Read wanga 2 ABAKORINZO 9 Bible Online

2 ABAKORINZO 9 - wanga bible

2 ABAKORINZO 9

¹Shibulaho eshichila enzililile okhumuhandichila khwikhuwa liobukhoonyi khubakristo ba Yudea,

²okhuba emanyile mbu mwerechekha okhukhoonya, nasi emwiyitsialilanga khubandu aba Makedonia, nemboola mbu, “Abakristo aba Akayia bamala okhwirechekha okhukhoonya omuyika kuhwele.” Obwikombi bwenywe bubusiye abanji khubo.

³Nebutswa erumanga abaana befwe bano, kho mbu okhwiyitsiala khwefwe khulwenywe mwikhuwa lino khuloleshe mbu nokhwatoto. Kho shinga olwa ndaboola, mube nimwirecheshe nobukhoonyi bwenywe.

⁴Abakristo bandi aba Makedonia nibakhetsa ninasi, shinzenya banyoole mbu mushili okhwirechekha nobukhoonyi bwenywe tawe. Kano nikakhekholekha, khwakhafwimbwa omurwe khulwa okhumusuubila! Shimeetakhwo tsisoni etsiakhaba khwinywe tawe.

⁵Kho enduutsi mbu nobulayi okhutsuuba abaana befwe bano, baranjilile okhwitsa ewa muli isie nishili, mana bekholelele okhukaasia ebihaanwa ebia mwalaka. Kho mana bibe nibiarechekhwa, okhumanyia mbu muhaananga shichila muli abahaani tawe shichila mbu muhachilisibwe.

⁶Mwitsulile mbu, oumiitsa nolukhono alachesa ario nolukhono; naye oumiitsa nomukhono omusiro alachesa ario nomukhono omusiro.

⁷Buli mundu ahaane shinga achama mumwoyo kukwe, tawe nobumokooli kata khulwa okhunichilisibwa; okhuba Nyasaye aheelanga omundu ouhaananga nobusaangaafu.

⁸Naye Nyasaye anyala okhumushilasilia obukoosia bwosi, kho mbu mubetsenje nobwitsulu mubindu biosi ebiamwenya, nende ebishilaanile khulwa omulimo omulayi kwosi.

⁹Shinga olwa Amahandiko kaboolanga mbu; “Ouhaananga nomukhono omusiro khu batakha; tsimbabasitsie tsibetsangaho inziayo.”

¹⁰Naye Nyasaye ouhaananga imwo khumumiitsi nende eshiokhulia, alamuhelesinjia imwo yenywe eyamwenya nende okhumeeta lichesa mubwihaani bwenywe.

¹¹Alamuhindihasia namukhola okhuba abahaani buli lwosi, kho mbu abanji balakhupila Nyasaye orio khulwa ebihaanwa ebiabanyoola okhurula khwifwe.

¹²Okhuba obukhalabani obwamukholanga buno shibwitsusinjia eshichelo shiobutambi obwa abakristo bwonyene ta, habula khandi bumeetanga orio ikhongo khu Nyasaye.

¹³Ne khulwa akalolosibwa mubukhalabani buno, abanji balamwitsoomia Nyasaye khulwa obuhulili bwenywe mu Injiili ya Kristo, eya muyaalanga, nende khulwa obuhaani bwenywe mubusanjilani ninabo nende abandu bandi boosi.

¹⁴Nabo balamusaayila nobuheeli obunji khulwa okhubela obukoosia bwa Nyasaye obunji obuli mwinywe.

¹⁵Chende khupile Nyasaye orio khulwa eshihaanwa shishie eshibula eshichelo!