Read wanga 2 ABAKORINZO 6 Bible Online

2 ABAKORINZO 6 - wanga bible

2 ABAKORINZO 6

¹Nikhukhalabananga halala ninaye, fwesi khumusaaya inywe abanyoola obukoosia obwa Nyasaye, mubwikhoonyele mubwitsulu.

²Okhuba Nyasaye aboola ari, “Khubise ebichomeshe ndamumanyia obukoosia, ne ndamuhabina khunyanga yobuhonia.” Khulweshio shino nishio eshise shiobukoosia; ne yino niyo inyanga yobuhonia.

³Shikhwenya mbu omundu yesi anyoole eshisichirasio nemilimo chiefwe ta, kho shikhuteemangakhwo okhura ebisichirasio munjila yomundu yesi tawe.

⁴Habula khumanyinjia mbu, khuli abakhalabani aba Nyasaye, mubuli shindu shiosi eshia khukhola, mubwisimilisi obunji, mubusandibwi, mukamaraba nende mumatinyu.

⁵Khwakhupwa, khwabohwa, khwaserwa; khwafinywa nemilimo nende okhufuba tsindoolo nokhuhonga inzala.

⁶Khwamanyia mbu khuli abakhalabani aba Nyasaye khulwa obweleleshe, obumanyi, obwifwili, nende eshisa; khulwa Roho Omutakatifu, nende mubuheeli bwatoto.

⁷Khwaboola eliobwatoto nomubunyali bwa Nyasaye. Khuli nobulunjishi obuli shinga ebimanulwa biefwe ebiokhuseera nende ebiokhushinga.

⁸Khuhebungwa oluyali khandi khufimbibungwa omurwe, khunyekungwa khandi khwitsoomibwa. Khubukulungwa shinga ababeeyi ne nikhuboolanga akatoto;

⁹khubukulungwa shinga abalamanyishe ta, ne nikhwamanyikha khuboosi; shinga abafwitsanga, ne shinga munyala okhulola khuli abalamu. Kata nikhuhebwa eshinyasio, shikhwirungwa tawe,

¹⁰kata nikhubelesibwa, khwikhoyanga buli lwosi. Khuli shinga abamanani, ne khuyindihasinjia abanji. Khuli shinga abalali neshindu ta, ne biosi nebiefwe.

¹¹Abaheelwa aba Ebukorinzo, khumuboolele koosi habulafu; khwamuheela nemioyo chiefwe chiosi.

¹²Shikhuli ifwe abalalekha okhumuheela ta, habula ninywe abalekha okhukhuheela.

¹³Emboola bulano shinga nimuli abaana banje; mukhuheele nemioyo chienywe chiosi shinga fwesi khwamuheela.

¹⁴Mulakholelekhwo emilimo halala nende ababula obusuubili tawe. Ako shikanyalikha tawe. Okhuba obulunjishi bunyala burie okhuwinjana nende obumayanu? Obulafu bunyala burie okhusanjilana nende eshilima?

¹⁵Kata Kristo anyala arie okhufuchilisania nende Setani?[1] Kata shiomusuubili anyala okhukabana nende oubula obusuubili nishiina?

¹⁶Kata Ihekalu eya Nyasaye yinyala yirie okhuhulilisania nende ebifwanani ebinamilungwa? Okhuba ifwe khuli Ihekalu eya Nyasaye ouliho mwoyo; shinga Nyasaye mwene yaboola mbu, “Ndalakaasia eshimenyo shianje nabandu banje, khandi ndalamenya hakari wabwe. Ndalaba Nyasaye wabwe nabo balaba abandu banje.”

¹⁷Khulweshio Omwami aboola ari, “Okhuula mubaleshe nimwirusia abeene mubo. Mulatilakhwo eshindu shiomusilo shiosi ta, mana nasi ndalamufuchilila.

¹⁸Ndalaba Senywe, nenywe mulaba abaana banje abasiani nende abakhaana nolwa Omwami ounyala biosi aboola.”