Read wanga 2 ABAKORINZO 3 Bible Online

2 ABAKORINZO 3 - wanga bible

2 ABAKORINZO 3

¹Kano kanyala okhuhulilikha shinga abeitsialanga abeene khandi noho? Kanyala okhuba mbu, shinga olwa kali khubandu bandi, kho khukhoyile okhuba netsibarwa tsiokhwimanyisia khwinywe noho?

²Inywe abeene ninywe ibarwa yefwe, eyahandikwa mumioyo chiefwe, khulwa buli mundu okhuchimanya nende okhuchisooma.

³Kamanyishe habulafu mbu, Kristo omwene yahandika ibarwa yino mana nachiruma okhubirira mwifwe. Shiyachihandika nobwino ta, habula nende Roho wa Nyasaye ouliho mwoyo, kata shiyachihandika khurubao orwamachina ta, habula mumioyo chiabandu.

⁴Khuboola khurio khulwa okhubela khwasuubila Nyasaye okhubirira mu Kristo.

⁵Shibulaho eshindu shiosi shiosi eshichila khwiyitsiale mbu khunyala okhukhola emilimo chino khulwa obunyali bwefwe tawe. Obunyali bwefwe burula khu Nyasaye.

⁶Niye oukhukholanga okhuba abakhalabani aba indakano imbia eyilarulanga khumalako akahandikwa ta, habula khu Roho Omutakatifu. Okhuba amalako kahandikwa kareeranga olufu, nebutswa Roho ahaananga obulamu.

⁷Amalako kahandikwa kasaarwa khumachina, ne olwa kali nikahaanungwa oluyali lwa Nyasaye lwalolekha. Obweni bwa Musa nibwakha khulwa oluyali olwo, ne kata olwa lwali niluhwetseshelelanga lwali olwamaani, mbu kata abandu ba Isiraeli shibanyala okhutsiililila okhuhenga Musa mumoni tawe. Oluyali lwa Nyasaye lwalolekha olwa amalako akahandikwa khandi akareeranga olufu kahaanwa.

⁸Nebutswa olwa indakano imbia yetsa, eyili eya Roho Omutakatifu, ebikhole ebikhongo okhushila oluyali lwa Nyasaye bialiho.

⁹Okhuba obukhalabani obukhalachilanga abandu eshiina nibuba nibuli obwoluyali, kho obukhalabani bwebikhole ebiobulunjishi shibuli obukhongo muno!

¹⁰Khunyala khwapaara mbu, khulwa oluyali olukhongo oluliho bulano, oluyali lwaliho khale olukhongo lwahwa.

¹¹Okhuba indakano ikhulu, eyahwaho yali noluyali, nayo indakano imbia yobumeli yili noluyali olukhongo okhushila.

¹²Shichila mbu obwo nibwo obunaayi obwa khuli ninabwo, kho khuboolanga neitswoni.

¹³Shikhuli shinga Musa, owefunikha olububi mumoni, kho mbu abandu ba Isiraeli baleshe okhulola obwang'ang'u obwali nibuhwetseshelelanga tawe.

¹⁴Ne shibanyala okhuyililisia ta, shichila kata okhuula olwa leelo, olububi tsana lushifunishe tsimoni tsiabwe olwa indakano ikhulu yisomwa. Olububi olwo lurusibungwaho butswa okhubirira mu Kristo yenyene.

¹⁵Kata olwa leelo, olwa amalako ka Musa kasoomwa, olububi olwo lushifunikhanga obuyililisi bwabwe.

¹⁶Nebutswa lwomundu amushiukhanilanga Omwami, habwenaho olububi olwo lurusibungwaho.

¹⁷Ne Omwami niye Roho, ne aha Roho owa Omwami ali, habwenaho obulekhuule bubetsangaho.

¹⁸Ne ifwe fwesi, nikhuli nobweni obulafimbilwe ta, khulolesinjia oluyali olwa Omwami, ne oluyali tsana olwo olurulanga khu Omwami, ouli Roho, lukhukalukhasinjia ifwe nilukhukhola okhufwana ninaye mwikondolie okhurula khuluyali lulala okhuula khuluyali lundi olukhongo okhushila.