Read wanga ABAGALATIA 1 Bible Online

ABAGALATIA 1 - wanga bible

ABAGALATIA 1

¹Eyirula khwisie Paulo, owa omulango kwanje okwa okhuba omurume shikwarula khu mundu kata khulwa obunyali bwomundu ta, nebutswa kwarula khu Yesu Kristo nende Nyasaye ouli Samwana, owamulamusia okhurula mubafu;

²nende abaana befwe boosi abali ninasi, khurumanga amashiesio khumakanisa aka ebu Galatia.

³Nyasaye Sefwe nende Omwami Yesu Kristo bamuhelesie inywe obukoosia nende omulembe.

⁴Khulwa okhukhukhola okhuba abalekhuule okhurula mushise shino eshiobwonooni, Kristo yehaana omwene khulwa obwonooni bwefwe, khulwa obuhulili khukhwenya khwa Nyasaye wefwe khandi ouli Sefwe.

⁵Oluyali lube khu Nyasaye ebisoni nebisoni! Amina.

⁶Inywe mumbuchisiiye po! Mushise shituutu butswa ne mumulekha omwene oyo owamulanga khulwobukoosia bwa Kristo, ne bulano mufuchilila Injiili yobubeeyi.

⁷Toto mwene “Injiili yindi,” shiyiliho tawe. Ne emboola endio shichila abandu bandi bali mwinywe abamunyaasinjia khandi abateemanga okhushukhasia Injiili ya Kristo.

⁸Ne, kata nikhaba ifwe noho omumalaika okhurula mwikulu ounyala okhumuyaalila Injiili eyaukhane khu eya khwamuyaalila anyoole eshilaamo!

⁹Khwakaboolakhwo khale khandi bulano engalushilamwo mbu; omundu yesi naba namuyaalilanga Injiili eyaukhane khuyamwafuchilila anyoole eshilaamo!

¹⁰Kano kahulilikhanga shinga outeemanga okhuchamisia abandu mbu bafuchilile isie noho? Tawe! Eshiandenya nokhuchamisia Nyasaye! Mupaaranga mbu endeemanga okhuhombelesia abandu kho baanjame? Nindakhabele mbu eshikholanga endio, shindakhabele nindi omukhalabani wa Kristo tawe.

¹¹Baana befwe, leshe emuboolele, Injiili yeyaalanga shiyarula khumundu tawe.

¹²Shindachinyola okhurula khumundu yesi ta, noho kata okhwechesibwa nomundu yesi tawe. Yesu Kristo omwene owafwimbulila Injiili yino.

¹³Mwamala okhuboolelwa shinga olwa ndamenyanga olwa ndali neshihanile okhukhalabanila diini eya Eshiyahudi, shinga olwa ndasandia likanisa elia Nyasaye nimbula tsimbabasi tsiosi ta, khandi nindeema shinga olwa enyala okhulimala.

¹⁴Ndali oweimbeli khuba Yahudi bashianje abolubaka lwanje mubikhole bianje ebieidini eya Abayahudi, khandi ndali nindehanila elala okhulonda ebiima biabakuuka befwe.

¹⁵Nebutswa, Nyasaye yandobola mubukoosiabwe olwa ndali nishili okhwibulwa. Ne niyananga okhumukhalabanila. Ne olwa yahula

¹⁶okhufwimbulila omwanawe khwisie, mbu eyalile Abamahanga Amakhuwake Amalayi shindatsiakhwo khumundu yesi mbu yanjetsiyie tawe,

¹⁷kata shindatsiakhwo Yerusalemu okhulolana nende yabo abaranjilila okhuba abarume isie nishili tawe. Nebutswa, ndamala enzie bwangu mushialo eshia ebu Arabia, mana khandi ningalukha Damasiko.

¹⁸Lwali olunyuma lwemiyika chitaru olwa ndatsia Yerusalemu okhumanyana nende Petero, mana nemenya ninaye khulwa amachuma kabili.

¹⁹Shindalolakhwo omurume undi yesi ta halali Yakobo, omwana wabwe Omwami.

²⁰Akehandikanga kano nakatoto. Nyasaye amanyile mbu shimbehanga tawe!

²¹Olunyuma lwa kano ndacheniya amataala mu Siria nende mu Kilikia.

²²Mutsinyanga tsiene etsio abasanji betsikanisa etsiali Yudea shibali nibamanya isie mwene tawe.

²³Bali nibamanya butswa akabandi baboolanga mbu; “Omundu owakhusaandinjia bulano ayaalanga obusuubili obwayateemanga okhusasia!”

²⁴Mana nibetsoomia Nyasaye khulwa okhubela akayali nakholile okhubirira mwisie.