Read wanga 2 ABAKORINZO 2 Bible Online

2 ABAKORINZO 2 - wanga bible

2 ABAKORINZO 2

¹Kho ndaboola mumakani kanje mbu, endeshe okhwitsa khandi okhumubeelesia tawe.

²Okhuba nimba nindakhamubeelesia inywe, kho owakhasangasia niwiina nibalali abo abembeelesiye tsana abo?

³Niko akachila nemuhandichila ibarwa eyo, shindayenya okhumwitsila mana embeelesibwe nende abandu tsana abakhoyile okhusangasia tawe. Okhuba emanyile obulayi bwene mbu, isie nisangalile, mwesi khandi musangalanga murio.

⁴Ndamuhandichila nendi namanyakhano amanji nende obutsunwi mumwoyo, khandi namasika amanji mumoni, shindachoomanga okhumusalisia ta, habula mbu emukhole mumanye obuheeli obunji obwendi ninabwo khwinywe.

⁵Ne omundu yesi naba niyachila owashie nabeelela, shiyabeelesia isie ta, habula kata inywe mwesi khandi (emboola endio shichila shinzenya okhumuhachia muno tawe.)

⁶Okhuba eshinyasio eshia amalile okhunyoola okhurula khwinywe, shimuhelile.

⁷Bulano, mukhoyile okhumuleshela mana mumutinyilisie kho mbu aleshe okhubeelela muno nafwa omwoyo.

⁸Niko akachila nimusaaya mbu, mumusuubisie mbu mwamuheela toto.

⁹Ndamuhandichila, kho mbu emuteeme okhumumanya nimuba nimuli abahulili mumakhuwa kanje koosi.

¹⁰Ne omundu yesi owamuba nimulesheele, siesi khandi emuleshela. Okhuba olwa emuleshela, nimba nindakhaba nende shiosi shiokhuleshela, ekholanga endio imbeli wa Kristo khulwa okhubeela inywe.

¹¹Kho mbu, Setani aleshe okhunyoola obwiyangu khwifwe; okhuba khumanyile kakasinjia okhukhola shinga olwa kali.

¹²Olwa ndoola Tiroasi okhuyaala Injiili ya Kristo, ndanyoola Omwami niyanzikuliile omuliango khulwa emilimochie.

¹³Nebutswa ndahenda omwoyo muno, shichila shindanyoolayo owashiefwe Tito tawe. Kho ndaseebula abandu bebweneyo, ne ninzia Makedonia.

¹⁴Habula khupile Nyasaye orio! Mukhusanga nende Kristo, Nyasaye akhwimililanga buli lwosi mubuhuli. Nyasaye akhwikhoonyelanga okhulandia obumanyilisi bwa Kristo buli habundu shinga eshiuya shieshing'ari.

¹⁵Okhuba ifwe khuli shinga eshiuya eshilayi eshiobubani eshia Kristo ahaananga khu Nyasaye, khandi eshilandanga mubenabo abahonibungwa nende mubenabo abatibanga.

¹⁶Khu abo abatibanga neshiuya eshibi eshiolufu, ne khu abo abahonibungwa neshing'ari shiobulamu. Kho niwiina ounyala kano koosi?

¹⁷Okhuba ifwe shikhuli shinga abandu bandi abanji abo, abakholelanga likhuwa lia Nyasaye inganga tawe. Nebutswa ifwe shichila Nyasaye yakhuruma, khuboolanga nobuholo imbeliwe, shinga abakhalabani ba Kristo.