Read wanga 2 ABAKORINZO 4 Bible Online

2 ABAKORINZO 4 - wanga bible

2 ABAKORINZO 4

¹Nyasaye mutsimbabasitsie yakhuhelesia omulimo kuno okhukhola, khulweshio shikhufwitsanga omwoyo tawe.

²Khwasila amakhuwa akamabiswi nende aketsisoni; shikhukholanga akobubeeyi, kata okhushiamia likhuwa lia Nyasaye tawe. Habula khulwa okhufimbula obwatoto habulafu khwilekhulanga hasi wobukhalachi bwabandu nende imbeli wa Nyasaye.

³Okhuba Injiili yakhuyaalanga niyiba niyifunikhwa, yafunishilwa abo abakoranga bonyene.

⁴Shibasuubila ta, shichila emioyo chiabwe chielimibwa nende omunyasaye omubi weshialo shino. Omunyasaye oyo yababofusia, kho shibalolanga obulafu oburulanga mu Injiili yoluyali lwa Kristo ouli likoondo liene lia Nyasaye tawe.

⁵Okhuba shikhuyaalanga akefwe abeene ta, habula khuyaalanga Yesu Kristo shinga olwa ali Omwami, nefwe shinga olwa khuli abakhalabani benywe khulwa Yesu.

⁶Nyasaye owaboola mbu, “Obulafu bwashe okhurula mushiilima,” niye Nyasaye mulala oukholile obulafubwe okhwakha mumioyo chiefwe, obulafu obwo bukhukholanga okhumanya oluyali lwa Nyasaye mubweni bwa Kristo.

⁷Ifwe aba khuli nelibiikho lieshiroho lino khuli shinga ebikaye bielitoyi, okhumanya mbu obunyali obukhongo shinobwefwe ta, habula burulanga khu Nyasaye.

⁸Khusalisibungwa mutsinjila tsiosi, nebutswa shikhutubulungwa tawe, khuhendanga nebutswa shikhufwitsanga omwoyo tawe,

⁹khusandibungwa, nebutswa shikhwibalungwa butswa tawe, khukwisibungwa hasi, nebutswa shikhusikhaga tawe.

¹⁰Buli lwosi khubetsanga mumasila kokhwirwa shinga olwa Yesu yeerwa, kho mbu ifwe okhubaho abalamu khumanyisie mbu, Yesu nomulamu.

¹¹Mubulamu bwefwe bwosi khubetsanga mumasila kokhwirwa khulwa Yesu, kho mbu obulamu bwa Yesu nabwo bumanyishile mumibili chiefwe echifwitsanga.

¹²Kano kamanyinjia mbu, buli lwosi ifwe khuli mumasila kokhufwa, ne khulwako inywe muli nobulamu.

¹³Amahandiko kaboolanga kari, “Ndasuubila neshichila nemboola.” Muroho tsana eyobusuubili eyo, fwesi khandi khuboolanga shichila khwasuubila.

¹⁴Khumanyile mbu Nyasaye, owamulamusia Omwami Yesu, yakhakhulamusie fwesi khandi shinga olwa yalamusia Yesu, ne nakhuyila, halala ninenywe imbeliwe.

¹⁵Kano koosi kali khulwenywe; ne shinga obukoosia bwa Nyasaye bumeetekhanga okhulanda mubandu, kho nabo balahaana amasaayo kokhupa orio khulwa oluyali lwa Nyasaye.

¹⁶Khulweshifune shino, shikhufwitsanga omwoyo ta. Kata olwa imelo yefwe yomubili yihwelelelanga, imelo yefwe yeshiroho nayo yikalusibungwa imbia obushia nobushia.

¹⁷Ne obusandibwi obutiiti buno, obuli bweshise shitiiti, bulakhureerera oluyali olukhongo khandi olweinziayo olushila obusandibwi bwene.

¹⁸Okhuba shikhuhenganga khubindu ebilolekha ta, habula khubindu ebilalolekha ta. Ebindu ebilolekha nebieshise butswa, nebutswa ebindu ebilalolekha ta nebieinziayo.