Read wanga 2 ABAKORINZO 5 Bible Online

2 ABAKORINZO 5 - wanga bible

2 ABAKORINZO 5

¹Shichila khumanyile mbu, inzu yelitili yefwe yakhumenyilemwo niyo omubili kwefwe mushialo, niyilikululwa, Nyasaye yakhumbashila inzu mwikulu yokhumenyamwo, eshimenyo eshia ye omwene yakhukasilia, eshieinziayo.

²Mushialo muno khunyakhananga nikhulindilila okhuhesibwa eshimenyo shiefwe eshiomwikulu;

³kho mbu, khulwa okhushifwala khuleshe okhunyoolekha nikhuli eshiechenye imbeli wa Nyasaye tawe.

⁴Okhuba olwa khushili mwitili lino khunyakhananga nikhufiinywa, ne shikali mbu, khwenyanga okhufwalulwa emibili chiefwe chiomushialo muno ta, habula khwenyanga okhufwalwa echiomwikulu, kho mbu echifwitsanga chikalukhasibwe okhuba echiobulamu.

⁵Nyasaye niye owakhurecheshela obukalukhasibwi buno, ne nakhuhelesia Roho abe omusingo khukosi aka yakhubishila.

⁶Kho buli lwosi khumenje ikholo, nikhumanyile mbu, olwa khushili hano mumubili khubetsanga nikhuli ehale nende ewa Omwami;

⁷okhuba khumenyanga khulwobusuubili muye, tawe khulwokhumulola.

⁸Khuli abeikholo inyumu, ne khwakhekoomba okhulekha omubili mana khumenye nende Omwami.

⁹Kho, kata nikhumenyile mushialo muno noho mwikulu lichoomo liefwe nokhumuchamisia Omwami.

¹⁰Okhuba fwesi okhuula khwitse imbeli weshifumbi shiobuyasibwi eshia Kristo, kho mbu buli mundu anyoole akamukhoyeele okhulondana nende amalayi noho amabi aka yakhola nali mubulamu bwomushialo muno.

¹¹Khumanyile shinga lwokhuria Omwami khuli okhulayi, ne niko akachilanga nikhuhombelesia abandi okhumuria. Nyasaye yakhumanya mubwitsulu, ne esuubila mbu, mumioyo chienywe mukhumanyile fwesi.

¹²Shikhwiyitsialanga abeene imbeli wenywe khandi ta; habula khumuhelesinjia eshifune eshilayi eshia munyala okhukhuyitsialilakhwo, kho mbu mube nende elia munyala okhubakalusia abo abeitsialila khu khufwana khwomundu tawe khubimabie.

¹³Kata nikhuba nikhwalalukha, nikhulwa Nyasaye; kata nikhuba nikhuli nobuchesi bwahabwene, nikhulwenywe.

¹⁴Obuheeli bwa Kristo nibwo obukhurukanga, shichila khwafuchilila olwa mulala yafwila boosi, kho boosi bafwa.

¹⁵Kristo yafwila boosi kho mbu abali mwoyo baleshe okhubetsangaho mwoyo khulwabwe abeene ta, habula khu oyo owafwa khulwabwe mana nalamusibwa khandi nende Nyasaye.

¹⁶Kho okhurula bulano shikhulahenganga khumundu yesi mumelo yomubili tawe; kata olwa khwahenganga khu Kristo mumeloye yomubili, bulano shikhushimuhengangakhwo khurio khandi tawe.

¹⁷Khulweshio omundu yesi naba nali mu Kristo, kho neshilonje eshiyia; kakhale kahwa, nako amayiakha ketsile.

¹⁸Kano koosi kakholungwa nende Nyasaye, owakhusasania ninaye omwene okhubirira mu Kristo, nakhuhelesia omulimo kwokhusasania abashiefwe.

¹⁹Eshisina mbu, okhubirira mu Kristo Nyasaye yasasania eshialo ninaye omwene. Nyasaye shiyahenga khubunji bwebionoono biabwe ta, habula yakhuhelesiye omulimo kwokhurumbula obusasanibwi obwo.

²⁰Kho khuliho mushilenje shia Kristo, Nyasaye mwene aboolanga okhubirira mwifwe. Khumusaaya mushilenje shia Kristo mbu, musasanibwe nende Nyasaye.

²¹Kristo shiyali nobwonooni ta, nebutswa khulwefwe Nyasaye yamukhola okhusanga mubwonooni bwefwe kho mbu, mu Kristo khukabane obulunjishi bwa Nyasaye.