Nyasaye. Nefu fwesi khuli abateshele muye, nebutswa khulwa okhukhalabana ninenywe khulasanjilana nende Kristo ouli omulamu khulwa obunyali bwa Nyasaye.

⁵Mwihenjelesie abeene, okhulola nimuba nimumenyanga mubusuubili. Mwiteeme abeene. Shimumanyile mbu, Yesu Kristo amenyanga mwinywe ta? Okhuyiniakhwo nimuba nimulanyala okhuula khushichelo eshio.

⁶Esuubila mbu mulanyola mbu shikhukwile tawe.

⁷Khumusaayila khu Nyasaye mbu mulakhola libi liosi tawe, shikali mbu khuloleshe mbu khwabira ta, habula mbu mukhole akali habwene, kata ifwe nikhufwana shinga abakwa.

⁸Okhuba shikhunyala okhukhola likhuwa liosi elifukula obwatoto tawe, habula elichooma khubwatoto.

⁹Ifwe khwikhoyanga olwa khuba nikhuli abateshele nenywe nimuli namani. Elia khumusaayilanga lili mbu, mube abakololofu.

¹⁰Ne niko akachila nihandiika amakhuwa kano nindi ehale okhurula khwinywe, kho mbu, olwa ndakhabe nindiho endeshe okhwikhoonyela obululu, mukhurumishila obunyali bwa Omwami yambelesia, shibuli obunyali bwokhulikulula ta habula obwokhumumbakha.

¹¹Eliokhumalilikha abaana befwe, ndielino mbu, mulindwe. Mube abakololofu; mulonde amebaalo kanje, muhulilisanie, mumenye mumulembe, naye Nyasaye omwene obuheeli nomulembe alabetsanga ninenywe.

¹²Mushiesanie abeene khubeene amashiesio keshikristo.

¹³Abakristo boosi bamushiesiye.

¹⁴Obukoosia obwa Omwami Yesu Kristo, nobuheeli bwa Nyasaye, nende obusanjilani bwa Roho Omutakatifu bubetsenje ninenywe mwesi, Amina.